သျှမ်းပြည်မြောက်ပိုင်း နောင်ချိုမြို့နယ်နှင့် ကျောက်မဲမြို့နယ်ကြား ဂုတ်တွင်းလမ်းနှင့် ဂုတ်တွင်းရှောင်လမ်း တိုးချဲ့ရေးအတွက် သိမ်းဆည်းခံရလယ်ယာမြေများလျော်ကြေးပြန်မရသေးသည့် ကျန်ရှိလယ်သမား ၆၂ ဦး အတွက် ယာမြေ တဧက ကျပ်သိန်း ၁၀၀-၁၅၀ အထိ ပေးလျော်ဖို့ နေပြည်တော် ဆွေးနွေးပွဲတွင် အစိုးရ နှင့်သဘောတူကြသည်ဟု သိရသည်။

အောက်တိုဘာလ ၁၁ ရက်နေ့ မနက် ၁၀ နာရီမှ ညနေ ၃ နာရီအထိ နောင်ချိုလယ်သမား ၆၂ ဦးသည် သျှမ်းပြည်နယ်ဝန်ကြီးချုပ် အပါအဝင် သျှမ်းပြည်နယ်အစိုးရ ဆောက်လုပ်ရေးဌာနဝန်ကြီး ၊ လွှတ်တော်ကိုယ် စားလှယ်များ၊ သယ်ယူပို့ဆောင်ရေးဌာန၊ သဘာဝပတ်ဝန်းကျင်ထိန်းသိမ်းရေး၊ နောင်ချို ၊ ကျောက်မဲ မြို့နယ်အုပ်ချုပ်ရေးမှူးများနှင့်အတူ နေပြည်တော်ရှိ ဆောက်လုပ်ရေးဝန်ကြီးရုံးတွင် တွေ့ဆုံကာ ဂုတ်တွင်းလမ်းတိုးချဲ့ရေးတွင် အဆိုပါမြေယာပိုင်ရှင်ဒေသခံလူထု ၆၂ ဦးအတွက် ကျေနပ်လောက်သည့် လျော်ကြေးငွေ ရရှိရေးဆွေးနွေးခဲ့ကြခြင်းဖြစ်သည်။

“သိန္နီမြို့နယ် ပြည်သူ့လွှတ်တော်ကိုယ်စားလှယ် စိုင်းဦးခမ်းက- ဒီကိစ္စနဲ့ပတ်သက်ပြီး သူတို့ဆွေးနွေးကြ တယ်။ အဆင်ပြေသွားကြပြီလို့သိရပါတယ်။ ကျန်လယ်သမား ၆၂ ဦးရဲ့အသိမ်းခံရလယ်ယာမြေတွေကို ဌာနဆိုင်ရာက တချက်ပြန်လည်ကွင်းဆင်းကြည့်မယ်။ လျော်ကြေးကတော့ တဧက ကျပ်သိန်း ၁၀၀ ကနေ ၁၅၀ အထိ ပေးမယ်။  တခြားခေါင်းစဉ်အောက်မှာလဲသွားပြီးတော့မှ ဖြည့်တင်းလျော်ကြေးပေးမယ်လို့ အစိုးရဘက် ကပြောလာတယ်။” – ဟု သျှမ်းသံတော်ဆင့်အားပြောသည်။

အဆိုပါဆွေးနွေးပွဲမှ သဘောတူညီချက် ၁၅ ချက်ရရှိခဲ့ကြောင်း သိရသည်။

ပြည်ထောင်စုလမ်းမ ဘေးရှိ သိမ်းဆည်းခံရမြေနေရာများအတွက် တဧက ကျပ်သိန်း ၁၀၀ -၁၅၀ အထိပေးမည်ဖြစ်ပြီး လမ်းမကြီးဝဲယာမဟုတ်သောနေရာများတွင်မူ ပြန်လည်ကွင်းဆင်းတိုင်းတာကာ လူထုမနစ်နာစေဘဲ လျော်ကြေးပေးဆောင်သွားမည်ဟု ပြောဆိုကြောင်း မြစ် ၊ချောင်း ၊ မြောင်း လည်း မပျက်စီးစေရန် ကုမ္မဏီနှင့် ဆောက်လုပ်ရေးဌာနက တာဝန်ယူ ပြုပြင်ပေးသွားမည်ဖြစ်ကြောင်း၊ သီးနှံခြံများမှာမူ တကယ့်စိုက်ပျိုးသော သီးနှံ အပေါ်မူတည်ပြီး လျော်ကြေးပေးဆောင်သွားမည်ဖြစ်ကြောင်း၊ တချို့နေရာများတွင် မြေတိုင်းတာမှုမှားယွင်းထားသည်လည်းရှိရာ ပြန်လည်တိုင်းတာပေးသွားမည်ဖြစ်ကြောင်း စသည်တို့ ထည့်သွင်းဆွေးနွေးခဲ့ကြောင်းသိရသည်။

ဂုတ်တွင်းရှောင်လမ်းနှင့် ဂုတ်တွင်းလမ်းသစ်အား OHC (Oriental Highway Company) ကုမ္မဏီမှ တာဝန်ယူကာ ၃ နှစ်တာကာလအတွင်း အပြီးဆောက်လုပ်သွားမည်ဖြစ်ကြောင်း၊ အသိမ်းခံရမြေယာများ အတွက် လျော်ကြေးများကိုမူ အစိုးရဘက်က တာဝန်ယူလျော်ကြေးပေးဆောင်သွားမည်ဖြစ်ကြောင်းလည်း ကနဦးက သဘောတူထားကြောင်း မြေယာအသိမ်းခံရ နောင်ချိုလယ်သမား များကပြောသည်။

မန္တလေး – မူစယ် ပြည်ထောင်စုလမ်းတွင် နေ့စဉ် ကားကြီးကားငယ် အစီးရေ သောင်းနှင့်ချီ သွားလာတက်-ဆင်းသည်ဟု တိုးလ်ဂိတ် ၀န်ထမ်းများအသိုင်းအဝိုင်းကပြောသည်။ အင်္ဂလိပ်အစိုးရခေတ်ကတည်းက ဖောက်ထားသော ဂုတ်တွင်းလမ်း သည် လမ်းကျဉ်းပြီး မိုးတွင်းကာလ ကားများ မတော်တဆ ချော်လဲ ပျက်စီးပါက လမ်းပိတ်ကာ လမ်းခရီးကြန့်ကြာမှုရှိခဲ့သည်။ ထို့အတွက် ဂုတ်တွင်းလမ်းချဲ့ရေး၊ ဂုတ်တွင်းရှောင်လမ်းဖောက်လုပ်ရေးအတွက် ဦးသိန်းစိန်အစိုးရလက်ထက် ၂၀၁၅ ခုနှစ်ကတည်းက အစိုးရနှင့် ကုမ္မဏီတို့သဘောတူညီမှုရှိခဲ့သည်။