သျှမ်းပြည်မြောက်ပိုင်း နမ္မတူမြို့ရောက် မိုင်းရင်အုပ်စုမှ ကျောင်းဆရာ ဆရာမ ၃၀ ကျော်မှာ ဒေသတွင်းအခြေအနေပြန်လည်ကောင်းမွန်လာပြီဖြစ်သဖြင့် နေရပ်သို့ပြန်သွားကြပြီဖြစ်ကြောင်း သိရသည်။

ဒီဇင်ဘာလဆန်းပိုင်းက ဒေသတွင်း တအာင်းတပ်ဖွဲ့နှင့် SSPP/SSA တပ်ဖွဲ့တို့အကြား၊ တအာင်းတပ်ဖွဲ့နှင့်အစိုးရတပ်မတော်ကြား စစ်ရေးတင်းမာမှုများကြောင်း လုံခြုံရေးအတွက် နမ္မတူမြို့ပေါ်သို့တိမ်းရှောင်ခိုလှုံနေကြသော ဆရာ ဆရာမ ၃၁ ဦးမှာ ဒီဇင်ဘာလ ၁၁ ရက် ယနေ့မနက်ပိုင်းက မိုင်းရင်ရှိ သက်ဆိုင်ရာကျောင်းများသို့ အသီးသီးပြန်သွားကြပြီဖြစ်ကြောင်း နမ္မတူမြို့ စစ်ဘေးရှောင်ကူညီရေးအဖွဲ့က သျှမ်းသံတော်ဆင့်အားပြောပြသည်။

“ပြီးခဲ့တဲ့ ၅ ရက်နေ့နဲ့ ၆ ရက်နေ့က မိုင်းရင်မှာဖြစ်ပွါးတဲ့ SSPP နဲ့ TNLA တိုက်ပွဲကြောင့် သူတို့ နမ္မတူမြို့ကိုရောက်လာတာ။ အခုတော့ အဲ့မှာ အခြေအနေကငြိမ်နေပြီဆိုတော့ သူတို့ပြန်သွားကြပြီ။ ကျောင်း ၉ ခု ဆရာ ဆရာမတွေဖြစ်တယ်လို့ပြောတယ်။ သူတို့လာတော့ ကျောင်းတွေပိတ်ထားရတယ်ပြောတယ်။ ဒေသခံတွေတော့ ရောက်မလာကြဘူး။ ”- ဟု စစ်ဘေးရှောင်ကူညီရေးကော်မတီမှ စိုင်းဘဉာဏ်ကပြောသည်။

အဆိုပါ ဆရာ ဆရာမ များမှာ မိုင်းရင်အုပ်စုအတွင်းရှိ ၀ိန်းနန်ရွာ၊ ၀မ့်ဟော်နားရွာ၊ ၀မ့်နားလင်းရွာ၊ မန့်ပန်ရွာတို့ရှိ မူလတန်းကျောင်းမှ ဆရာ ဆရာမ များဖြစ်ကြကြောင်းသိရသည်။

“အခုက ပစ်ခတ်သံသာငြိမ်နေတာ။ ဒီဘက်မှာ အဖွဲ့အစုံရှိနေတော့ ပစ်ခတ်သံကအချိန်မရွေးပြန်ဖြစ်နိုင်တယ်လေ။ ရွာသားတွေ မတိမ်းရှောင်တာကတော့ ဒီချိန်က ခြံထွက်သီးနှံတွေရိတ်သိမ်းချိန်ဆိုတော့လေ။ပြီးတော့လဲ တိုက်ပွဲက ပြင်းပြင်းထန်ထန်ကြီးမဖြစ်လိုက်ရဘူး။ တည ဘဲဆိုတော့ ”- ဟု မိုင်းရင်ဒေသခံစိုင်းစိုင်းကပြောသည်။

မိုင်းရင်အုပ်စုသည် နမ္မတူမြို့၏အရှေ့မြောက်ဘက်အရပ်တွင်တည်ရှိပြီး နမ္မတူ သိန္နီလမ်းတွင်တည်ရှိပါသည်။ အစိုးရတပ်အပြင်၊ ကချင်လက်နက်ကိုင်တပ်ဖွဲ့၊ တအာင်းတပ်ဖွဲ့နှင့် သျှမ်းတပ်ဖွဲ့များသွားလာလှုပ်ရှားရာဒေသဖြစ်သဖြင့် စစ်ရေးအရ အထူးသတိထားနေရသည့်ဒေသဖြစ်ပါသည်။