သျှမ်းပြည်တပ်မတော် SSPP/SSA အား ၂၀၁၄ ခုနှစ်က အစိုးရတပ်မတော်မှ ထိုးစစ်ဆင်ချိန်တွင် ကျန်ခဲ့သည့် ဗုံးဟောင်းတလုံးအား ကျောင်းသူကျောင်းသားကလေးများ ယူဆော့ရာမှ  ပေါက်ကွဲမှုဖြစ်ပွါးရာ ၆ တန်းကျောင်းသူ တဦး သေဆုံးပြီး ၄ ဦး ဒဏ်ရာရရှိသည်ဟု သိရသည်။

အောက်တိုဘာလ ၂၆ ရက်နေ့ မွန်းလွဲပိုင်းက ကျေးသီးမြို့နယ် ငူးလိမ်ရွာတွင် လွန်ခဲ့သည့် ၄ နှစ် ကတည်းက တိုက်ပွဲမှ မပေါက်ကွဲသေးသည့် ဗုံးတလုံးအား ကျောင်းသူ၊ ကျောင်းသားလေးများအဖွဲ့ကသွားရောက် ယူဆောင်ဆော့ ကစားရာမှ ဗုံးပေါက်ကွဲကာ ၆ တန်းကျောင်းသူတဦးသေဆုံးပြီး ၁ ဦးမှာ ဒဏ်ရာပြင်းထန်(စိုးရိမ်) ရသည့်အခြေ အနေဖြစ်နေကြောင်း ကျေးသီးမြို့နယ် ပြည်နယ်လွှတ်တော်ကိုယ်စားလှယ်စိုင်းစံမိန်းက ပြောသည်။

“၄ ယောက်ဒဏ်ရာရတယ်။ ၃ ယောက်က ကျေးသီးဆေးရုံမှာရှိနေပါတယ်။ တယောက်ကဒဏ်ရာပြင်းထန်လို့ ၂၆ ရက်နေ့တုန်းက အောင်ပန်းဆေးရုံ ကိုပို့ဆောင် ဆေးကုသထားရတယ်။ ခန္ဓာကိုယ် ညာဘက်ခြမ်းထိခိုက်ဒဏ်ရာရတယ်။ ”- ဟု ကျေးသီးဆေးရုံသို့သွားရောက်ကာ ကလေးများအား ကြည့်ရှုအားပေးခဲ့သည့် ကျားခေါင်းပါတီကိုယ်စားလှယ် စိုင်းစံမိန်းက ပြောသည်။

ဗုံးကွဲမှုကြောင့်သေဆုံးသွားသူမှာ ကျေးသီးမြို့ အထက ကျောင်းမှ ၆ တန်းကျောင်းသူ နန်းသျှန်စင့် အသက်( ၁၂ နှစ်)ဖြစ်ပြီး အသုဘအား အောက်တိုဘာလ ၂၆ ရက်နေ့က အသုဘချပြီးဖြစ်ကြောင်း၊ ကိုယ်စားဆွမ်းအ လှူအား နို၀င်ဘာလ ၁ ရက်တွင်ပြုလုပ်ပေးမည်ဖြစ်ကြောင်း ဆွေမျိုးများက ပြောသည်။

ဒဏ်ရာပြင်းထန်သဖြင့် အောင်ပန်းဆေးရုံသို့ရောက်နေသူမှာ အသက် ၁၀ နှစ်အရွယ် စိုင်းလှိုင်းနွံဆိုသူဖြစ်ပြီး လက်ရှိတွင် ညာဘက်ခြမ်းခြေလက်များဖြတ်တောက်ရကြောင်း ညာမျက်လုံးကွယ်သွားပြီး ညာဘက် တင်ပါးကြေမွပျက်စီးသွားကြောင်း သိရသည်။

ဒဏ်ရာအနည်းငယ်ရရှိသူများမှာ ကျေးသီး အထက ကျောင်းမှ ၄ တန်းကျောင်းသူ အသက် ၁၀ နှစ်အရွယ် နန်းအွမ်သျှန်ဆိုင်၊ ငူးလိမ်ရွာ အမက ကျောင်းမှ ပထမတန်းကျောင်းသူ ရ နှစ်အရွယ် နန်းဖောင်းညို နှင့် သူငယ်တန်းကျောင်းသား ၈ နှစ်အရွယ် စိုင်းဘမောင် တို့ဖြစ်ကြောင်းသိရသည်။

“ဗုံးပေါက်ကွဲခဲ့တဲ့နေရာက ၂၀၁၄ ခုနှစ်တုန်းက အစိုးရတပ်မတော်နဲ့ သျှမ်းပြည်တပ်မတော်ကြား တိုက်ပွဲဖြစ်ပွါးခဲ့တဲ့ တာ့ဖာ ဆောင်ရွာနားက ငူးလိမ်ရွာဖြစ်တယ်။ အဲဒီဒေသကို အစိုးရတပ်မတော်က အခြေချထားတဲ့နေရာဖြစ်တယ်။ တိုက်ပွဲပြီးပြီးခြင်းမပေါက်ကွဲသေးတဲ့ဗုံးများရှင်းဖို့နဲ့ မိုင်းအသိပညာပေးလုပ်ငန်းဆောင်ရွက်ပေးဖို့က တပ်မတော်မှာတာဝန်ရှိပါတယ်။ တပ်ကထိန်းထား တဲ့နယ်မြေလေ အခုဖြစ်ပွားတဲ့နေရာက ”- ဟု စိုင်းစံမိန်းက သျှမ်းသံတော်ဆင့်အားပြောပြသည်။

သျှမ်းပြည်အတွင်း တိုက်ပွဲများ ဖြစ်ပွါးလျှက်ရှိသောဒေသများတွင် မြေမြှုပ်မိုင်းများ ၊ တိုက်ပွဲမှ မပေါက်ကွဲသေးသည့် လက် နက်ကြီးကျည်နှင့်ဗုံးများ – များစွာရှိနေသေးသဖြင့် မိုင်းထောင်ထားသည့် သက်ဆိုင်ရာလက်နက်ကိုင် အဖွဲ့အစည်း အားလုုံး အနေဖြင့် ပြည်သူသွားလာ အသုံးပြုသည့် လမ်းတွင် မိုင်းများမထောင်ကြရန် – တလ အတွင်း မြေမြှုပ်မိုင်း ၄ ကြိမ်နင်းမိပေါက်ကွဲခြင်းခံရသည့် နမ့်ဆန်ဒေသခံများက လည်းတောင်းဆိုကြသည်။

မြန်မာနိုင်ငံတွင် မြေမြှုပ်မိုင်း ဆက်လက် သုံးစွဲမှုများရှိနေ ပြီး၊ မြေမြှုပ်မိုင်းကြောင့် သေဆုံးမှု အများဆုံးမှာ သျှမ်းပြည်နယ် ဖြစ်ကြောင်း မြေမြှုပ်မိုင်း အသုံးပြုမှု တားဆီးရေး နိုင်ငံတကာ လှုပ်ရှားမှု အဖွဲ့ ICBL ၏ ၂၀၁၇ ဒီဇင်ဘာလတွင် ကမ္ဘာတဝှမ်းလုံးမြေမြှုပ်မိုင်း အသုံးပြုမှု အစီးရင်ခံစာတွင် ရေးသားထားသည်။