သျှမ်းပြည် မြောက်ပိုင်း နမ္မတူမြို့နယ် အတွင်း မကြာခဏ တိုက်ပွဲဖြစ်ပွားမှုကြောင့် ဒေသခံပြည်သူများ စိုးရိမ်ထိတ်လန့်မှုဖြင့် နေထိုင်နေရကြောင်း သိရသည်။
အဆိုပါ အရပ်ဒေသတွင် တအာင်း (ပလောင်) အမျိုးသားလွတ်မြောက်ရေး တပ်မတော် (TNLA) ၊ သျှမ်းပြည် ပြန်လည် ထူထောင်ရေး ကောင်စီ၊ ရှမ်းပြည် တပ်မတော် ( RCSS /SSA ) တို့ မကြာခဏ တိုက်ပွဲဖြစ်ပွားနေကြောင်း ဒေသခံများ က ဆိုကြသည်။
“ တိုက်ပွဲတွေ က ထိတ်တိုက်ဖြစ်တဲ့ တိုက်ပွဲတွေလို့ပြောလို့ရပါတယ်။ ဘယ်ချိန် ဘယ်နေရာဖြစ်မယ်ဆိုတာ မသိတော့ ကျနော်တို့လည်း ကြောက်နေရတယ်။ တိုက်ပွဲဖြစ်ရင်တော့ ရွာကနေ ရှောင်လိုက်။ ငြိမ်ရင် ပြန်လိုက်နဲ့ စိတ်မလုံဘူး” ဟု နမ္မတူမြို့နယ် မန်စံမြောက် ကျောင်း စစ်ရှောင် စခန်းသို့ လာရောက်ခိုလှုံသည့် လုံဆာ က ပြောသည်။
ထိုနည်းတူ အပြည်ပြည်ဆိုင်ရာ ငြိမ်းချမ်းရေးနေ့ ဖြစ်သည့် စက်တင်ဘာ ၂၁ရက်နေ့တွင် RCSS/SSA နှင့် TNLA တို့ နမ္မတူမြို့နယ် နောင်အော်ကျေးရွာ နှင့် နားငူး ကျေးရွာ အနီးတွင် တိုက်ပွဲဖြစ်ပွားရာ ဒေသခံ ၁၈၀ ကျော် နမ္မတူ မြို့နယ် မန်စံ မြောက်ကျောင်း စစ်ရှောင်စခန်းသို့ လာရောက်ခိုလှုံနေရကြောင်း စစ်ရှောင်ပြည်သူများကို ကူညီပေးနေသည့် စိုင်းမြင့် က ပြောသည်။
“ စစ်ဆင်ရေး ဖြစ်တဲ့ တိုက်ပွဲတော့ မဟုတ်ဘူး။ လက်နက်ကိုင် အချင်းချင်း သွားလာ လှုပ်ရှားမှုကိုတားဆီးချင်လို့ ပစ်တဲ့သဘောလို့ထင်ပါတယ်။ ဒေသအတွင်း လက်နက်ကိုင်တွေ သွားလာနေသရွေ့တော့ ထိပ်တိုက်တိုက်ပွဲက ဖြစ်နေအုံးမှာပါပဲ” ဟု စိုင်းမြင့် က ဆိုသည်။
ယခု ရက်ပိုင်းအတွင်း တိုက်ပွဲများ ရပ်ဆိုင်းနေသဖြင့် စစ်ရှောင် တချို့ နေရပ်သို့ ပြန်သွားပြီဖြစ်ကြောင်း၊ တချို့မှာ မနက်ပိုင်း တွင်လယ်ယာလုပ်ငန်းများ ဝင်ရောက်ပြီး ညနေပိုင်းတွင် စစ်ရှောင်သို့ ပြန်လာကြကြောင်း လည်း စစ်ရှောင် စခန်းကူညီပေးနေသူများက ပြောသည်။
“ဒီချိန် က ပြောင်းဖူး ချိုးချိန်ရောက်ပြီ။ ဒါကြောင့် တချို့ ဆိုရင် နေ့ဆိုရင်တော့ အခြေအနေ ကြည့်ပြီး ပြောင်းဖူးသွားချိုးကြတယ်။ ညဆိုရင် စခန်း ပြန်လာအိပ်ကြတယ်” ဟု စိုင်းမြင့် ကပြောပြသည်။
လက်ရှိ ဝါတွင်း ကာလ အတွင်း RCSS/SSA နှင့် TNLA တို့ သည် နမ္မတူမြို့နယ် အတွင်း တိုက်ပွဲဖြစ်ပွားမှု ၅ကြိမ်ထက် မနည်း ဖြစ်ပွားကာစစ်ရှောင်များ မကြာခဏ ထွက်ပြေးတိမ်းရှောင်နေရပြီး စိုက်ပျိုးရေး ကောင်းမွန်စွာ မလုပ်ဆောင်နိုင်ကြောင်း စစ်ရှောင်များက ပြောဆိုကြသည်။
