သျှမ်းပြည် နောင်ချိုမြို့နယ်တွင် ကြံသွားခုတ်သည့် အမျိုးသမီး ၃ ဦးသည် မြေမြှုပ်မိုင်း နင်းမိပြီး ထိခိုက်ဒဏ်ရာ ရရှိခဲ့ခြင်းကြောင်း စုံစမ်းသိရသည်။

ပြီးခဲ့သည့် ဖေဖော်ဝါရီလ ၁၁ ရက်တွင် စစ်ကော်မရှင် ပြန်လည်ထိန်းချုပ်ထားသည့် နောင်ချိုမြို့နယ် ကုန်းစံကျေးရွာဘက်ရှိ ကြံခင်းတစ်ခုတွင် ကြိုးဖြင့်ထောင်ထားသည့် မြေမြှုပ်မိုင်းကို ထိခိုက်မိခြင်းကြောင့် ပေါက်ကွဲမှုဖြစ်ကာ နေ့စားလိုက် ကြံခုတ်သွားသည့် အမျိုးသမီး (၃) ဦး ထိခိုက်ဒဏ်ရာရရှိခဲ့ကြောင်း နောင်ချိုဒေသခံများက ပြောသည်။

“ကြံသွားခုတ်တဲ့လူတွေတော့ မကြာခဏ မိုင်းနင်းမိနေတယ်။ ဂုတ်ထိပ်တံတားသွားတဲ့ဘက်က ကုန်းစံရွာမှာ ကြံခုတ်ရင်း ၃ ယောက် မိုင်းနင်းမိတယ်။ အမျိုးသမီး ၃ ယောက်ထဲမှာ သက်ကြီးပိုင်း ၁ ယောက်နဲ့ မိန်းကလေးငယ် ၂ ယောက် ဒဏ်ရာရတယ်။ ကြိုးနဲ့ မိုင်းထောင်ထားတာကို သွားနင်းမိတာလို့ ပြောကြတယ်” ဟု ဖြစ်စဉ်သိရှိသူ နောင်ချိုဒေသခံ အမျိုးသမီးတစ်ဦးက သျှမ်းသံတော်ဆင့်ကို ပြောသည်။

လက်ရှိတွင် မိုင်းနင်းမိသည့် အဆိုပါ အမျိုးသမီးများထဲမှ တစ်ဦးမှာ ဦးခေါင်း၊ နောက်ကျောနှင့် ခြေထောက် ထိမှန်ဒဏ်ရာများဖြင့် ကျောက်မဲမြို့တွင် ဆေးကုသမှု ခံယူနေကြောင်း နောင်ချိုဒေသခံ ၎င်းအမျိုးသမီးက ဆက်ပြောသည်။

ယမန်နှစ် ၂၀၂၅ မေလခန့်မှ စတင်၍ နောင်ချိုမြို့နယ်တွင် တအာင်း(ပလောင်) အမျိုးသားလွတ်မြောက်ရေးတပ်မတော် TNLA ၊ ဓနုပြည်သူ့လွတ်မြောက်ရေးတပ်မတော် DPLA ပူးပေါင်းတပ်နှင့် စစ်ကော်မရှင်တပ်တို့အကြား တိုက်ပွဲပြင်းထန်ခဲ့ပြီး တောင်ယာထဲတွင် ၎င်းတပ်ဖွဲ့များ ထောင်ထားခဲ့သည့် မြေမြှုပ်မိုင်းများကို ဖယ်ရှားရှင်းလင်းမှု မပြုလုပ်ရခြင်းကြောင့် ဒေသခံများမှာ မိုင်းအန္တရာယ် စိုးရိမ်နေရကြောင်း သိရသည်။

“တောင်ယာလည်း ဘေးမကင်းလို့ ဘယ်သူမှ မသွားရဲတော့ဘူး၊ ဘယ်မှာ မိုင်းထောင်ထားလဲ မသိဘူးလေ။ စစ်ရှောင်လို့ အိမ်ပြန်လာပေမယ့် ခြံမသွားရဲဘူးလေ၊ ကြံကျတော့လည်း မခုတ်ရင် မရတော့ မသွားမဖြစ် သွားရတယ်လေ။ ကြံမခုတ်ရင် ရှုံးမှာဆိုတော့ အလုပ်သမား ရှားတာနဲ့၊ စက်ရုံပို့တဲ့ ကားခနဲ့ ဘာမှ မကျန်ပါဘူး” ဟု နောင်ချိုဒေသခံ ကြံတောင်သူတစ်ဦးက သျှမ်းသံတော်ဆင့်ကို ပြောသည်။

အလားတူ ဖေဖော်ဝါရီလ ၂ ရက်တွင် လားရှိုးမြို့နယ် မယ်ဟန်ကျေးရွာအုပ်စု နမ့်ကျန်ကျေးရွာတွင် စိုက်ပျိုးရေးခြံအတွင်း ခြံရှင်းနေသည့် အမျိုးသားတစ်ဦး မိုင်းနင်းမိပြီး ဒူးအောက်ပိုင်း ခြေထောက်နှစ်ဖက်လုံး ဖြတ်လိုက်ရကြောင်း တအာင်း(ပလောင်) အမျိုးသမီးအဖွဲ့အစည်း TWO မှ ဖေဖော်ဝါရီလ ၅ ရက်တွင် သတင်းထုတ်ပြန်ထားသည်။
10m