သျှမ်းပြည်မြောက်ပိုင်း နမ္မတူမြို့နယ် ပန်လုံအုပ်စုအတွင်း ယခုလဆန်းကဖြစ်ပွါးခဲ့သောတိုက်ပွဲကြောင့် ကျည်ဆံထိမှန်ဒဏ်ရာရသည့် ပန်လုံရွာသားအား အဆုတ်မှကျည်ဆံခွဲထုတ်ပြီးစီးခဲ့ပြီဖြစ်ကြောင်းသိရသည်။
စက်တင်ဘာလ ၁ ရက်နေ့က ပန်လုံအုပ်စုအတွင်း မြောက်ပိုင်းမဟာမိတ်တပ်ဖွဲ့နှင့် သျှမ်းပြည်တပ်မတော် RCSS/SSA တို့ ကြားဖြစ်ပွားသောတိုက်ပွဲကြောင့် ဒေသခံရွာသား ၂ ဦးအား ကျည်ဆံထိမှန်ရာ တဦးမှာ ဆေးကုသမှု ခံယူကာ နေကောင်းသွားပြီဖြစ်သော်လည်း စိုင်းစံထွန်းမှာ အဆုတ်အတွင်း ကျည်ဆံဝင်သွားသဖြင့် သီပေါဆေးရုံမှ မန္တလေးဆေးရုံသို့ ပို့ဆောင်ခွဲစိပ်ခဲ့ရသည်။
“မန္တလေးဆေးရုံမှာ စက်တင်ဘာလ ၂၅ ရက် ညနေ ၃ နာရီက သူ့အဆုတ်ထဲက ကျည်ဆံကိုဆရာဝန်တွေကခွဲထုတ်ပေးနိုင်ခဲ့ပြီးဖြစ်ပါတယ်။ ခွဲစိပ်ကုသမှုစရိတ်ကိုတော့ နမ်တူကပြည်သူ့လွှတ်တော်ကိုယ်စားလှယ်နန်းခမ်းအေးကနေ ကူညီထောက်ပ့ံမှုပေးထားပါတယ်။ စိုင်းစံထွန်းရဲ့ကျန်းမာရေးကောင်းမွန်လာပြီလို့ဆိုရပါမယ်။ ဘယ်တော့ဆေးရုံကဆင်းရ မယ်တော့မသိရသေးပါဘူး ”- ဟု မန္တလေးဆေးရုံတွင် စိုင်းစံထွန်းအားကူညီပြုစုပေးသည့် စိုင်းခွန်ဆိုင်ဖှ ကသျှမ်းသံတော်ဆင့်အားပြောပြသည်။
တိုက်ပွဲကြောင့် ရွာသားများ ထွက်ပြေးကြစဉ် ရွာသား စိုင်းစံထွန်း အသက် ၅၀ ကျော်နှင့် စိုင်းမို အသက် ၂၀ ကျော်တို့ကျည်ဆံထိမှန်ရာ သီပေါမြို့မှ ကူညီမှုအဖွဲ့က သီပေါဆေးရုံသို့ပို့ဆောင်ခဲ့သည်။ စိုင်းမိုမှာ လက်နှင့်ဝမ်းဗိုက်တွင်ကျည်ရှပ်ခဲ့သည်ဖြစ်ရာသီပေါတွင်သာဆေးကုသမှုခံယူခဲ့ပြီး စိုင်းစံထွန်းမှာ အဆုတ်အတွင်း ကျည်ဆံဝင်သွားသဖြင့် စက်တင်ဘာလ ၁၄ ရက်နေ့က မန္တလေးဆေးရုံသို့ ဆက်လက်ပို့ဆောင်ခဲ့သည်။
စက်တင်ဘာလဆန်းပိုင်းကတည်းကစပြီး နမ္မတူမြို့နယ်အတွင်း လက်နက်ကိုင်တပ်ဖွဲ့များ အကြားတိုက်ပွဲ များဆက်တိုက်ဖြစ်ပွါးခဲ့ပြီး ဒေသခံလူထုမှာလည်း လယ်ယာလုပ်ငန်းခွင်များပျက်ကွက်ခဲ့ရသည်။ လက်ရှိတိုင် အဆိုပါဒေသတွင်တိုက်ပွဲများကြိုကြား ကြိုကြား ဖြစ်ပွါးနေဆဲဖြစ်ပါသည်။
Leave a Comments