နေပြည်တော်တွင် ကျင်းပမည့် ၂၁ ရာစု ပင်လုံညီလာခံ တတိယအကြိမ် အတွက် အထောက်အကူပြုရန် လင်း ခေးမြို့တွင် သျှမ်းအမျိုးသားအဆင့် နိုင်ငံရေးဆွေးနွေးပွဲ ကျင်းပနိုင်ရေးအတွက် ကျင်းပရေး ကော်မတီ မှ သျှမ်းပြည်တောင်ပိုင်းအတွင်း လူထုနှင့် ကွင်းဆင်းတွေ့ဆုံစဉ် တပ်မတော်မှ အင်အားသုံး ဟန့်တား လိုက်သည်ဟုသိရသည်။

၂၀၁၇ ဒီဇင်ဘာ ၁၇ ရက်နေ့ က သျှမ်းပြည်တောင်ပိုင်း ၁၁ မြို့နယ်မှ ဒေသခံများအား နမ့်စန်မြို့ နှင့် ပင်လုံမြို့ တို့တွင် တွေ့ဆုံပွဲကျင်းပ ခဲ့ကြောင်း၊ ထိုတွေ့ဆုံပွဲအား မြန်မာ့တပ်မတော် အရှေ့အလယ်ပိုင်းတိုင်း လက်အောက်ခံ လွိုင်လင်တပ်နယ်မှူး ဗိုလ်မှူးကြီးအောင်ဌေး က တပ်အင် အားဖြင့် လာရောက်ဟန့်တားခြင်း ဖြစ်ကြောင်းသိရသည်။

“၂၁ ရာစု ပင်လုံမှာ အထောက်အကူပြုဖို့ ကျနော်တို့ လုပ်တာဘဲ။ တပ်မတော်က ဒီလိုမလုပ်သင့်ဘူး။ နိုင်ငံတော်ကို ပုန်ကန်တာလဲမလုပ်ဘူး။ အခု လုပ်လိုက်တာက သျှမ်းပြည်တောင်ပိုင်းက ၁၁ မြို့နယ်က လူထု တအား နစ်နာတယ်” – ဟု တက်ရောက်သည့် လူငယ်ခေါင်းဆောင် တဦးကပြောသည်။

တွေ့ဆုံပွဲအားလာရောက်တားမြစ်သောအဖွဲ့သည် အရှေ့အလယ်ပိုင်း တိုင်းမှူး ဗိုလ်ချုပ်သန်းလှိုင် အမိန့်နှင့် လာ ခြင်းဖြစ်ကြောင်း၊ အထက်အမိန့်အရ ဆက်လက်ကျင်းပခြင်းမပြုရန် ပြောလိုကြောင်း ပြောသည်ဟု အဆိုပါလူငယ်က ဆက်လက်ပြောပြသည်။

လင်းခေးမြို့ တွင် ကျင်းပမည့် သျှမ်းအမျိုးသားအဆင့်နိုင်ငံရေးဆွေးနွေးပွဲ ဖြစ်မြောက်ရေးကော်မတီ ဝင်တဦးက အခု “အခု လို ဟန့်တားပေမယ့် စီစဉ်ထား တဲ့ အတိုင်း ဆက်လုပ်သွားမယ်။ ဟန့်တားတာ မဟန့်တားတာ သူတို့အလုပ်၊ ကျနော်တို့တော့ စီစဉ်ထား တဲ့အတိုင်း ဆက်လုပ်မယ်” – ဟု ပြောသည်။

နိုင်ငံရေး၊ လုံခြုံရေး၊ စီးပွားရေး၊ လူမှုရေး၊ မြေယာနှင့်သဘာဝ သယံဇာတ ခေါင်းစဉ် ၅ ခု နှင့်ပတ်သက်၍ လူထုသဘောထားရယူပြီး လင်းခေးမြို့တွင် ကျင်းပမည့် သျှမ်းအမျိုးသား အဆင့်နိုင်ငံရေးဆွေးနွေးပွဲသို့ တင်သွင်းဆွေးနွေးရန် လူပေါင်း ၁၆၀ ကျော်က အုပ်စု ၅ ခုခွဲကာ သျှမ်းပြည်တောင်ပိုင်းမှာ ၂ ဖွဲ့၊ မြောက်ပိုင်းမှာ တဖွဲ့၊ အရှေ့ပိုင်းတဖွဲ့၊ ကချင်၊ မန္တလေး၊ ကယား – ပူးတွဲ အဖွဲ့ တို့ ဖြင့် ကွင်းဆင်းနေ ကြောင်း သိရသည်။

“ဒီလုပ်ရပ်က တပ်မတော်က ငြိမ်းချမ်းရေးမရချင်ဘူးဆိုတာပြသ လိုက်တာဘဲ။ သျှမ်းတွေကို လက်နက်ကိုင်တော်လှန်ရေးခရီး ဆက်လုပ်အောင် သူတို့လုပ်နေတာဘဲ” – ဟု သျှမ်းပြည်တပ်မတော် RCSS/SSA မှ ခေါင်းဆောင် ပိုင်းတဦးက ပြောသည်။

သျှမ်းအမျိုးသားအဆင့် နိုင်ငံရေးဆွေးနွေးပွဲကျင်းပရန် ၂၀၁၇ နှစ်ဦးပိုင်းကတည်းက ပြင်ဆင်လာ၏။ သျှမ်းအမျိုးသားခေါင်းဆောင်များက မြို့တော် တောင်ကြီး သို့မဟုတ် ပြည်ထောင်စု သန္ဓေတည်ရာ သမိုင်းဝင် ပင်လုံမြို့တွင် ကျင်းပရန်ပြင်ဆင်၏။ သို့သော် တပ်မတော် က ဟန့်တားပြီး ဝေးလံခေါင်သီ သည့် သံလွင်အရှေ့ခြမ်း မိုင်းတော့ မြို့တွင်သာကျင်းပရန် ပြောဆို၏။ လွန်ခဲ့သည့်လ နေပြည်တော် တွင် နှစ်ဦးနှစ်ဘက် ဆွေးနွေးကာ သျှမ်းပြည်တောင်ပိုင်း လင်းခေးမြို့တွင် ကျင်းပရန် သဘောတူသည်။ ထို့အတွက် အဆိုပါအစည်းဝေးကျင်းပနိုင်ရေး လူထုသဘောထား ရယူရန် ကွင်းဆင်း တွေ့ဆုံစဉ် မြန်မာ့တပ်မတော်မှ ထိုသို့ ဝင်ရောက်ဟန့်တားခြင်းဖြစ်သည်။

ဓါတ်ပုံ- ပင်လုံမြို့တွင်ပြုလုပ်သော သျှမ်းအမျိုးသားအဆင့်နိုင်ငံရေးဆွေးနွေးပွဲဖြစ်မြောက်ရေးကော်မတီမှ လူထုနှင့်တွေ့ဆုံပွဲသို့ အစိုးရတပ်မတော်မှ အင်အားသုံးဝင်ရောက်ဟန့်တားနေပုံ (Photo by Panglong Youth)