SSA သျှမ်းပြည်တပ်မတော် တည်ထောင်ခြင်း ၅၅ နှစ်မြောက် အထိမ်းအမှတ် အခမ်းအနားသို့ ပေးပို့သော
သျှမ်းပြည်ပြန်လည်ထူထောင်ရေးကောင်စီ / သျှမ်းပြည်တပ်မတော် RCSS/SSA ၏ သဝဏ်လွှာတွင် သံဃာတော်နှင့် ပြည်သူလူထုတို့ မျှော်မှန်းထားသည့်အတိုင်း တပ်ဖွဲ့ ၂ ဖွဲ့ကြားက ညီညွတ်ရေးကို အတူတကွ လုပ်ဆောင်သွားမည်ဖြစ် ကြောင်း ပါရှိသည်။
သျှမ်းပြည်ပြန်လည်ထူထောင်ရေးကောင်စီ / သျှမ်းပြည်တပ်မတော် RCSS/SSA ၏ သဝဏ်လွှ
အဆိုပါ သဝဏ်လွှာမှာ အချက် ၃ ချက် ပါရှိပြီး တတိယအချက်တွင် သျှမ်းပြည်ညီညွတ်ရေးကိစ္စ ဖက်ဒရယ် ကိစ္စ၊ သံဃာတော် နှင့် ပြည်သူလူထုတို့ မျှော်မှန်းနေတဲ့ ရည်မှန်းချက် ပန်းတိုင်ကို နှစ်ဦးနှစ်ဖက်ကြား အမြန်ဆုံး တည်ဆောက်သွားမည်ဖြစ်ကြောင်း RCSS/SSA ၏ အတွင်းရေးမှူး (၂) ဗိုလ်မှူး စိုင်းငင်း က ပြောသည်။
“တတိယအချက်မှာ ပါရှိတဲ့ သျှမ်းပြည်ညီညွတ်ရေး ကိစ္စတွေကော တပ်၂ ဖွဲ့ကြား အချင်းချင်းအပြန်အလှန်
ကူညီထောက်ပ့ံတဲ့ကိစ္စတွေကော ဖွံ့ဖြိုးရး ကိစ္စတွေ နောက်ပြီး ဖက်ဒရယ်ပြည်ထောင်စု တည်ဆောက်တဲ့နေရာမှာ လက်တွဲပူးပေါင်းဆောင်ရွက်သွားမယ် ဆိုတဲ့အချက်ပါတယ် နောက်တစ်ချက်က သံဃာတော်တွေ ပြည်သူလူထုတွေ မျှော်မှန်းလိုလားနေတဲ့ ကျနော်တို့ ရည်မှန်းချက်ပန်းတိုင်ကို ရောက်အောင် ကျနော်တို့ နှစ်ဦးနှစ်ဖက်ကြား အမြန်ဆုံး တည်ဆောက်သွားမယ်ဆိုတဲ့ သတင်းစကား ပါးလိုက်တဲ့ အနေအထားဖြစ်တယ်” ဟု RCSS/SSA ၏ အတွင်းရေးမှူး ၂ ဗိုလ်မှူးကြီး စိုင်းငင်း ကပြောသည်။
တိုက်ပွဲများရပ်တန့်စေနိုင်ရေး သျှမ်းတပ် ၂ ဖက် တပ်ဆုတ်ထားပြီဖြစ်ကြောင်း သံဃာတော်နှင့်လူထုတို့တွေ့ဆုံစဉ် SSPP ပြောခွင့်ရ ဒုတိယဗိုလ်မှူးကြီး စိုင်းဆု ကပြောသည်။
၄င်းနှင့်ပတ်သက်ပြီး ဗိုလ်မှူးကြီး စိုင်းငင်းကလည်း “ အခမ်းအနားမှာ ပြောသွားသလိုပဲ တပ် ၂ တပ်ကတော့ လိုအပ်သလို အားလုံး ဆုတ်ခွာပြီး ဖြစ်ပါတယ်။ အဲ့လို ဆက်လက်ညှိနှိုင်းဆွေးနွေးမယ့်အနေအထားဖြစ်ပါတယ်။ ၂၀ ရက်နောက်ပိုင်းကစပြီး ၂ ဖွဲ့ကြားက ထိတွေ့မှုတွေ မရှိတော့ဘူး နှစ်ဖက်စလုံးကလဲ အပစ်ရပ်ထားခြင်းဖြစ်ပါတယ်” ဟုပြောသည်။
ယခုနှစ်ဆန်းပိုင်းက SSPP/SSA နှင့် RCSS/SSA တို့သည် နယ်မြေအငြင်းပွားသည့် ကိစ္စနှင့်ပတ်သက်ပြီးတပ်ဖွဲ့ ၂ ဖွဲ့ကြား တိုက်ပွဲ ဖြစ်ပွားခဲ့ရာ ဒေသခံလူထု ထောင်ချီနေရပ်က စွန့်ခွါစစ်ဘေးရှောင်ခဲ့ရပါသည်။ သို့သော်လက်ရှိတွင်မူ ဒေသတွင်းအခြေအနေငြိမ်သက်ပြီဖြစ်တာကြောင့် သျှမ်းပြည်မြောက်ပိုင်းတွင် စစ်ဘေးရှောင်များမရှိတော့ကြောင်း UNOCHA ကလည်းကြေငြာချက်ထုတ်ပြန်ပါသည်။
ဧပြီ ၂၄ ရက်နေ့တွင်ကျရောက်သော သျှမ်းပြည်တပ်မတော် SSA တည်ထောင်ခြင်း ၅၅ နှစ်ပြည့်အခမ်းအနားကို SSPP/SSA ဌာနချုပ် ၀မ့်ဟိုင်းတွင် ကျင်းပခဲ့ပါသည်။
