NCA စာချုပ် လက်မှတ်ရေးထိုးခြင်း ၁၀ နှစ်ပြည့် အခမ်းအနား ပူးတွဲကျင်းပရေးအတွက် အပစ်ရပ် တိုင်းရင်းသားလက်နက်ကိုင် (၇)ဖွဲ့တို့၏ 7 EAO Alliance မဟာမိတ်အဖွဲ့နှင့် စစ်ကော်မရှင်၏ NSPNC တို့ နေပြည်တော်၌ တွေ့ဆုံဆွေးနွေးနေကြောင်း စုံစမ်းသိရသည်။

ယနေ့ (ဩဂုတ်လ ၂၂ ရက်) နံနက်ပိုင်းမှ စတင်ပြီး နေပြည်တော်၌ စစ်ကော်မရှင် ပြန်လည်ဖွဲ့စည်းထားသည့် အမျိုးသားစည်းလုံးညီညွတ်ရေးနှင့် ငြိမ်းချမ်းရေးဖော်ဆောင်မှု ညှိနှိုင်းရေးကော်မတီ (NSPNC) ကိုယ်စားလှယ်များနှင့် 7 EAO Alliance မဟာမိတ်အဖွဲ့ ကိုယ်စားလှယ်များ တွေ့ဆုံပြီး NCA စာချုပ် လက်မှတ်ရေးထိုးခြင်း ၁၀ နှစ်ပြည့် အခမ်းအနား ပူးတွဲကျင်းပရေးအတွက် ဆွေးနွေးနေကြောင်း သိရသည်။

“မနေ့က နေပြည်တော်ရောက်ပြီး မနေ့ညပိုင်းမှာ NSPNC နဲ့ ဘယ်လိုဆွေးနွေးကြမလဲဆိုတာ စည်းဝေးညှိနှိုင်းကြတယ်၊ ဒီမနက်တော့ နေပြည်တော်မှာ တွေ့နေတယ်။ NSPNC ကို စစ်ကော်မရှင်က ဖျက်သိမ်းလိုက်ပြီ ဆိုပေမယ့် အသစ်ပြန်ဖွဲ့ထားတယ်။ အခုက ၁၀ နှစ်ပြည့်ပွဲမလို့ ခမ်းခမ်းနားနား လုပ်မယ်လို့ ပြောနေကြတာ”ဟု 7 EAO Alliance နှင့် နီးစပ်သည့် ဝါရင့် တော်လှန်ရေးရဲဘော်တစ်ဦးက သျှမ်းသံတော်ဆင့်ကို ပြောသည်။

အဆိုပါ အစည်းအဝေးသို့ 7 EAO Alliance မဟာမိတ်အဖွဲ့ဝင် ကိုယ်စားလှယ်များဘက်မှ RCSS အတွင်းရေးမှူး(၁) ဗိုလ်မှူးကြီးစိုင်းငင်း၊ KNU/KNLA (PC) မှ ဗိုလ်မှူးကြီးစောကျော်ညွန့်၊ NMSP ဗဟိုအမှုဆောင် နိုင်အောင်မငေး နှင့် ဦးမျိုးဝင်း စသူတို့ လူကိုယ်တိုင် တက်ရောက်နေသည်။

ယနေ့အစည်းအဝေး မတိုင်မီ ဩဂုတ်လ (၁၅) ရက်ကလည်း စစ်ကော်မရှင် ပြန်လည်ဖွဲ့စည်းထားသည့် NSPNC ကိုယ်စားလှယ်များနှင့် 7 EAO Alliance မဟာမိတ်အဖွဲ့ ကိုယ်စားလှယ်များ အွန်လိုင်းမှတဆင့် တွေ့ဆုံဆွေးနွေးခဲ့ကြောင်း သိရသည်။

“၇ ဖွဲ့ဘက်ကတော့ နှစ်ဘက်သေချာဆွေးနွေးညှိနှိုင်းပြီး အတည်ပြုလို့ရမှ ပွဲလုပ်ဖို့ ပြောတာရှိတယ်။ ဟိုဘက်က သူတို့လုပ်ချင်သလိုလုပ် ပြောချင်သလိုပြောပြီး EAO ဘက်က ဧည့်သည်လိုပဲ ပွဲတက်ရမယ်ဆိုရင်တော့ ခေါင်းဆောင်တွေ မတက်ဖို့ များတယ် အဲ့လိုဆိုတော့ စောင့်ကြည့်ရဦးမှာပေါ့”ဟု အဆိုပါ ဝါရင့်တော်လှန်ရေးရဲဘော်က သျှမ်းသံတော်ဆင့်ကို ဆက်ပြောသည်။

လာမည့် အောက်တိုဘာလ (၁၅) ရက်တွင် ကျရောက်မည့် တစ်နိုင်ငံလုံး ပစ်ခတ်တိုက်ခိုက်မှုရပ်စဲရေး သဘောတူစာချုပ် NCA လက်မှတ်ရေးထိုးခြင်း (၁၀) နှစ်ပြည့် အခမ်းအနားကို RCSS ဥက္ကဋ္ဌ ဗိုလ်ချုပ်ကြီးရွက်စစ်နှင့် KNU ဥက္ကဋ္ဌဟောင်း စောမူတူးစေဖိုးတို့ အပါအဝင် တိုင်းရင်းသားလက်နက်ကိုင်ခေါင်းဆောင်များ လူကိုယ်တိုင် တက်ရောက်နိုင်ရန် ဖိတ်ကြားသွားရန်ရှိကြောင်း ဆိုသည်။

ပြီးခဲ့သည့် ဩဂုတ်လ (၆) ရက်တွင် အွန်လိုင်းမှတဆင့် ပြုလုပ်ခဲ့သည့် 7 EAO Alliance မဟာမိတ်အဖွဲ့၏ ဦးဆောင်အဖွဲ့ အစည်းအဝေးတွင် NCA လက်မှတ်ရေးထိုးခြင်း (၁၀) နှစ်ပြည့် အခမ်းအနားကို Joint Ownership နှစ်ဦးနှစ်ဘက် ပိုင်ဆိုင်မှုအရ စစ်ကောင်စီအသွင်ပြောင်း စစ်ကော်မရှင်နှင့် ပူးတွဲကျင်းပရေးအတွက် ဆွေးနွေးခဲ့ကြကြောင်း ဗိုလ်မှူးကြီး ခွန်ဥက္ကာ က သျှမ်းသံတော်ဆင့်ကို ဩဂုတ် ၈ ရက်တွင် ပြောဆိုထားသည်။

ယမန်နှစ် ၂၀၂၄ တွင် NCA (၉)နှစ်မြောက် နှစ်ပတ်လည်နေ့ အခမ်းအနားကို စစ်ကောင်စီဘက်မှ အကျဉ်းရုံးသာ ပြုလုပ်ခဲ့သော်လည်း လာမည့် NCA (၁၀) နှစ်ပြည့် အခမ်းအနားကို အကြီးအကျယ် ကျင်းပပြုလုပ်ပြီး ငြိမ်းချမ်းရေးဖိုရမ် Peace Forum တစ်ခုလည်း ဆောင်ရွက်မည်ဖြစ်ကြောင်း ထိုစဉ်က NSPNC အတွင်းရေးမှူးဖြစ်သူ ဒုတိယဗိုလ်ချုပ်ကြီးမင်းနိုင်က ဇွန်လအတွင်း Peace Forum တွင် ပြောကြားခဲ့သည်။