တရုတ်နိုင်ငံယူနန်ပြည်နယ် ဗဟိုမူးယစ်ဆေးဝါးတိုက်ဖျက်ရေးဌာနကနေ သုံးနှစ်အတွင်းမူးယစ်ဆေးဝါးပျောက် ကင်းဖို့ UWSA ဌာနချုပ်ပန်ဆန်းကို စာရေးသားပေးပို့လာတဲ့နောက်ပိုင်း ၀ တပ်ဖွဲ့ ထိန်းချုပ်နယ်မြေအတွင်း မူးယစ်ဆေးဝါးတိုက်ဖျက်ရေးတွေဆက်တိုက်ပြုလုပ်လာနေပါတယ်။
စက်တင်ဘာလ ပထမ ပတ်ကစပြီးကနေ့ထိ မိုင်းမော၊ မိုင်းပေါက်၊ မိုင်းဖျန် ဟိုတောင်း ပန်ဆန်း စတဲ့ တရုတ် နယ်စပ်မြို့ မြောက်ပိုင်း ၀ ထိန်းချုပ်နယ်မြေအပါအဝင် ၀ တပ်ဖွဲ့ အခြေချ လှုပ်ရှားတဲ့ ထိုင်းနယ်စပ် မိုင်းဆတ်မြို့နယ်၊ မိုင်းတုံမြို့နယ်ဘက်မှာလဲ ဂိတ်ထောင်ပြီး ဒေသခံတွေကို စစ်ဆေးမှုတွေ ပြုလုပ်နေပါတယ်။
“လမ်းသွားလမ်းလာတွေကို စောင့်ကြပ်စစ်ဆေးဖို့ဆိုတာက ကျနော်တို့အထက်အမိန့်အရ လုပ်ရတာပါ။ မူးယစ်ဆေးဝါးတိုက်ဖျက်ရေးလုပ်ငန်းစဉ်ဖြစ်ပါတယ်။ စစ်ရေးနဲ့လဲဆိုင်တယ်လို့ပြောရတာပေါ့။ ထုတ်ပြောလို့တော့မရဘူးလေ” – ဟု မိုင်းတုံမြို့နယ်အတွင်း တာဝန်ထမ်းဆောင်နေတဲ့ UWSA အရာရှိ ယီလူး ကပြောပါတယ်။
စက်တင်ဘာလ ၁၀ ရက်နေ့က ပုံပါကျင်နဲ့မိုင်းတုံကြား နားပါကောင်လမ်းခွဲ၊ မိုင်းခစ် လမ်းခွဲနဲ့ မိုင်းဟန်ဂူလမ်းခွဲတွေမှာ ၂ နေရာ ဂိတ်ထောင်ပြီး လမ်းသွားလမ်းလာတွေကို စောင့်ကြပ်စစ်ဆေးကြောင်း ယခင်က အဲဒီနေရာတွေမှာ စစ်ဆေးမှုမပြုကြောင်း မိုင်းဟန်အုပ်စု နားပါကောဝ်ရွာက ရွာသားကပြောပါတယ်။
“မိုင်းတုံဒေသခံ စိုင်ဆိုင်က – လမ်းသွားလမ်းလာတွေကိုအကုန်စစ်ဆေးတာ။ ကားတွေဘာတွေရပ်ခိုင်းပြီး ခရီးသည်တွေကိုပါဆင်းခိုင်းတယ်။အိတ်တွေထဲ ကားတွေထဲ ၀င်ရှာတယ်။ မူးယစ်ဆေး ယာဘ တွေ့မိရင် အိမ်ယာ ခြံမြေပိုင်ဆိုင်မှုတွေအကုန်လုံးကိုသိမ်းမယ်လို့ ပြီးခဲ့တဲ့ ရ လ လောက်က ဒီအပိုင်း က ရွာသားတွေကို သူတို့ အရင်ကခေါ်ပြောတယ်လေ။ ပြီးတော့ ထောင်ချ မယ်လို့လဲပြောတယ်။ ”- ဟု သျှမ်းသံတော်ဆင့် ကိုပြောပါတယ်။
၀ တပ်ဖွဲ့ထိန်းချုပ်နယ်မြေအတွင်း ဘိန်းခင်းတွေမရှိတော့ဘူးလို့ လွန်ခဲ့တဲ့ ၁၀ ခန့်ကတည်း ၀ တပ်ဖွဲ့ ထုတ်ပြန်ကြေငြာထားပေမယ့် တခြားဒေသမှ လာတဲ့ မူးယစ်ဆေးဝါးထုတ်လုပ်ရေးဂိုဏ်းတွေက ၀ ထိန်းချုပ် ဒေသအတွင်း လျှို့ဝှက်ဝင်ရောက်ထုတ်လုပ်မှုတွေရှိနေတယ်လို့ မိုင်းမောမြို့နယ် မူးယစ်ဆေးဝါးတိုက် ဖျက်ရေးအဖွဲ့ ခေါင်းဆောင် ဦးပေါက်ညီမိုင်းက ပြောပါတယ်။ ဒါပေမယ့် ဘယ်သူဘယ်ဝါဆိုတာ တော့ပြောမသွားပါဘူး။
အမေရိကန်နဲ့ ထိုင်း နိုင်ငံအစိုးရတို့ကတော့ ၀ ထိပ်ပေါင်းခေါင်းဆောင်ပိုင်းမှာပါ၀င်တဲ့ ဝေရှော်ကန်းကို မူးယစ်ဆေးဝါး မှုနဲ့ ဖမ်းဝရမ်းထုတ်ထားပါတယ်။
Leave a Comments