သျှမ်းပြည်မြောက်ပိုင်း ကျောက်မဲမြို့နယ် ရပ်ကွက် ၇ ရှိ ဓမ္မမေဒနီရွှေကျင်ကျောင်း တိုက်(ကျောင်းယွက်ကျောင်းတိုက်)မှ ကျောင်းထိုင်ဆရာတော် ဦးကလျာဏ ဝံသ၏ ရုပ်ကလပ်အား အောက်တိုဘာလ ၁၁ ရက်နေ့တွင် အဂ္ဂိဈာပန မီးသဂြိုဟ်ပွဲပြုလုပ်မည်ဖြစ်ကြောင်းသိရသည်။

‘‘ကျောက်မဲမြို့နယ်အတွင်းမှ သံဃာတော်တပါးက- အခု ဘုန်းဘုန်းတို့ ဒီကျောင်းထိုင်ဆရာတော်ရဲ့ ရုပ်ကလပ်ကို သဂြိုဟ်ဖို့စီစဉ်နေတယ်။ ဆရာတော်က ရွှေကျင်ဂိုဏ်းမို့လို့ အလောင်းက ကြာကြာထားလို့မရဘူး။ သီတင်းကျွတ်လဆန်း ၂ ရက်နေ့မှာ အဂ္ဂိဈာပနပွဲပြုလုပ်ပါမယ်။ သီတင်းကျွတ်လဆန်း ၁ ရက်နေ့မှာ လွယ်လင်ဓါတ်တော်ကျောင်းတိုက်ဆရာတော်ရော သီတဂူဆရာတော်ရောလာပြီး တရားဟောကြားပါမယ် ’’- ဟု သျှမ်းသံတော်ဆင့်အားမိန့် တော်မူပါသည်။

ကျောက်မဲမြို့ ခရိုင်ရဲရုံးအနီးရှိ ရွှေကျင်ကျောင်းတိုက်(ကျောင်းယွက်ကျောင်းတိုက်) တွင် အောက်တိုဘာလ ၅ ရက်နေ့ ညနေပိုင်း ၆ နာရီခွဲက အမည်မသိလက်နက်ကိုင်သည့်လူ ၂ ဦးက ဆိုင်ကယ်ဖြင့် ရောက်ရှိကာ ကျောင်းထိုင်ဆရာတော်ဦးကလျာဏ ဝံသအား ပစ်ခတ်သဖြင့် ကျည်ဆံ ၇ ချက်ထိမှန်ကာ ဆရာတော် ပျံလွန်တော်မူခဲ့သည်။

ယနေ့တိုင်လက်နက်ကိုင်သေနတ်သမား ၊ ဆရာတော်အားပစ်ခတ်သည့်တရားခံကို မသိရသေးပေ။

သျှမ်းပြည်နိုင်ငံရေးရှုပ်ထွေးနေချိန် သာသနာပြုပုဂ္ဂိုလ်အား သတ်ဖြတ်မှုတရားခံအား အပြင်းအထန် ကန့်ကွက်ရှုပ်ချကြောင်းနှင့် တရားခံအား ဖော်ထုတ်ဖမ်းဆီးပေးရန် ဒေသအာဏာပိုင်များ၊ သက်ဆိုင်ရာဌာနမှ တာဝန်ရှိပုဂ္ဂိုလ်များအား သျှမ်းပြည်တွင်း နိုင်ငံရေးပါတီများ၊ လက်နက်ကိုင်တပ်ဖွဲ့များ၊ သျှမ်းပြည်တွင်းပြည်ပအခြေစိုက် လူမှုအခြေပြု အဖွဲ့အစည်းအသီးသီးက ကြေငြာချက်ထုတ်ပြန်ထားသည်။

ဆရာတော် ဦးကလျာဏဝံသ သက်တော် ၄၆ ဝါတော် ၂၆ သည် ကျောင်းယွက်ကျောင်းတိုက် တွင် ၂၀၁၁  ခုနှစ်က ဘုန်းတော်ကြီးစာသင်ကျောင်းအဖြစ် စတင်ဖွင့်လှစ်သည်။ လက်ရှိတွင် သျှမ်း၊ တအာင်း၊ ဗမာ အစရှိတိုင်းရင်းသားပေါင်းစုံ စာသင်သားကိုယ်ရင်ငယ်အပါပေါင်း ၂၀၀ ကျော်အားလက်ခံကာ စာသင်ကြားပေးနေပြီး အဆိုပါကိုယ်ရင်ငယ်များအတွက် ၄ ထပ်ကျောင်းဆောင်ကြီး တည်ဆောက်နေသည်မှာ မပြီးစီးသေးကြောင်းသိရသည်။

ကျောက်မဲသံဃာတော်များနှင့် ဒေသခံများထုတ်ဝေထားသော ဆရာတော်၏ ကိုယ်ရေးအကျဉ်းမှာ အောက်ပါအတိုင်းဖြစ်သည်။