သျှမ်းပြည်မြောက်ပိုင်းလားရှိုးမြို့နယ်အတွင်း အစိုးရတပ်အပါအဝင် လက်နက်ကိုင်တပ်များ လှုပ်ရှားသွားလာမှုများကြောင့် တိုက်ပွဲဖြစ်ပွါးမည်ကို လားရှိုးကျေးလက် ဒေသခံများစိုးရိမ်နေကြပါသည်။

လားရှိုးမြို့အရှေ့တောင်ဘက် ၂၆ မိုင်ခန့်ဝေးသော နမ့်ပေါင်အုပ်စုနှင့်နားနန်းအုပ်စုဘက်တွင် တအာင်းတပ်ဖွဲ့ TNLA နှင့် အစိုးရတပ်မတော်တို့ ဖြတ်သန်းသွားလာသည့်အပေါ်တိုက်ပွဲဖြစ်ပွားမည်ကိုဒေသခံများ ကြောက်လှန့်နေကြခြင်းဖြစ်ပါသည်။

“ပြီးခဲ့တဲ့၃-၄ ရက်က အင်အား ၁၀၀ ကျော် ရှိ ပလောင်စစ်သားတွေလာတယ်။ ရက်ပိုင်းခြားပြီး မြန်တပ် နဲ့ ပြည်သူ့စစ်တွေ စစ်ကား နဲ့ရောက်လာတယ် ။ ဆိုတော့ တိုက်ပွဲဖြစ်မှာကိုစိုးရိမ်နေကြတာ။ ပြောင်းချိုးချိန် လယ်ယာသီးနှံဆွတ်ချိန်ဖြစ်နေတော့လေ”- ဟု နမ့်ပေါင်ဒေသခံ စိုင်းအွမ်က ပြောသည်။

နမ့်ပေါင်ချောင်းအရှေ့ခြမ်းတွင် အင်အားအပြည့်တင်သည့်စစ်ကား ၂ စီးသည် ၀မ့်ပန်-နောင်လျန်- လွယ်မော်ဘက် တက်သွားပြီး နမ့်ပေါင်ချောင်းမြောက်ဘက်ခြမ်းတွင်လည်းအလားတူ စစ်ကားကြီး ၂ စီး ၀မ့်စေ့၊ မုံးပိုင်၊ တွန်းနေ၊နားမန်း ဘက်တို့တက်သွားကြောင်း၊ တအာင်းတပ်ဖွဲ့မှာမူ နမ့်ပေါင်ချောင်းမြောက်ဘက်ခြမ်း စယ့်ပေါင် ကွန်ဟျိုးဘက်တွင်လှုပ်ရှားနေကြောင်း နမ့်ပေါင်ဒေသခံကဆိုပါသည်။

ဒီဇင်ဘာ ၁၁ ရက် တနင်္လာနေ့က နားနန်းအုပ်စုဘက်တွင် လက်နက်ကြီးသံကြားရသဖြင့် နားနန်းဒေသခံများ နမ့်ပေါင်ဘက်သို့တိမ်းရှောင်လာကြကြောင်းလည်း စိုင်းအွမ်ကပြောသည်။

လားရှိုးခရိုင် အမျိုးသားလွှတ်တော်ကိုယ်စားလှယ်စိုင်းဝမ်းလျန်းခမ်းက – ငြိမ်းချမ်းရေးတည်ဆောက်နေချိန်မှာ ပစ်ခတ်တိုက်ခိုက်မှုတွေဖြစ်နေရင်လူထုကိုဘဲထိခိုက်မယ်။ ဒီနှစ် ရာသီဥတုမမှန်လို့ လယ်ယာထွက်ကုန်တွေမအောင်မြင်ဘူး။ တိုက်ပွဲတွေလာဖြစ်နေမယ်ဆိုရင် မိဘပြည်သူကိုထိခိုက်မယ်။ ဒါကြောင့်တိုက်ပွဲတွေမဖြစ်စေချင်ဘူး- ဟု ပြောသည်။

တအာင်းတပ်မတော်သည် ၀ တပ်ဖွဲ့ဦးဆောင်သောမြောက်ပိုင်းမဟာမိတ်တပ်ဖွဲ့ FPNCC တွင်ပါ၀င်ပြီး NCA ကိုလက်မခံဘဲ နည်းလမ်းအသစ်ဖြင့် နိုင်ငံရေးဆွေးနွေးလိုသည့်အဖွဲ့ဖြစ်ပါသည်။ အစိုးရ၏တပ်မတော်ဘက်ကလည်း TNLA အား အကြမ်းဖက်အဖွဲ့ဟုပြောဆိုကာ NCA လက်မှတ်ရေးထိုးရန်လက်မခံဘဲ လက်နက်ချရန်သာ ပြောဆိုနေပါသည်။