ယနေ့ကျောက်မဲတွင်ပြုလုပ်သော ဓမ္မမေဒနီကျောင်းတိုက်ကျောင်းထိုင်ဆရာတော် ဦးကလျာဏဝံသ အဂ္ဂိဈာပန အခမ်းအနားသမယ သျှမ်းပြည်တောင်ပိုင်း လွယ်လင်ခရိုင် ခိုလမ်မြို့နယ်ခွဲတွင် ဆရာတော် ၊ သံဃာတော်များနှင့် ဒေသခံလူထုစုပေါင်းကာ ဆီမီးထွန်းပူဇော်ပြီးဆုတောင်းပွဲ တရပ်ပြု လုပ် မည်ဖြစ်ကြောင်း သိရသည်။

အောက်တိုဘာလ ၁၁ ရက်ညနေ ၆ နာရီခွဲအချိန် ခိုလမ် မြို့နယ်ခွဲ သီရိမင်္ဂလကျောင်းတိုက်တွင် ဆီမီးထွန်းပူဇော်ကာ ဆုတောင်းပွဲကျင်းပမည်ဖြစ်ကြောင်း ခိုလမ်ဒေသခံ စိုင်းအွန် ကပြောသည်။

ဒီအစီအစဉ်လေးဖြစ်မြောက်ဖို့ ကျနော်တို့ ဆိုင်လျန်းကျောင်းတိုက်ကဆရာတော် ဦးဆောနန္တက နေဦးဆောင်ပါတယ်။ ဆရာတော် ဦးကလျာဏဝံသ အတွက်ဆုတောင်းပေးမယ်။ နောက်ပြီးတော့ ဒီလိုအဖြစ်ဆိုးမျိုး ဘယ်သံဃာတော်ဆီမှာမှ ထပ်မဖြစ်စေဖို့ ဘယ်နေရာ ဘယ်သူ့ဆီမှာမှ ထပ်မဖြစ်စေဖို့ ဆုတောင်းကြမှာဖြစ်ပါတယ်။ အားလုံးကိုပါဝင်ဆုတောင်းကြဖို့ ဖိတ်ခေါ်ပါတယ် – ဟု သျှမ်းသံတော်ဆင့်အားပြောသည်။

ဆရာတော်ဦးကလျာဏဝံသ သည် ယခုလ ၅ ရက်နေ့က ကျောက်မဲမြို့ ရပ်ကွက် ၇ ရှိ ကျောင်းယွက် ရွှေကျင်ကျောင်း (ကျောင်းယွက်ကျောင်းတိုက်) တွင် ကိုယ်ရင်ငယ်များနှင့်အတူ ဘုရားဝတ်ပြု ရန် စီစဉ်နေ သည့်အချိန် အမည်မသိလက်နက်ကိုင်သူ ၂ ဦးက ဆိုင်ကယ်တစီးဖြင့်ကျောင်းအတွင်း ဝင်ရောက်ကာ ပစ်ခတ်သဖြင့် ဆရာတော်မှာ ကျည်ဆံ ၇ တောင့်ထိမှန်ကာ ပျံလွန်တော်မူခဲ့သည်။

ယနေ့တိုင် အဆိုပါသေနတ်ပစ်ခတ်သည့်လက်သည်အားမသိရသေးပေ။ ထိုသို့သော သာသနာပြုပုဂ္ဂိုလ်အား ပစ်ခတ်မှုမျိုးကို ဆန့်ကျင်ကန့်ကွက်ကြောင်း ၊ ထပ်မံမပေါ်ပေါက်စေလိုကြောင်း နိုင်ငံရေးပါတီ ၊ စစ်တပ်၊ ပြည်တွင်းပြည်ပမှသံဃာတော်များ၊လူမှုအခြေပြုအဖွဲ့အစည်းများက အသီးသီးကြေငြာချက်ထုတ်ပြခဲ့သည်။

ဆရာတော်၏ ကြွင်းကျန်ရုပ်ကလပ်အား ကျောက်မဲမြို့တွင်ယနေ့ အောက်တိုဘာ ၁၁ ရက်နေ့တွင် အဂ္ဂိဈာပန အခမ်းအနားကျင်းပမည်ဖြစ်သည်။