သို့- သျှမ်းသံတော်ဆင့် သတင်းဌာန

သက်ဆိုင်ရာအာဏာပိုင်များသိစေရန်ဖော်ပြပေးပါ။

သျှမ်းပြည်မြောက်ပိုင်း မူဆယ်မြို့မှာ ရှိတဲ့ လောင်းကစားရုံ ဂိမ်းဆိုင်တွေဟာ ကျနော်တို့ မျိုးဆက်သစ် လူငယ်တွေ အကျင့်စာရိတ္တ ပျက်ပြားစေတယ်လို့ ဒေသခံ တစ်ယောက်အနေနဲ့ တင်ပြချင်ပါတယ်။

မူဆယ်မြို့ဟာ တရုတ်နယ်စပ် နဲ့ ထိစပ်နေပြီး ဝင်ထွက် လွယ်ကူသလို လောင်းကစားရုံ၊ ဂိမ်းဆိုင်၊ မူးယစ်ဆေးဝါးတွေ များစွာ ရှိနေပါတယ်။ ဒီလို ဂိမ်းဆိုင်တွေ ၊ လောင်းကစားရုံတွေ များစွာရှိတဲ့အတွက် ဒေသခံ ပြည်သူတွေရဲ့ အကျင့်စာရိတ္တပျက်ပြားကြတယ်။ မိသားစုတွေ ပြိုကွဲ၊ စီးပွားရေးပျက်ကြတာတွေ အများအပြားရှိပါတယ်။ ဒါပေမယ့် ဒီကိစ္စနဲ့ ပတ်သက်ပြီး တာဝန်ရှိသူဘက်က ထိထိရောက်ရောက ်အရေးယူတာ မတွေ့ရပါဘူး။

နိုဝင်ဘာ ၂၄ ရက်နေ့ ၁၀ နာရီလောက်က သက်ဆိုင်ရာ ဌာန တာဝန်ရှိသူတွေ ပူးပေါင်းပြီး ဂိမ်းစက် ငါးမန်းစက် တွေ ဖမ်းဆီးပြီး မီးရှို့ဖျက်ဆီးခဲ့ပါတယ်။

ဒါပေမယ့် သက်ဆိုင်ရာ တာဝန်ရှိရဲတွေ ဂိမ်းစက်တွေ မီးရှို့တာဟာ အကြောင်းပြချက်တစ်ခုပဲ ဖြစ်ပါတယ်။ သူတို့ တကယ်ထိထိရောက်ရောက် အရေးယူတာမရှိဘူး၊ ဘယ်ဆိုင်က စက်ဘယ်နှစ်လုံးဖမ်းဆီးတယ်ဆိုတာလည်းမကြေငြာပါဘူး။ ကျနော်တို့ ကြားတာက ဂိမ်းဆိုင်ပိုင်ရှင်တွေဟာ တာဝန်ရှိသူတွေဆီကို ပိုက်ဆံပေးလာဘ်ထိုးကြတယ်လို့ ဆိုပါတယ်။

တာဝန်ရှိသူတွေကနေ ဂိမ်းဆိုင်တွေ အရေးယူ ဖမ်းဆီးတယ်ဆိုတဲ့သတင်းတွေဖြန့်ပေမယ့် ဂိမ်းဆိုင်တွေ လျှော့နည်းသွားတာတော့မတွေ့ရဘူး။ မူဆယ်မြို့ ဇွမ်ဇော်ရပ်ကွက်မှာဆိုရင် ဂိမ်းဆိုင်တွေ အများအပြားရှိပါတယ်။ ၁၀၅ မိုင်မှာလည်း များစွာရှိပါတယ်။ဒေသခံ ပြည်သူတွေဘက်က လူငယ်တွေ အကျင့်စာရိတ္တ ပျက်ပြားမှာ စိုးရိမ်ပူပန်နေကြပါတယ်။အာဏာပိုင်တွေဘက်က ထိရောက်စွာအရေးယူပေးဖို့နဲ့အမှန်တကယ်ရှင်းလင်းပေးဖို့ မူဆယ်လူထုတရပ်လုံးက တောင်းဆိုတိုက်တွန်းလိုကြောင်း မူဆယ်လူထုကိုယ်စား စာရေးသားပေးပို့လိုက်ပါတယ်။

မူဆယ်လူငယ်
စိုင်းသားငယ်