လင်းခေးမြို့ နားလင်းဂူခေါ် ထမ့်ဖာလုံခူးဝါးဝန်းစုမ့်ဂူအား ဆရာတော်မွေးနေ့ပွဲမတိုင်မှီ အပြီးရှင်းလင်းရန် သံဃာတော်နှင့်လူထု ကြိုးပမ်းနေ

သျှမ်းပြည်တောင်ပိုင်းလင်းခေးမြို့နယ်အတွင်း မိုင်းဖုန်းဆရာတော်ဘုရားကြီး အဓိဌာန်အာရုံဖြင့် မြင်တော်မူသော နားလင်းရွာရှိ သဘာဝလှိုဏ်ဂူအား လင်းခေးမြို့နယ် ဆရာတော် သံဃာတော်များနှင့် ဒေသခံလူထုစုပေါင်းလုပ် အားဖြင့် ဆရာတော်မွေးနေ့ပွဲအမှီ အပြီးရှင်းလင်းပြုစုသွားမည်ဖြစ်ကြောင်း သိရသည်။

နတ်တော်လဆုတ် ၁ ရက်နေ့ ဒီဇင်ဘာလ ၄ ရက်နေ့ကစပြီး လင်းခေမြို့နယ် သာသနာ့မာန်အောင် ကမ္မဌာန်းတိုက် ကျောင်းထိုင်ဆရာတော် ဦးဝိစိတ္တသာရ၊ မဟာဝိဟာရ ကျောင်းကြီးကျောင်းတိုက် ကျောင်းထိုင်ဆရာတော်ဦးအိန္ဒာစာရ၊ ဆရာတော် ငေါ၀်းလိန်၊ နားကုန်းကျောင်းဆရာတော် ဦးကာလိန္ဒ အစရှိဆရာတော်များဦးစီးဦးဆောင်မှုဖြင့် မြို့မ အနောက်ရပ်ကွက်မှ ဦးစိုင်းမောင်က ဒေသတွင်းလူငယ်ထု ကိုဦးဆောင်ကာ ဂူအနီးတဝိုက် ခြုံနွယ်မြက်ပေါင်းများရှင်းလင်းခြင်း၊ ဂူအတွင်းအား ရှင်းလင်းခြင်းများ နေ့စဉ်ပြုလုပ်နေကြောင်းသိရသည်။

ရှင်းလင်းရေးတွင် ဒေသခံလူထုအား ဦးဆောင်ဦးရွက်ပြုသည့် ဦးစိုင်းမောင်က- “နတ်တော်လဆုတ် ၁ ရက်နေ့က ကျနော်ကိုယ်တိုင် နားလင်းရွာက အကြီးအကဲနဲ့ ရွာသားတချို့နဲ့အတူ ဂူကိုသွားကြည့်တယ်။ နမ့်စန်မြို့ပန်လျန်းဆိုင်က အကြီးအကဲ တွေလည်း လမ်းဖောက်ဖို့ မြေထိုးစက်တွေပို့လာတယ်။ တိုင်းမှူး ၊ ဗျူဟာမှူး၊ ခရိုင်မှူးတွေ အလှူငွေထည့်တယ်။ ၁၁ သိန်းပြည့်အောင် ဆိုပြီးတော့ ဆရာတော် သံဃာတော် ၃ ပါး နဲ့ ကျနော်စိုင်းမောင်က အလှူငွေတွေဖြည့်ပေးတယ်။ ကျန်တာတော့ လင်းခေးမြို့ခံတွေ ဒီဒေသတဝိုက်က ရွာသားတွေလာပြီးတော့ လုပ်အားလှူတယ်။ ဆွမ်းထမင်းဟင်းလှူတယ်။ နေ့တိုင်းဘဲ တောရှင်း သန့်ရှင်းရေးသွားလုပ်နေကြတယ်။ ဆရာတော်ရဲ့မွေးနေ့ မတိုင်ခင် အပြီးလုပ်ဖို့ကျနော်တို့ စီစဉ်ထားပါတယ်”- ဟု သျှမ်းသံတော်ဆင့်အားပြောပြသည်။

အဆိုပါဂူတည်ရှိရာအရပ်သည် ရွာနှင့်လည်း သိပ်မဝေးသကဲ့သို့ တရားကျင့်ကြံရန်အသင့်လျော်ဆုံးအရပ်ဖြစ်ပြီး အဆိုပါဂူအနီးတွင်လည်း ရေပူ ရေအေးထွက်ကြောင်း၊ ဒုတိယကမ္ဘာစစ်ကာလက ယန်းကလေး လူမျိုးများ စစ်ဘေးရှောင် နေထိုင်သည့်နေရာဖြစ်သောကြောင့် အဆိုပါဂူ၏မူရင်းအမည်သည် ကလေးဂူဟု အမည် တွင်ကြောင်း နားလင်းရွာခံ ရှေ့မှီ နောက်မှီ သက်ကြီးပိုင်းပြောပြချက်အရသိရသည်။

မိုင်းဖုန်းဆရာတော် ခူးဝါးဝန်းစုမ့်မှ ဂူအောင်းတရားကျင့်ကြံ ရန်နှင့် အနီးအဝေးမှ လူထုအား တရားဒေသနာတော်များဟောကြားပေးရန်အတွက် နေရာထိုင်ခင်းနှင့်ကျောင်းဆောင်များ လည်းဆောက်လုပ်သွားဖို့စီစဉ်ထားကြောင်း သံဃာတော်များက မိန့်တော်မူပါသည်။

ဂူရှင်းလင်းရာတွင် သံဃာတော်များနှင့်အတူ လိုက်ပါမှတ်တမ်းတင်သော လင်းခေးဒေသခံ လူငယ် စိုင်းစိုင်းက – “နားလင်းရွာကနေ ဂူဆီကိုလမ်းလျှောက်တက်ရင် တနာရီလောက်နီးပါးလမ်းလျှောက်ရတယ်။ ထမ့်ဖာလုံခူးဝါးဝန်းစုမ့် လို့နာမည်ပေးထားတယ်ဆရာတော်တွေက။ ဂူမရောက်ခင်မှာ ချောက်တခုရှိတယ်။ ဖာလုံချောက်လို့ခေါ်တယ်။ အဲ့မှာစိမ့်စမ်းရေ လေး စီးဆင်းတယ်။ ရေအေးချောင်း။ အဲ့ချောင်းလေးကူးဖို့ သစ်သားတံတားလေးလုပ်ထား တယ်အခု။ အဲ့တံတား ကနေနဲနဲထပ်တက်သွားရင် ဂူဆီရောက်တယ်။ ဂူအကြီးကြီးတော့မဟုတ်ဘူး။ ကျောက်အစွန်းက အမိုး သဖွယ်ဖြစ်နေတယ်။ အဲ့အငူအောက်မှာတရားထိုင်လို့ကောင်းတယ်။ လေသာတယ်။ ဂူကနေအထက်ကိုနဲနဲတက်သွားရင် သဘာဝရေနွေးထွက်တဲ့နေရာရှိတယ် ။ အဲ့ရေထွက်ကနေ ဖာလုံချောက်အတိုင်း စီးကျလာတာလေ။ ဆိုတော့တရားထိုင်ဖို့တရားကျင့်ဖို့ ကောင်းတဲ့နေရာတခုဖြစ် ပါတယ် ။” – ဟု ပြောသည်။

အဆိုပါဂူတည်ရှိရာ နားလင်းရွာသည် လင်းခေးမြို့တောင်ဘက် ၁၀ မိုင်ခန့်အကွာရှိ နမ့်တွန်ကျေးရွာအုပ်စု တွင်တည်ရှိပြီး ရေမြေသဘာဝ အထူးကောင်းမွန်သောအရပ်ဖြစ်ကြောင်းသိရသည်။

လွန်ခဲ့သော ၂၀၁၅ ခု လင်းခေးမြို့ သထုံမူလမင်းကွန်းကမ္မဌာန်းတိုက်၏ နှစ် ၅၀ ပြည့် သံဃာ့ညီလာခံပွဲသို့ မိုင်းဖုန်းဆရာတော်ဘုရားကြွချီ တရားဟောတော်မူစဉ် အဆိုပါနားလင်းရွာသို့ သွားရောက်တည်းခိုရာမှ အဓိဌာန်ဝင်ကာ ဉာဏ်တော်ဖြင့် ဂူအား မြင်ခဲ့ခြင်းဖြစ်ကြောင်း၊ထိုစဉ်ကတည်းက ဂူအားရှင်းလင်းပြုစုပေးရန် နားလင်းရွာသားများအား မှာကြားထားကြောင်း သို့သော်အကြောင့်အမျိုးမျိုးကြောင့် သွားရောက်ပြုစုနိုင်ခြင်းမရှိဘဲ ယခုမှသာ သွားရောက်ပြုစုနိုင်ခဲ့ကြောင်းလည်း ဦးစိုင်းမောင်က ပြောပြပါသည်။