သျှမ်းအမျိုးသားအဆင့် နိုင်ငံရေးဆွေးနွေးပွဲ ကျင်းပနိုင်ရန်အတွက် သျှမ်းပြည်ညီညွှတ်ရေးကော်မတီ CSSU မှ သျှမ်းပြည်တောင်ပိုင်း တောင်ကြီးမြို့၌ ကြိုတင်ပြင်ဆင်သည့်အနေဖြင့် အလုပ်ရုံဆွေးနွေးပွဲ ပြုလုပ်နေကြောင်း သိရသည်။

“သျှမ်းအမျိုးသားအဆင့် နိုင်ငံရေးဆွေးနွေးပွဲကို လင်းခေးမြို့မှာ ကျင်းပဖို့ သူတို့ခွင့်ပြုတယ်။ အမျိုးသား အဆင့် မကျင်းပခင် အလုပ်ရုံဆွေးနွေးပွဲ ကျင်းပတယ်။ ဒီအလုပ်ဆွေးနွေးပွဲပြီးရင် ပြည်သူတွေနဲ့ ကွင်းဆင်း တွေ့ဆုံပြီး ပြည်သူ့အသံနားထောင်မယ်။ ဆန္ဒကောက်ယူမယ်။ ၁၆ နေရာပေါ့ ” ဟု RCSS/SSA ၏ ပြည် တွင်းပြောရေးဆိုခွင့်ရှိသူ ဒုတိယဗိုလ်မှူးကြီး စိုင်းဦး ကပြောသည်။

ဒီဇင်ဘာလ ၁၁ ရက်နေ့မှ ၁၅ ရက်နေ့ထိ ၅ ရက်အထိ ပြုလုပ်သွားမည့် အလုပ်ရုံဆွေးနွေးပွဲမှာ နိုင်ငံရေး ကဏ္႑၊ လုံခြုံရေးကဏ္႑၊ လူမှုရေးကဏ္႑၊ စီးပွားရေးကဏ္႑ နှင့် မြေယာနှင့်သဘာဝသယံဇာတကဏ္႑ ဆိုသည့် ခေါင်းစဉ်ကြီး ၅ ခုဖြင့် ကဏ္႑အလိုက် အဖွဲ့ ၅ ဖွဲ့ခွဲကာ ဆွေးနွေးနေကြောင်း RCSS/SSA ၏ ပြည်တွင်း ပြောရေးဆိုခွင့်ရှိသူ ဒုတိယဗိုလ်မှူးကြီး စိုင်းဦး ကပြောသည်။

“သျှမ်းအမျိုးသားအဆင့် နိုင်ငံရေးဆွေးနွေးပွဲအကြိုကို တောင်ကြီးမှာလုပ်ဖို့ စီစဉ်ထားတယ်။ လင်းခေးမှာ သျှမ်းအမျိုးသားအဆင့် နို်င်ငံရေးဆွေးနွေးပွဲ လုပ်မယ်။ ဂျန္နဝါရီလအတွင်းလောက်မှာဖြစ်မယ်” ဟု ဒုတိယ ဗိုလ်မှူးကြီး စိုင်းဦး ကပြောသည်။

သျှမ်းအမျိုးသားအဆင့် နိုင်ငံရေးဆွေးနွေးပွဲကို လင်းခေးမြို့၌ ကျင်းပရန် ၆ ကြိမ်မြောက် တစ်နိုင်ငံလုံး ပစ်ခတ်တိုက်ခိုက်မှုရပ်စဲရေး သဘောတူစာချုပ် အကောင်အထည်ဖော်မှုဆိုင်ရာ ညှိနှိုင်းအစည်းအဝေး (JICM)တွင် သဘောတူဆုံးဖြတ်ခဲ့ကြသည်။

သျှမ်းပြည်ညီညွှတ်ရေးကော်မတီ (CSSU) အဖွဲ့သည် သျှမ်းပြည်တပ်မတော် RCSS/SSA ၊ သျှမ်းတိုင်းရင်းသားများ ဒီမိုကရက်တစ်ပါတီ (SNDP) ၊ သျှမ်းပြည်ပူးပေါင်းဆောင်ရွက်ရေးကော်မတီ SSJAC ၊ မင်္ဂလာစည်တော်ပါတီ ESSDDP ၊ သျှမ်းလူငယ်ကွန်ယက် TYN ၊ လူမှုအဖွဲ့အစည်းများနှင့် ဖွဲ့စည်းထားသည်။ ၂၀၁၇-၂၀၁၈ ခုနှစ်အတွက် သျှမ်းပြည်ပြန်လည်ထူထောင်ရေးကောင်စီ/ သျှမ်းပြည်တပ်မတော် RCSS/SSA ဥက္ကဌ ဗိုလ်ချုပ်ကြီး ယွက်စစ်က သျှမ်းပြည်ညီညွှတ်ရေးကော်မတီ (CSSU) ၏ ဥက္ကဌ အဖြစ် တာဝန်ယူထားသည်။