“ဘယ်တရားဥပဒေနဲ့မှ အမှုမဖွင့် တော့ဘူး၊ ဒီအမှုကို ဒီမှာတင်ပြီးပါစေ”ဟု သေနတ်ပစ်ခံရပြီး သေဆုံးသွားသည့် အသက် ၃၄ နှစ်အရွယ် စိုင်းအိုက်ထွန်း ၏ မိခင်က ပြောသည်။
စိုင်းအိုက်ထွန်းသည် ကျောက်မဲမြို့နယ် နောင်အန်းရွာတွင် နေထိုင်သည့် သူဖြစ်ပြီး၊ ကျောက်မဲမြို့ နှင့် ၁၀ မိုင် ဝေးကွာသည့် တောင်ယာ သွားသည့် သူတဦးဖြစ်သည်။
အောက်တိုဘာ ၁ ရက်နေ့ ညနေပိုင်း အချိန်တွင် တရုတ် နှင့် မြန်မာ သွယ်တန်းထားသည့် ရေနံ နှင့် သဘာဝ ဓာတ်ငွေ့ ပိုက်လိုင်းအနီး ရှိ အစိုးရတပ် ခြေမြန်တပ်ရင်း ခမရ (၅၀၄) တပ်မှ ဆိုင်ကယ်စီးနင်းလာသည့် လယ်သမား စိုင်းအိုက်ထွန်းကို သေနတ်ဖြင့် ပစ်ခတ်ခဲ့ကြောင်း သိရသည်။
ဖြစ်စဉ်မှာ လယ်ယာမှ ဆိုင်ကယ်ဖြင့် ပြန်လာသည့် စိုင်းအိုက်ထွန်း ကို ခမရ (၅၀၄) တပ်မှ တပ်သား မှ ဆိုင်ကယ်ရပ်ရန် လှမ်းအော်သည် ကို မရပ်ပေးသဖြင့် သေနတ်ဖြင့် နောက်လိုက်ပစ်ခဲ့ကြောင်း အောက်တိုဘာ ၁၆ ရက်နေ့ ထုတ် သျှမ်းလူ့အခွင့်အရေး မဏ္ဍိုင် ထုတ်ပြန်ချက်တွင် ရေးသားထားသည်။
သားဖြစ်သူ စိုင်းအိုက်ထွန်း သေဆုံးမှုနှင့် ပတ်သတ်ပြီး မိခင် က အောက်တိုဘာ ၁ ရက် ည ၉ နာရီတွင် ကျောက်မဲမြို့နယ် ရဲစခန်းသို့ သွားရောက် အမှုဖွင့်ခဲ့သေးသည်။
သို့သော် အောက်တိုဘာ ၂ရက်နေ့တွင် အစိုးရတပ် ခမရ(၅၀၁)နှင့် ခမရ(၅၀၄) တပ်တို့မှ အရာရှိနှင့် အင်အား ၁၅ယောက်တို့သည် ကားသုံးစီးဖြင့် နောင်အန်ကျေးရွာသို့ သေနတ်ပစ်ခံရသည့် စိုင်းအိုက်ထွန်း ၏ မိခင်ထံ လာရောက်တောင်းပန်ခဲ့သေည်။
အစိုးရ တပ်မှ အရာရှိများက သေဆုံးသူ စိုင်းအိုက်ထွန်းမိခင်ကို ” တရား ရုံး တက်ပြီး တရားဥပဒေ အတိုင်း သွားရင်တော့ ခင်ဗျာ့တို့နှင့်ကျုပ်တို့အတွက် အချိန်ကုန် မယ် အချိန်ကြာလိမ့်မယ်၊ တရားရုံးကလည်း ခင်ဗျာ့တို့သား အသက်ပြန်ရှင်လာအောင် မလုပ်ပေးနိုင် ပါဘူး” ဟု ပြောဆိုခဲ့ကြောင်း သျှမ်းလူ့အခွင့်အရေး မဏ္ဍိုင်တွင် ဖော်ပြထားသည်။
အဆိုပါ အစိုးရများက သေဆုံးသူ စိုင်းအိုက်ထွန်းမိခင်အား ဆန် ၁ အိတ်၊ စားဆီ ၃ ပုလင်း၊ သကြား(၁)ကီလို၊ ကော်ဖီ ၁ ထုပ်နှင့် ငွေသား(၁၀)သိန်း ပေးအပ်ပြီး နှစ်သိမ်ခဲ့ကြောင်း လည်း သိရသည်။
“ စိုင်းအိုက်ထွန်း အမှုက တော့ မဖွင့်တော့ဘူး။ ပြီးသွားပြီး။ တပ်ကတော့ ဆန်တွေ၊ဆီတွေလာပေးတယ်။ ဒါတွေက လျော်ကြေးငွေမဟုတ်ဘူး။ နှစ်သိမ့်အနေနဲ့လာပေးတာ” ဟု သျှမ်းလူ့အခွင့်အရေးမဏ္ဍိုင်က စိုင်းဟော်ရှဲန် က ပြောသည်။
၄င်းသေဆုံးမှုနှင့် ပတ်သက် ပြီး ကျေအေးပါကြောင်း ကျေနပ်ပါကြောင်း သဘောတူလိုက်ရကြောင်း လည်း စိုင်းဟောဲရှဲန် က ထပ်လောင်းပြောသည်။
သေဆုံးသွားသည့် စိုင်းအိုက်ထွန်း တွင် ဇနီးတဦး နှင့် ၆လ အရွယ် သမီးငယ်တဦးကျန်ရှိကြောင်းသိရသည်။
“ သူ( စိုင်းအိုက်ထွန်း) တို့ အိမ်က သူ့ကိုပဲ အားကိုးနေရတာ။ သူမရှိတော့ အစစအရာရာ ခက်ခဲမယ်။ လသား သမီးကလည်းရှိတယ်” ဟု စိုင်းဟော်ရှဲန် က ဆိုသည်။
ကျောက်မဲမြို့နယ် အတွင်း အစိုးရတပ်များ၊ လက်နက်ကိုင်များစွာ ကျင်လည် သည့်နေရာတတခုဖြစ်ပြီး၊ မကြာခဏ အရပ်သားများကို အမည်မသိ အဖွဲ့အစည်းမှ သေနတ်ပစ်ခတ်မှုများရှိနေသည်။
