ဒီမိုကရေစီစနစ်သို့ပြောင်းလဲပြီဟုဆိုသော်လည်း တိုင်းရင်းသားဒေသများတွင် ဒေသခံအမျုုိးသမီးများအခွင့်အရေး ချိုးဖောက် ခံနေရသည့်ဘဝ မှာ ပြောင်းလဲမှုမရှိသေးကြောင်း တအာင်းအမျိုးသမီး မှတ်တမ်းနှင့်သုတေသနဌာနကပြောဆိုလိုက်ပါသည်။
လက်နက်ကိုင်တပ်ဖွဲ့များ၊အထူးသဖြင့် တပ်မတော်စစ်ကြောင်းလှုပ်ရှားရာဒေသတို့တွင် အမျိုးသမီးများဘဝ လုံခြုံမှုမရှိသေး ကြောင်းနှင့် အခွင့်အရေးချိုးဖောက်ခံရမှုများရှိနေသေးကြောင်း တအာင်းအမျိုးသမီး မှတ်တမ်းနှင့်သုတေသနဌာနတာဝန်ခံ လွေးပိုးကမေးခြိူဝ်းက သျှမ်းသံတော်ဆင့်အားပြောပြသည်။
“မြို့နဲ့နီးတဲ့နေရာ သွားရလာရလွယ်ကူတဲ့နေရာဆိုရင် တိုးတက်ပြောင်းလဲမှုက နဲနဲပါးပါးတွေ့ရတယ်ဆို ပေမယ့် မြို့နဲ့ အလှမ်းဝေးတဲ့ကျေးလက်တောရွာတွေဆိုရင် အမျိုးသမီးတွေဟာ ကြောက်ရွံ့နေတာတွေ၊ ရိုးရာ ယဉ်ကျေးမှုအရ ရှေးရိုးစွဲ အယူတွေရှိနေသေးတာကြောင့် ပြောဆိုအားပေးမှုကိုလက်ခံဖို့မလွယ်ဘူး ။ ဒါတွေ ရှိနေသေးတဲ့အတွက် အခွင့်အရေး ချိုးဖောက်ခံရတာ၊ အဓမ္မပြုကျင့်ခံရတာတွေလည်း အများကြီး ရှိနေ တယ်။ မပြောရဲ မတိုင်ရဲတာကြောင့် သတင်းတွေ မကြားမိတာတွေအများကြီးရှိနေပါသေးတယ်။ ဒါကြောင့် ကျေးလက်တွေမှာဆိုရင်တော့ ဘာမှပြောင်းလဲမှုမရှိသေးဘူး လို့မြင်ပါတယ်။ ”
ပြီးခဲ့သည့် နို၀င်ဘာလ ၂၄ ရက်နေ့က လားရှိုးမြို့နယ် မိုင်းယော်တိုက်နယ် ပန်ဝိုးလျံရွာတွင် ကျေးလက်အမျိုးသမီး ၄ ဦးအား အစိုးရတပ်မတော်၏ ခမရ ၃၆၄ တပ်ရင်းမှ ဗိုလ်မှူး သန့်ဇင်ကျော် ဦးဆောင်သည့်အဖွဲ့မှ တပ်သား ၄ ဦး က ဗလက္ကာရပြုကျင့်ရန် ဆွဲရမ်းမှုပြုခဲ့ကြောင်း၊ လက်ရှိတွင် ဆွဲရမ်းခံရသူအမျိုးသမီး ၄ ဦးအနက်တချို့မှာ ကြောက်လှန့်တုန်လှုပ်ကာ နေရပ်မှ တိမ်းရှောင်နေမှုလည်း ရှိကြောင်း တအာင်းအမျိုးသမီးအဖွဲ့ မှတ်တမ်းနှင့် သုတေသနဌာနနှင့် တအာင်းကျောင်းသားများသမဂ္ဂက အစီရင်ခံစာတစောင် ထုတ်ပြန်ထားသည်။
တအာင်းအမျိုးသမီးများ ဆွဲရမ်းခံရမှုနှင့်ပတ်သက်ပြီး တအာင်းအမျိုးသမီးအဖွဲ့က ကွင်းဆင်းကာ တွေ့ဆုံမေးမြန်း ရန်ကြိုးပမ်းခဲ့သော်လည်း ကျေးလက်အကြီးအကဲများက တပ်မတော်သားတို့၏ ပြန်လည် ရန်ပြုမှုကို ကြောက်ရွံ့သောကြောင့် ၄င်းကိစ္စကို မပြောဝံ့ဘဲ ပြဿနာမရှိပါဟု ဖြေဆိုကြောင်း အဆိုပါအစီရင်ခံစာတွင်ဖော်ပြထားသည်။
“အခုလိုစစ်တပ်သွားတဲ့လမ်းကြောင်းက ရွာကအမျိုးသမီးတွေကို အနိုင်ကျင့်တယ်ပြုကျင့်တယ်ဆိုတာတွေမျိုးခုခေတ်မှာ မရှိသင့်တော့ဘူး။ တကယ်လို့ ပေါ်လစီရှိလို့ ပြုကျင့်တယ်ဆိုရင်လည်း ပေါ်လစီတွေကိုဖျက်သိမ်းသင့်တယ် ။ ဒါက အမျိုးသမီးတွေကိုဖိနှိပ်တာမျိုးဖြစ်တယ်။ ဒါပေမယ့် ပေါ်လစီမရှိဘူး၊ ထုံးအနေနဲ့ အမျိုးသမီးတွေကို အနိုင်ကျင့်နေတာမျိုး လုပ်နေမယ်ဆိုရင်တော့ ဒီလိုစနစ်ကြီးပ ပျောက်အောင်အားလုံးဝိုင်းဝန်းပြီးတိုက်တွန်းရမယ်။ အစိုးရအနေနဲ့ ဒါကိုသေသေချာချာကိုင်တွယ်သင့်တယ်လို့ မြင်ပါတယ်။ ”- ဟု လွေးပိုးကမေးခြိူဝ်း က တိုက်တွန်းပါသည်။
ထိုသို့ ဒေသခံတိုင်းရင်းသူအမျိုးသမီးများ ဖိနှိပ်ခံရမှု မခံရအောင် လူမှုအခြေပြု သက်ဆိုင်ရာအဖွဲ့အစည်းများမှ အသိပညာ ဗဟုသုတ ပေးမှု၊ စိတ်ပိုင်းဆိုင်ရာအားပေးမှုများ အားတိုက်ကွင်းဆင်းဆောင်ရွက်သင့်ကြောင်းလည်း ဆိုပါသည်။
ပန်ဝိုးလျံရွာသည် မိုင်းယော်တိုက်နယ်အရှေ့မြောက်ဘက် လွယ်စက်တောင်၏တဖက်ခြမ်းတွင်တည်ရှိပြီး မိုင်းယော်မှ တရက်ခန့်ခရီးသွားရကြောင်း၊ တအာင်းလူမျိုးတို့နေထိုင်သည့်ရွာဖြစ်ကြောင်းသိရသည်။
