တရုတ်နယ်စပ် မြန်မာဘက်ခြမ်းမူစယ်မြို့ တွင် ဆောက် လုပ်နေသည့် ဆင်ဖြူစျေးကော်မတီရုံးနှင့် ပတ်သတ်ပြီး လက်နက်အပြည့်ကိုင်ဆောင်သည့် တရုတ်တပ်ဖွဲ့ဝင်များ ဝင်ရောက် ဟန့်တား ရာ ဒေသခံများထိတ်လန့်မှု ဖြစ်ခဲ့ကြောင်း သတင်းရရှိသည်။
အောက်တိုဘာ ၁၇ ရက်နေ့ မနက် ၈ နာရီက မူစယ်မြို့အတွင်း တရုတ်တပ်ဖွဲ့များ လက်နက်ဖြင့် နယ်စပ် ဖြတ်ကျော်လာ ပြီး နယ်နိမိတ်အငြင်းပွားမှုဖြစ်ပွါးခဲ့ခြင်းဖြစ်ကြောင်း မူစယ်ဒေခံများက ပြောသည်။
တရုတ်တပ်ဖွဲ့ဝင်များသည် မူစယ်မြို့ နယ်စပ် ခြံစည်းရိုးမှ မြန်မာဘက်သို့ ဝင်ရောက်လာပြီး နယ်စပ်ရှိဆင်ဖြူစျေးကော်မတီရုံ တည်ဆောက်မှုကို လာရောက် တားမြစ်ကြောင်း မူစယ်ဒေသခံ တဦးဖြစ်သည့် စိုင်းအေး က ပြောသည်။
“ ဒီနေ့မနက် ၈နာရီလောက်မှာ ဆင်ဖြူပေါက်မှာဖြစ်တာပါ။ အခု ဆောက်နေတဲ့ဆင်ဖြူစျေးကေ်ာမတီရုံး အဆောက်အဦး မြေနေရာက တရုတ်ဘက်ခြမ်းဆိုပြီး လာရောက်တားမြစ်တာပါ” ဟု အဆိုပါ ဖြစ်စဉ်အတွင်း ရှိနေသည့် စိုင်းအေး က ပြောသည်။
ယခုကဲ့သို့ လက်နက်အပြည့်အစုံဖြင့် လာရောက်တားမြစ်သဖြင့် ဒေသခံများ ထိတ်လန့်မှုဖြစ်ပွားခဲ့ကြောင်း၊ နှစ်နိုင်ငံ ၏ လုံခြုံရေး ချစ်ကြည်ရေးကို ပျက်ပြားစေနိုင်ကြောင်း။ တရုတ်ရဲများအနေဖြင့် တားမြစ်မည်ဆိုပါက သက်ဆိုင်ရာ အာဏာပိုင်မှ တဆင့် ဆောင်ရွက်သင့်ကြောင်းလည်း စိုင်းအေး က ပြောသည်။
အဆိုပါ ကိစ္စနှင့် ပတ်သတ်ပြီး မူစယ်မြို့နယ် ရဲတပ်ဖွဲ့ ဖုန်းဆက်သွယ်မေးမြန်းရာ တာဝန်ကျ ရဲ မှ “ တရုတ်ရဲတွေ လက်နက် အပြည့်ကိုင်ပြီး နယ်စပ် ခြံစည်းရိုးကနေ ဖြတ်ပြီး ဝင်လာတယ်။ ဆင်ဖြူစျေး ကော်မတီ ရုံးဆောက်တဲ့ နေရာ က သူတို့ ပိုင် မြေလို့ ပြောတယ်။ လောဆယ်တော့ အဆောက်အဦး ဆောက်တာ ခဏ ရပ်ထားတယ်” ဟု ဆိုသည်။
မူစယ်ခရိုင် တရုတ်နယ်စပ် တွင် တရုတ်နိုင်ငံနှင့် မြန်မာ မကြာခဏ မြေ အငြင်းပွားမှုဖြစ်ပွားခဲ့ကြောင်းသိရသည်။
လွန်ခဲ့သည့် စက်တင်ဘာ ၁၉ ရက်နေ့တွင် လည်း မူစယ်ခရိုင် ပန်ဆိုင်း (ကြူကုတ်) နှင့် မုံးကို လမ်းပေါ်ရှိ မြန်မာ ပိုင်နက် ဖိုင်ကောင်းကျေးရွာ အတွင်း နယ်စပ်မှ တရုတ်အဖွဲ့များ ခြံစည်းရိုးလာခတ်မှု ပြုလုပ်ခဲ့သေးကြောင်း သိရသည်။
Leave a Comments