လာမည့်အောက်တိုဘာလ ၁၅ ရက်နေ့တွင်ကျရောက်မည့် တနိုင်ငံလုံးပစ်ခတ်တိုက်ခိုက်မှုရပ်စဲရေး သဘောတူစာချုပ်လက်မှတ်ရေးထိုးခြင်း ၃ နှစ်ပြည့်အခမ်းအနား ထိပ်သီးခေါင်းဆောင်များ တွေ့ဆုံဆွေးနွေးမည်ဖြစ်ကြောင်းသိရသည်။

ငြိမ်းချမ်းရေးလုပ်ငန်းစဉ်တလျှောက်တွင်ပါ၀င်လာခဲ့သည့် ပြည်ထောင်စုအင်စတီကျုမှ ဒါရိုက်တာ ဦးခွန်စိုင်းက – အောက်တိုဘာ ၁ ရက်နဲ့ ၂ ရက်နေ့တုန်းက အစိုးရနဲ့ တိုင်းရင်းသား ဘက်က ကိုယ်စားလှယ် တဖက် ရ ဦးစီ NRPC မှာတွေ့ဆုံတယ်။ အဲဒီအစည်းအဝေးကနေ ဒီ ၃ နှစ်ပြည့်မှာ ထိပ်သီး ၁၀+၁၀ လုပ်ဖို့ ဆုံးဖြတ်တယ်။ တဖက် ၁၀ ယောက်ပေါ့။ အဲဒီမှာ ခေါင်းစဉ်ကြီး ၅ ခုဆွေးနွေးမယ် ။ အောက်တိုဘာ ၁၅ ကနေ ၁၇ အထိ တွေ့ဆုံမယ်လို့ ကြားသိရတယ်- ဟု သျှမ်းသံတော်ဆင့်အားပြောပြသည်။

ခေါင်းစဉ်ကြီး ၅ ခုမှာ Package Deal ၊ Decision Making ၊ All Inclusive ၊ Time ၊ Frame Work စသည်တို့ဖြစ်ကြောင်းသိရသည်။

သွားရောက်ဆွေးနွေးမည့်အစိုးရဘက်မှအကြီးအကဲများမှာ နိုင်ငံတော်အတိုင်အပင်ခံပုဂ္ဂိုလ် ဒေါ်အောင်ဆန်းစုကြည်၊ တပ်မတော်အကြီးအကဲ ဗိုလ်ချုပ်မှူးကြီး မင်းအောင်လှိုင် ဒုတိယကာကွယ်ရေး ဦးစီးချုပ် ဗိုလ်ချုပ်ကြီးစိုးဝင်း ၊ လွှတ်တော် ကိုယ်စားလှယ်အဖြစ် ဦးအောင်ကြည်မြင့် နှင့် ဦးအောင်စိုး တို့ပါ၀င်သည့်အဖွဲ့ဖြစ်ကြောင်း နိုင်ငံရေးပါတီများအသိုင်းအဝိုင်းများထံမှသိရသည်။

သို့သော် တိုင်းရင်းသားလက်နက်ကိုင်တပ်ဖွဲ့ဘက်တွင်မူ တက်ရောက်မည့်ပုဂ္ဂိုလ်များစာရင်းမသိရသေးပေ။
အောက်တိုဘာ ၁၅ ကနေ ၁၇ အထိ အစည်းအဝေးကျင်းပမည့်နေရာမှာ ပုပ္ပါးတောင်အနီးတွင်ဖြစ်ကြောင်းလည်း ကြားသိရပါသည်။