သျှမ်းတော်လှန်ရေး တပ်ဖွဲ့ တစ်ခုဖြစ်သော သျှမ်းပြည် တပ်မတော် SSA တပ်ဖွဲ့ဝင်ဟောင်း တစ်ဦးဖြစ်သည့် စိုင်းညိုသည် အသက် ၈၆ နှစ်တွင် ၎င်း၏ နေအိမ်၌ ကွယ်လွန်သွားကြောင်း သိရသည်။

ဇွန်လ ၉ ရက်နေ့ မွန်းလွဲပိုင်း ၃ နာရီဝန်းကျင် အချိန်တွင် စိုင်းညို အသက် ၈၆ နှစ်သည် ၎င်း၏ နေအိမ် တည်ရှိရာ ထိုင်းနိုင်ငံ၊ ချင်းမိုင်ခရိုင်၊ စံကဖန်းမြို့နယ်၌ ကွယ်လွန်သွားကြောင်း စိုင်းညို၏ ဇနီးဖြစ်သူ ပါ့အောင်က သျှမ်းသံတော်ဆင့်ကို ပြောသည်။

“နေမကောင်း ဖြစ်တာတော့ ၃ နှစ်ရှိနေပါပြီ၊ ဖျားနာတာမျိုးတွေတော့ မဟုတ်ပါဘူး၊ လူကြီးရောဂါ အလျောက် ထမရ ၊ လှုပ်မနိုင် အားတွေနည်းနေလို့ အိပ်ရာထဲ လှဲနေရတာမျိုးပေါ့။ မနေ့က သူသွားခါနီးမှာလည်း ဘာမှ မဖြစ်ဘူး။ ဘုရားရှိခိုးနေတဲ့အချိန် အသက်ပြင်းပြင်း ရှုလာရင်းကနေ အဲ့လိုထွက်သွားတာပဲ” ဟု စိုင်းညို၏ ဇနီးဖြစ်သူ ပါ့အောင်က သျှမ်းသံတော်ဆင့်ကို ပြောသည်။

လက်ရှိတွင် ကွယ်လွန်သူ စိုင်းညို၏ ရုပ်အလောင်းကို (วัดสีมาราม) ဘုန်းကြီးကျောင်းတိုက်သို့ ပို့ဆောင်ထားကြောင်း နှင့် ဇွန်လ ၁၃ ရက်နေ့တွင် သဂြိုလ်မည် ဖြစ်ကြောင်းလည်း သိရသည်။

စိုင်းညို သည် ကိုးကန့်တပ်ဖွဲ့ ဦးဆောင်သည့် လက်နက်ကိုင် တော်လှန်ရေးတပ်ဖွဲ့ဝင် တစ်ဦးအဖြစ်မှ ၁၉၆၄ ခုနှစ်အရောက်တွင် သျှမ်းပြည်လွတ်လပ်ရေး တပ်မတော် SSIA တပ်ဖွဲ့ နှင့် SNUF တပ်ဖွဲ့ တို့မှ ဖွဲ့စည်းတည်ထောင်လိုက်သည့် SSA တပ်ဖွဲ့ဝင် တစ်ဦး ဖြစ်လာကြောင်း လေ့လာသိရသည်။

စိုင်းညို၏ ဇာတိသည် သျှမ်းပြည် လားရှိုးခရိုင် ကွန်လုံမြို့တွင်ဖြစ်ပြီး ထိုင်းနိုင်ငံ ၊ ချင်းမိုင်ခရိုင်အတွင်း ပြောင်းရွှေ့နေထိုင်လာခဲ့သည်မှာ နှစ်ပေါင်း ၄၀ ကျော်ပြီ ဖြစ်ကြောင်းလည်း သိရသည်။

လက်ရှိ ကွယ်လွန်ချိန်တွင် သား/သမီး ၂ ယောက် နှင့် ဇနီး မယ်ထောက်အောင်တို့ ကျန်ရှိနေကြောင်းလည်း သိရသည်။