သျှမ်းပြည်တောင်ပိုင်းလင်းခေးခရိုင် မိုင်းပန်မြို့နယ် သျှမ်းတိုင်းရင်းသားများဒီမိုကရေစီအဖွဲ့ချုပ် မြို့နယ်ဥက္ကဌ စိုင်းအုန်းကျော် အဆုတ်ကင်ဆာရောဂါဖြင့် ကွယ်လွန်သွားကြောင်းသိရသည်။

SNLD ပါတီစတင်တည်ထောင်စဉ် ၁၉၈၈ ခုနှစ်ကတည်းက မိုင်းပန်မြို့နယ်၏ ပါတီအတွင်းရေးမှူး တာဝန် ကိုထမ်းဆောင်လာခဲ့သူ စိုင်းအုန်းကျော် အသက် ၆၈ နှစ်သည် အဆုတ်ကင်ဆာရောဂါဖြင့် ဒီဇင်ဘာလ ၁၀ ရက်နေ့က မိုင်းပန်မြို့ ရွာသစ်ရပ်ကွက်ရှိနေအိမ်တွင် ကွယ်လွန်သွာခဲ့ခြင်းဖြစ်သည်။

ဦးလေးအုန်းကျော်က ရိုးသားကြိုးစားတဲ့သူဖြစ်တယ်။ တာဝန်ကို ကျေပွန်အောင်ထမ်းဆောင်တယ်။ ပါတီအရေးရော ရပ်ရွာလူထုအရေးရော အလေးအနက်ထားဆောင်ရွက်တယ်။ သူလိုလူ ဆုံးရှုံးရတဲ့အတွက် နှမြောမိတာအမှန်ပါဘဲ – ဟု မိုင်းပန်ဒေသခံ စိုင်းဆေတိုင်း ကပြောသည်။

စိုင်းအုန်းကျော်၏ ကျန်ရှိရုပ်အလောင်း ကို ဒီဇင်ဘာလ ၁၃ ရက်နေ့တွင် ဟွေမဖိန်းသုသာန်သို့ ပို့ဆောင်မီးသဂြိုဟ်မည်ဖြစ်ကြောင်းသိရသည်။

စိုင်းအုန်းကျော်သည် မိုင်းပန်မြို့ လုံးစလေးနန္ဒာနှင့် ဒေါ်ပါလှမြင့်တို့၏ သားသမီး ၅ ဦးအနက် အကြီးဆုံးသားဖြစ်သည်။

၁၉၄၇ ခုနှစ်ကတည်းက ရွာသစ်ကောင်စီအတွင်းအရေးမှူးအဖြစ်တာဝန်ထမ်းဆောင်လာခဲ့သူဖြစ်သည်။ ၁၉၈၈ ခုနှစ် SNLD ပါတီတည်ထောင်စဉ်က မြို့နယ်ပါတီအတွင်းရေးမှူးအဖြစ်ထမ်းဆောင်ခဲ့သည်။ နဝတ အစိုးရလက်ထက်က ဖိအားပေးခံရမှုကြောင့် ပါတီမှ နှုတ်ထွက်ခဲ့ပြီး ပါတီပြန်လည်မှတ်ပုံတင်ခဲ့သည့် ၂၀၁၄ ခုနှစ်တွင် ပါတီတွင်းပြန်ဝင်ကာ ပါတီလုပ်ငန်းများကို ကွယ်လွန်ချိန်အထိ လုပ်ဆောင်လာခဲ့သူတဦးဖြစ်ပါသည်။

လက်ရှိတွင် ဇနီးဒေါ်နန်းနွံနှင့် သားမီး ၅ ဦး မြေး ၅ ဦးကျန်ရစ်ခဲ့ပါသည်။