SSA သျှမ်းပြည်တပ်မတော်တည်ထောင်ခြင်း ၅၅ နှစ်မြောက်အထိမ်းအမှတ်အခမ်းအနားတွင် တိုက်ပွဲများရပ်တန့်စေနိုင်ရေး သျှမ်းတပ် ၂ ဖက် တပ်ဆုတ်ထားပြီဖြစ်ကြောင် း သံဃာတော်နှင့်လူထုတို့နှင့်တွေ့ဆုံစဉ် SSPP ပြောခွင့်ရ ဒုတိယဗိုလ်မှူးကြီး စိုင်းဆု ကပြောသည်။

ဧပြီလ ၂၄ ရက်နေ့တွင်ကျရောက်သော သျှမ်းပြည်တပ်မတော် SSA တည်ထောင်ခြင်း ၅၅ နှစ်ပြည့်အခမ်းအနားကို SSPP/SSA ဌာနချုပ် ၀မ့်ဟိုင်းတွင် မနက်ပိုင်းကျင်းပခဲ့ပြီး ညနေပိုင်းတွင်မူ SSPP/SSA မှသံဃာနှင့်လူထု တို့နှင့်တွေ့ဆုံခဲ့ကြောင်းသိရသည်။

“မနက်ပိုင်းအခမ်းအနားက တက်ရောက်သူ ၂၅၀၀ ကျော်ရှိတယ်။ သျှမ်းတွေလေးစားရတဲ့ ဂီတပညာရှင် အနုပညာရှင်တွေတက်ရောက်တယ်။ SSPP/SSA နာယက ဗိုလ်ချုပ်ကြီးဆေထင်က SSA ဖြစ်ပေါ်လာပုံအကြောင်းမိန့်ခွန်းပြောတယ်။ ဧည့်သည်တော်တွေက တိုက်ပွဲတွေရပ်တန့်နိုင်ရေး စည်းလုံးညီညွတ်ရေးအတွက်ပြောကြတယ်။ စစ်သင်တန်းကျောင်းက တပ်သားတွေ စစ်ရေးပြအခမ်းအနားရှိတယ်။” – ဟုအခမ်းအနားတက်ရောက်သူ စိုင်းမိဏ်း ကပြောသည်။

မနက်ပိုင်းအခမ်းအနားတွင် SSPP/SSA အတွင်း လုပ်သက် ၂၅ နှစ်ကျော်သည့် ကေဒါ တပ်သားများအား ဂုဏ်ပြုလွှာနှင့် ဆုချီးမြင့်ခဲ့ ကြောင်းလည်းသိရသည်။

ညနေပိုင်းအခမ်းအနားတွင် သံဃာနှင့်လူထု တွေ့ဆုံပွဲတွင်မူ တက်ရောက်သူ ၃၀၀ ကျော်ရှိပြီး ဖွဲ့စည်းပုံမူဝါဒနှင့်ပတ်သက်ပြီး ဆွေးနွေးခဲ့ကြကြောင်း ၊ တိုက်ပွဲများလုံးဝရပ်တန့်နိုင်ရေး ပဋိပက္ခနယ်မြေမှ ၂ ဖက်တပ်များ တပ်ဆုတ်နေပြီဖြစ်ကြောင်း SSPP ပြောခွင့်ရ ဒုတိယဗိုလ်မှူးကြီး စိုင်းဆုကပြောသည်။

“သီပေါမြို့နယ် နားမခေါ်အုပ်စုမှာ ၄-၅ လအကြာ ဖြစ်ပွါးခဲ့တဲ့တိုက်ပွဲတွေ လုံးဝရပ်တန့်နိုင်ရေးအတွက် SSPP အနေနဲ့ ဧပြီလ ၁၉ ရက်နေ့ကတည်း တပ်ဆုတ်ခွါခဲ့ကြပြီ။ RCSS တပ်တွေကလည်း ဧပြီလ ၂၄ ရက်နေ့အထိ တပ်ဆုတ်ခွါနေဆဲဖြစ်တယ်” ဟု ဒုတိယဗိုလ်မှူးကြီး စိုင်းဆု ကပြောကြောင်းသိရသည်။

ယခုနှစ်ဆန်းပိုင်းက သီပေါမြို့နယ် အတွင်း RCSS နှင့် SSPP တို့ တိုက်ပွဲများဖြစ်ပွါးမှုကြောင့်ဒေသခံလူထု ထောင်နှင့်ချီ နေရပ်မှစွန့်ခွါထွက်ပြေးခဲ့ရသည်။

SSPP နှင့် သံဃာတော်၊ လူထုတွေ့ဆုံပွဲတွင် နိုင်ငံရေး မူဝါဒ စစ်ရေးမူဝါဒနှင့် တပ်သားသစ်ကောက်ယူမှုမူ ၀ါဒများနှင့်ပတ်သက်ပြီး သံဃာတော်များကမေးမြန်းရာ SSPP က ၄င်း၏ ဖွဲ့စည်းအုပ်ချုပ်ပုံ မူဝါဒတွင် ကဏ္ဍ ၄ ခုရှိကြောင်း၊ သာသနာပိုင်းဆိုင်ရာ၊ အုပ်ချုပ်ရေးပိုင်းဆိုင်ရာ လယ်ယာစိုက်ပျိုးရေးနှင့် လူငယ်ဖွံ့ဖြိုးရေးဆိုင်ရာ စသည်တို့ဖြစ်ကြောင်းရှင်းလင်းပြောကြားခဲ့ပြီး တက်ရောက်လာသော လူထုအား SSPP ၏ မူဝါဒစာအုပ်ပေးဝေခဲ့ကြောင်းလည်းသိရသည်။

ညပိုင်းတွင်မူ နာမည်ကြီးသျှမ်းအဆိုတော်များ တေးသံရှင်များက တေးသီချင်းများဖြင့်သီဆိုဖျော်ဖြေပွဲရှိ ကြောင်းလည်းသိရပါသည်။

RCSS နှင့် SSPP တို့ ၂ ဖွဲ့ကြား တိုက်ပွဲများရပ်တန့်နိုင်ရေးအတွက် မိုင်းဖုန်းဆရာတော် ဦးဉာဏသံဝရ (ခူးဝါးဝန်းစုမ့်)အား အမှူးပြုသည့် ဆရာတော် သံဃာတော်များက ကြားဝင်စေ့စပ်ညှိနှိုင်းပေးမှုကြောင့် မတ်လနှောင်းပိုင်းကတည်းက ပစ်ခတ်မှုများ ရပ်စဲသွားကြပြီး တိုက်ပွဲတွေလုံးဝ ရပ်စဲနိုင်ရေးအတွက် လက်ရှိတွင်လည်း တပ်များ တပ်ဆုတ်နေကြောင်းသိရပါသည်။