သျှမ်းပြည်တပ်မတော် နွံစစ်ဟန်စတင်ကတည်းက ပါဝင်လာခဲ့သော သက်တမ်းရင့် တော်လှန်ရေး သမားဟောင်း စဝ်လျန်းမိဏ်းသည် သက်ကြီးရောဂါဖြင့် ကွယ်လွန်သွားခဲ့သည်။
နမ္မတူမြို့နယ် (သိန္နီစော်ဘွားလက်အောက်ခံ) မိုင်းရင် မြို့စား၏ သားဖြစ်သူ စဝ်လျန်းမိဏ်း အသက် ၇၆ နှစ်သည် အောက်တိုဘာလ ၈ ရက် နေ့ က သက်ကြီးရောဂါဖြင့် ကွယ်လွန်သွားခဲ့ပြီး အောက်တိုဘာလ ၉ ရက်နေ့တွင် သဂြိုဟ်မည်ဖြစ်ကြောင်း သိရသည်။
“ဘာရောဂါမှကြီးကြီးမားမားမရှိပါဘူး။ ပြီးခဲ့တဲ့လကတော့ ခြေထောက်နာလို့ လမ်းမလျှောက်နိုင်ဘူး အဲလောက်ဘဲ။ ခုတော့ ဆုံးသွားတာမြန်လွန်းတယ် ”- ဟု ယောက်ဖ တော်စပ်သည့် ပြည်ထောင်စုအင်စတီကျုမှ ဒါရိုက်တာ ဦးခွန်စိုင်းကပြောသည်။
စဝ်လျန်းမိဏ်းသည် ၁၉၆၄ ခုနှစ်ကတည်းက SSA တော်လှန်ရေးတပ်ဖွဲ့အတွင်းဝင်ရောက်ခဲ့ပြီး စဝ်ကွဏ်းဇိဏ်း ဦးဆောင်သော SURA အဖွဲ့တွင် ခေါင်းဆောင်ကြီးနှင့်အတူ လိုက်ပါ အလုပ်လုပ်ခဲ့ရသူဖြစ်ပြီး၊ ၁၉၆၆ ခုနှစ်က SSA နှင့် SNIA ပူးပေါင်းရေး၊ ရလလဖ နှင့်ပူးပေါင်းရေးအတွက်တာဝန်ပေးအပ်ခြင်းခံရသူဖြစ်သည်။ ထိုနောက်ပိုင်း SURA ဌာနချုပ်တွင် စိုက်ပျိုးရေးနှင့် သစ်တောတွင် တာဝန်ထမ်းဆောင်ကာ ၁၉၉၆ လုပ်ငန်းတာဝန်မှရပ်နားသည်အထိ ဖြစ်သည်။ လက်ရှိတွင် စဝ်လျန်းမိဏ်း၏ ကျန်ရစ်သူမိသားစုမှာ ထိုင်းနိုင်ငံချင်းမိုင်ခရိုင် ဝိန်းဟိုင်မြို့ ပိန်းလုံအုပ်စု တွင် နေထိုင်ကြောင်းသိရပါသည်။
