သျှမ်းပြည်မြောက်ပိုင်း ကျောက်မဲမြို့ ရွှေကျင်ကျောင်းတိုက် ကျောင်းထိုင်ဆရာတော်အား အမည်မသိ သေနတ်သမား ၂ ဦးက ၀င်ရောက်ပစ်ခတ်မှုကြောင့် ပျံလွန်တော်မူသွားကြောင်းသိရသည်။

အောက်တိုဘာလ ၅ ရက် ယနေ့ညနေ ၆ နာရီခွဲအချိန် စာသင်သားကိုရင်ငယ်လေးများ ဘုရာဝတ်ပြုရှိခိုးရန်ပြင်ဆင်နေချိန် ဆိုင်ကယ်စီး သေနတ်သမား ၂ ဦးက ကျောင်းသို့ ၀င်ရောက်လာပြီး ဘုရားခန်းဝင်မည့် ဆရာတော်အား ပစ်ခတ်သဖြင့် ကျည် ၇ ချက်ထိမှန်ကာဆရာတော်ပျံလွန်တော်မူခဲ့ကြောင်း သိရသည်။

ဆရာတော်အား ကျောက်မဲမြို့ဆေးရုံသို့ပို့ဆောင်ခဲ့သည့် တပည့်ဒကာတဦးက – “သေနတ်သမားကို မသိရပါဘူးခင်ဗျ။ သူတို့ပစ်ခတ်ပြီးထွက်သွားတော့ ရွာသားတွေ လိုက်သေးတယ်သူတို့နောက်ကို။ သေနတ်သမားက ၂ ယောက်။ ဆိုင်ကယ်နဲ့လာတာ။ ဆောက်လုပ်ရေးကုန်းဘက်ကတက်လာတာလို့ပြောတယ်။ အားလုံးက ဘုရားရှိခိုးနေချိန်ဆိုတော့ သူတို့လာတာကိုသတိမထားမိကြဘူး။ မမြင်လိုက်ကြဘူးလေ။ ” – ဟု သျှမ်းသံတော်ဆင့်အားပြောပြသည်။

ပစ်သတ်ခံရသော ရွှေကျင်ကျောင်းတိုက်ခေါ် ကျောင်းယွက် ကျောင်းထိုင်ဆရာတော်မှာ ဆရာတော်ဦးကလျာဏ ၀ံသ ဟုနာမ တော်ရပြီး ဒေသခံများကမူ ကျောင်းယွက်ဆရာတော်ဟု ခေါ်ဆိုကြောင်း၊ သက်တော် ၄၉ ကျော် ၀ါတော်မှာ ၂၀ ကျော်ရှိကြောင်း၊ အဆိုပါကျောင်းတိုက်တွင် စာသင်သားကိုရင်ငယ် ၂၀၀ ကျော်ရှိကြောင်းသိရသည်။

လက်ရှိတွင် သေနတ်သမားအားမဖမ်းမိသေးကြောင်းနှင့်မည်သူ၊ မည်သည့်အဖွဲ့မှန်းလည်းမသိရသေးကြောင်း ဆိုပါသည်။

“ကျနော်တို့ဆရာတော်က စာအရမ်းတော်တယ်။ ရပ်ရွာသားတွေလည်း ဆရာတော်ကို အရမ်းအားကိုးအားထားပြုတယ်။ ယုံကြည်လေးစားရတယ်။ စာသင်သား ကိုရင်ငယ်တွေအတွက် လည်း အရမ်းကိုကြိုးစား တယ်။ ဘယ်သူနဲ့မှ ဘယ်ဒကာနဲ့မှ ရန်ငြိုးရန်စ မရှိခဲ့ဖူးပါဘူး။ အခုဆိုရင်ဆရာတော်ကဦးဆောင်ပြီးတော့ ၄ ထပ်ကျောင်းဆောင်ကြီးကို တည်ဆောက်နေတာ မပြီးသေးဘူး။ ကျနော်တို့ဆရာတော်ကို အရမ်းနှမျောမိပါတယ်။ လူဆိုးတွေပစ်လိုက်တဲ့ ကျည်ဆံက ဆရာတော်ရဲ့ ရင်ဘတ်တွေ ခြေတွေလက်တွေမှာဝင်သွားတာ။ ပြောမယ်ဆိုရင် ကျနော်တို့ကျောင်းက ရဲစခန်းနဲ့လည်းမဝေးဘူး။ ”- ဟု ကျောက်မဲမြို့ ရပ်ကွက် ရ နေ ဆရာတော်၏ ရုပ်ကလပ် ပြန်လည်သယ်ယူလာရေးအတွက် ဆေးရုံသို့ရောက်ရှိနေသည့် တပည့်ဒကာတဦးကလည်း ပြောသည်။

ရွှေကျင်ကျောင်းတိုက်ခေါ် ကျောင်းယွက် ကျောင်းသည် ကျောက်မဲမြို့ ရပ်ကွက် ၇ ၊ ရထားဘူတာအနီးတွင် တည်ရှိပြီး ရဲစခန်းနှင့်လည်း မဝေးကြောင်းသိရသည်။

စက်တင်ဘာလ ၁၄ ရက်နေ့က အဆိုပါ ကျောင်းယွက် ဘုန်းကြီးကျောင်းတွင် သျှမ်းပြည်အနာဂတ်နိုင်ငံရေး၊ လက်ရှိကြုံတွေ့နေရသော သျှမ်းတပ် ၂ ခု ပေါင်းစည်းရေးတွင်ကြုံတွေ့နေရသော ပြသနာများနှင့်ပတ်သက်ပြီး ကျောက်မဲဒေသခံ ဆရာတော်သံဃာတော်နှင့်တပည့်ဒကာများ လူမှုအခြေပြုအဖွဲ့အစည်းများ စုစုပေါင်း ၂၀၀ ကျော်တွေ့ဆုံကာ အချက် ၄ ချက်ပါသည့်ကြေငြာချက်တစောင်ထုတ်ပြန်ခဲ့သည်။