သျှမ်းပြည်နယ် မြောက်ပိုင်း နမ့်ဆန်မြို့နယ်တွင် အောက်တိုဘာလအတွင်း အရပ်သား ၄ ဦး မြေမြှုပ်မိုင်း နင်းမိကြောင်း သတင်းရရှိသည်။

အဆိုပါ မြေမြုပ်မိုင်းနင်းမိသည့် အရပ်သားများမှာ အောက်တိုဘာ ၁၉ ရက်တွင် နမ့်ဆန်မြို့နယ် မန်ကန်အုပ်စု၊ မန်ကန်ကျေးရွာ တွင် တဦး၊ အောက်တိုဘာ ၂၁ ရက်နေ့ တွင် မန်ပန်ကျေးရွာသား တဦး၊ အောက်တိုဘာ ၂၄ ရက်နေ့တွင် ဟိုကမ်ကျေးရွာ တွင် တဦး နှင့် အောက်တိုဘာ ၂၅ ရက်နေ့တွင် မန်ကန်ကျေးရွာတွင် တဦး တို့ဖြစ်ကြောင်း သိရသည်။

“ ဦးဇင်း သိသလောက်ကတော့ တပတ်အတွင်းမှာ မြေမြှုပ်မိုင်းနင်းမိတဲ့သူတွေ ၃ ယောက်ရှိပြီး၊ မန်ကန်ကျေးရွာ က ဒကာကြီးဆိုရင် ခြေထောက်ဖြတ်လိုက်ရတယ်။ အသက်အန္တရာယ်တော့ စိုးရိမ်စရာ မရှိဘူး” ဟု နမ့်ဆန်မြို့ မှ ဦးဇင်း အရှင်ဥတ္တမ က မိန့်ကြားသည်။

မြေမြှုပ်မိုင်း အများစုသည် ပြည်သူများ အသုံးပြုသည့် လမ်းတွင်ထောင်ထားကြကြောင်း၊ မြေမြှုပ်မိုင်းကြောင့် ကိုယ်လက်အင်္ဂ ါဆုံးရှုံးမှုများရှိကြသည်ဟု အရှင် ဥတ္တမ က မိန့်သည်။

တချို့ မြေမြှုပ်မိုင်းနင်းမိသည့် ပြည်သူများသည် လက်ဖက်ခြံထဲသို့ လက်ဖက်ခူးရန် ဆိုင်ကယ်ဖြင့် သွားနေစဉ် မိုင်းနင်းမိသကဲ့သို့ တချို့မှာ တရွာ နှင့် တရွာ အကူးတွင် မိုင်းနင်းမိကြောင်း လည်း သိရသည်။

“ ဒီတနှစ်အတွင်းမှာ မိုင်းနင်းမိတဲ့ပြည်သူပိုများလာတယ်။ တပတ်တည်းကို ၃ ၊ ၄ယောက်လောက်ရှိတယ်။ ပြည်သူတွေ တောင်ယာတွေ၊ လက်ဖက်ခြံတွေ သွားတဲ့အချိန်ဖြစ်တယ်” ဟု နမ့်ဆန်ဒေသခံ အမျိုးသား တဦး က ပြောသည်။

မြေမြှုပ်မိုင်းထောင်သည့် အဖွဲ့အစည်းအားလုုံးအနေဖြင့် ပြည်သူသွားလာ အသုံးပြုသည့် လမ်းတွင် မထောင်ကြရန်၊ ပြည်သူနှင့် လွှတ်ကင်းသည့်နေရာတွင်သာ မိုင်းများထောင်ရန် လည်း နမ့်ဆန်ဒေသခံများက ပြောဆိုကြသည်။

ပွင့်လင်းရာသီ ဖြစ်လာပြီ ဖြစ်သဖြင့် မြန်မာ တပ်မတော်ထိုးစစ်များပိုမိုများလာနိုင်သဖြင့် ဒေသခံပြည်သူများ မိုင်းအန္တရာယ် ကင်းဝေးရန် နှင့် မိုင်းအန္တရာယ် သတိထားရှောင်ရှားနိုင်ရန် တအာင်း(ပလောင်) အမျိုးသားလွတ်မြောက်ရေး တပ်မတော် (TNLA) မှလည်း အောက်တိုဘာ ၂၆ ရက်နေ့တွင် အသိပေး ကြေငြာခဲ့သည်။

ဒေသခံပြည်သူများ မိုင်းအန္တရာယ် ကင်းဝေးရန် အတွက် သတိထားသွားလာရန်၊ အထူးသဖြင့် မြန်မာတပ်မတော် စခန်းချသည့်နေရာ အနီးတဝိုက်နှင့် သွားလာလှုပ်ရှားသည့်နေရာဝန်းကျင်များ နင်းမိုင်းများထောင်ထားလေ့ရှိသည် ဟု TNLA ၏ ထုတ်ပြန်ချက်တွင်ရေးသားထားသည်။

အစိုးရပိုင် သတင်းမီဒီယာကလည်း အဆိုပါ မြေမြှုပ်မိုင်းထောင်ထားမှု သည်သောင်းကျန်းသူများ၏ လက်ချက်ဟု ထုတ်ပြန်ကြေငြာထားသည်။

မြန်မာနိုင်ငံတွင် မြေမြှုပ်မိုင်း ဆက်လက် သုံးစွဲမှုများရှိနေသေးပြီး၊ မြေမြှပ်မိုင်းကြောင့် သေဆုံးမှု အများဆုံးမှာ ရှမ်းပြည်နယ် ဖြစ်ကြောင်း မြေမြှုပ်မိုင်း အသုံးပြုမှု တားဆီးရေး နိုင်ငံတကာ လှုပ်ရှားမှု အဖွဲ့ ICBL ၏ ၂၀၁၇ ဒီဇင်ဘာလတွင် ကမ္ဘာတဝှမ်းလုံးမြေမြှုပ်မိုင်း အသုံးပြုမှု အစီးရင်ခံစာတွင် ရေးသားထားသည်။