သျှမ်းပြည်နယ် မြောက်ပိုင်း သီပေါမြို့နယ် နောင်အန်းကျေးရွာ အနီးတွင် အမျိုးသားတဦး သေနတ် ဒဏ်ရာဖြင့် သေဆုံးမှုရှိခဲ့ရာ လက်သည်အား မသိရကြောင်း သီပေါမြို့နယ် နယ်စည်းမခြား ပရဟိတ အသင်းကပြောသည်။
အောက်တိုဘာ ၁ ရက်နေ့ ည ရ နာရီခွဲအချိန်ခန့်က သေနတ်ဒဏ်ရာဖြင့်သေဆုံးနေသော အမျိုးသား၏ ရုပ် အလောင်းအား ရွာသားများက တွေ့ခဲ့ခြင်းဖြစ်ကြောင်း၊ အဆိုပါအမျိုးသားသည် အသက် ၃၄ နှစ် ခန့်သာရှိပြီးမည်သည့် အဖွဲ့ မှ လာရောက်ပစ်ခတ်သည်ကိုလည်း မသိရှိကြောင်း၊ အဆိုပါအမျိုးသား၏ အလောင်းအား ကျောက်မဲမြို့ ဆေးရုံ ရင်ခွဲရုံသို့ ပို့ဆောင်ပေးခဲ့ကြောင်း နယ်စည်းမခြား ပရဟိတ အသင်းမှကိုမျိုး က ပြောသည်။
“ သေနတ်ဒဏ်ရာက နောက်ကျောမှာ။ ဖြစ်တဲ့နေရာက နောင်အန်းကျေးရွာ အနီးက ပြောင်းခင်းနားမှာပါ ဘယ်အဖွဲ့လုပ်တယ်ဆိုတာ ကျနော်တို့လည်း မသိဘူး။ သေနတ်ပစ်ခံရပြီး အမျိုးသားတယောက်သေနေတယ်ဆိုတဲ့ သတင်း ကျနော်ဆီရောက်တော့ကျနော် သွားသယ်ပြီးကျောက်မဲဆေးရုံကို ပို့လိုက်တာပါ” ဟု ကိုမျိုးက ဆိုသည်။
၄င်းနှင့် ပတ်သတ်ပြီး သီပေါမြို့နယ် ရဲစခန်းမှ အမျိုးသားတဦး သေနတ်ပစ်ခတ် သေဆုံးသည်မှာ မှန်ကန်ကြောင်း၊ မည်သည့်အဖွဲ့ ပစ်သည်ကို စုံစမ်းနေဆဲ ဟုလည်း သျှမ်းသံတော်ဆင့်သို့ပြောသည်။
“ ကျနော်တို့ သီပေါမြို့နယ် မှာ မကြာခဏ ပစ်ခတ်မှုတွေ သေဆုံးမှုတွေ ဖြစ်တယ်။ ရဲတပ်ဖွဲ့ကလည်း တခါမှ တရားခံဖမ်းမိတယ်ဆိုတာ မရှိဘူး။ ကိုယ့်လုံခြုံရေး ကိုယ်တာဝန်ယူနေရပါတယ်” ဟု သီပေါမြို့ ဒေသခံ အမျိုးသား တဦးက ပြောသည်။
ယခုနှစ် အတွင်း သီပေါမြို့နယ် တွင် အရပ်သား ပြည်သူ အကြောင်းမဲ့ ပစ်ခတ်ခံရမှု ၁၀ဦးခန့် ရှိကြောင်း သီပေါ နာရေး ကူညီမှု အသင်း၏ ဖေ့ဘွတ်စ် စာမျက်နှာတွင် ဖော်ပြထားသည်။
Leave a Comments