ရက်ပေါင်း ၆၀ နီးပါး ဖမ်းဆီးထားသော နမ့်ခမ်းမြို့သူ နန်းမိုဟွမ်အား SSPP/SSA မေတ္တာရပ်ခံချက်ကြောင့် အောက်တိုဘာလ ၁၅ ရက်နေ့တွင် ပြန်လွှတ်ပေးလိုက်ပြီဖြစ်ကြောင်း TNLA ဥက္ကဌ မှ ကြေငြာချက်တစောင် ထုတ်ပြန် လိုက် သည်။
Photo: PSLF -TNLA News & Information Department/ နန်းမိုဟွမ် ကို မိသားစုဝင်တွေဖြစ် တဲ့ ဦးစိုင်းထွန်းလှိုင်၊ ဒေါ်နန်းမြရင်၊ စိုင်းခန်းဆိုင် တို့ထံ ပြန်လည်အပ်နှံစဉ်
အဆိုပါကြေငြာချက်တွင် FPNCC ၏ကြားဝင်စေ့စပ်ညှိနှိုင်းပေးမှုအရသော်လည်းကောင်း၊ မဟာမိတ်အဖွဲ့ အစည်း ဖြစ်သည့် SSPP/SSA ၏ မေတ္တာရပ်ခံချက်ကြောင့်လည်းကောင်း နန်းမိုဟွမ်အား ပြစ်ဒဏ်မှ ချွင်းချက် မရှိ လွှတ်ငြိမ်းသက်သာခွင့်ပေး လိုက်ပြီဖြစ်ကြောင်း TNLA ဥက္ကဌ ဗိုလ်ချုပ် တားအိုက်ဘုန်းက အောက်တိုဘာလ ၁၅ ရက်နေ့ရက်စွဲဖြင့် ကြေငြာချက်ထုတ်ပြန် ခဲ့သည်။
“ကျနော်တို့သိရသလောက်တော့ နန်းမိုဟွမ်ရဲ့မိသားစုဝင်တွေနဲ့ SSPP/SSA ကနေ သွားကြိုနေပါတယ်။ ဒီကနေ့ အောက်တိုဘာလ ၁၅ ရက်ပေါ့။ နက်ဖြန်ကျရင် ၀မ်ဟိုင်းဌာနချုပ်မှာ သတင်းစာရှင်းလင်းပွဲလုပ်မယ်လို့ကြား သိရပါတယ်။ ” – ဟု နမ့်ခမ်းမြို့ခံလူငယ်ခေါင်းဆောင် စိုင်းသိန်းရွှေ ကသျှမ်းသံတော်ဆင့်အားပြောသည်။
နန်းမိုဟွမ်အား အမြန်ဆုံးပြန်လွှတ်ပေးရေးအတွက် မြောက်ပိုင်းမဟာမိတ်တပ်ဖွဲ့ FPNCC ခေါင်းဆောင်များထံ နမ့်ခမ်းဒေသခံလူငယ်ခေါင်းဆောင် ၄ ဦးက သွားရောက်တွေ့ဆုံပြီး တအာင်းတပ်ဖွဲ့ကိုယ်စားလှယ်တွေနဲ့ ပြီးခဲ့တဲ့ ၁၀ ရက်နေ့က တွေ့ဆုံဆွေးနွေးခွင့်ရခဲ့သည်။
နန်းမိုဟွမ်အားအမြန်ဆုံးပြန်လွှတ်ပေးမည်ဖြစ်ကြောင်း ကြေငြာချက်တစောင်ပါထုတ်ပြန်ခဲ့သည်။
“ခုထိတော့အိမ်မရောက်သေးဘူးခင်ဗျ ။ နန်းမိုဟွမ်ကို ပြန်လွှတ်ပေးတဲ့အတွက် ကျနော်တို့တော့ အတိုင်းမသိ ၀မ်းသာပါတယ်။ “- ဟု ခင်ပွန်းဖြစ်သူ စိုင်းစောရွှေက သျှမ်းသံတော်ဆင့်အား ပြောသည်။
ယမန်နှစ် ၂၀၁၇ က နန်းမိုဟွမ် အိမ်မှ အခွန် ၁၁ သိန်းကောက်ခံပြီးအပြန် တအာင်းတပ်သား ၂ ဦးအား လမ်းတွင် အစိုးရတပ်မှ ချောင်းမြောင်းပစ်ခတ်ရာ တဦးသေ တဦးဖမ်းဆီးခံရသည့်အပေါ် TNLA က နန်းမိုဟွမ် သည် တအာင်းအကောက်ခွန် ၀န်ထမ်းအား တာဝန်ဝတ္တရားနှောင့်ယှက်သည်ဟုဆိုကာ သူမအား စက်တင်ဘာ ၁၇ ရက် နေ့ မနက် ၈ နာရီခွဲ ( သူမ၏ ကလေး အား ထမင်းကျွေးနေချိန် ) လက်နက်ကိုင် တအာင်းတပ်ဖွဲ့ဝင် ၅ ဦးက သေနတ်ထိုးချိန်ကာ ကားပေါ် တင်ဖမ်းဆီး ခေါ်ဆောင် သွားခဲ့သည် ။
နန်းမိုဟွမ်အား ရာဇသတ်ကြီး ပုဒ်မ ၃၃၃ ဖြင့် အရေးယူမည်ဖြစ်ကြောင်း၊ မိဘများရှေ့မှောက်တွင်တရားစီရင်မည်ဖြစ်ကြောင်း TNLA ၏ ပြန်ကြားရေးဌာနက ကြေငြာချက်ထုတ်ပြန်ခဲ့ပြီးနောက် မိဘများအားမခေါ်ယူဘဲ နန်းမိုဟွမ်အား ပြစ်ဒဏ် ၃ နှစ် ချမှတ်ကြောင်း အောက်တိုဘာ ၃ ရက်နေ့က TNLA ထုတ်ပြန်ထားရာမှ ၄င်း၏မဟာမိတ် SSPP/SSA ၏ မေတ္တာရပ်ခံချက်ကြောင့် ဟုဆိုကာ ယနေ့လွတ်ငြိမ်းချမ်းသာခွင့်ပေးလိုက်ခြင်းဖြစ်သည်။
Leave a Comments