သျှမ်းပြည်မြောက်ပိုင်း ကျောက်မဲခရိုင်အတွင်း ဂုတ်တွင်းလမ်းနှင့် ဂုတ်တွင်းရှောင်လမ်းစီမံကိန်းအခြေအနေ လူထုနစ်နာမှုအခြေအနေများအား SNLD အမျိုးသားလွှတ်တော် အမတ်က အစိုးရအားတိုက်ရိုက်မေးမြန်းခဲ့သည်။

မဲဆန္ဒနယ်အမှတ် ၄ မှ SNLD ပါတီ၏ အမျိုးသားလွှတ်တော်ကိုယ်စားလှယ် စိုင်းအုန်းကျော်က – နောင်ချိုမြို့ရှောင်လမ်းဆောက်မယ်လို့ ၂၀၁၆ ခုနှစ်ကတည်းက အစိုးရစီမံကိန်းထဲမှာ ပါတယ်လို့ကြားရတယ်လေ။ ၂၀၁၇ ခုနှစ်တုန်းကလည်း ဂုတ်တွင်းရှောင်တဲ့ တံတားတစင်း ဆောက်မယ်လို့အစိုးရပြောပြန်တယ်။ ခုထိအကောင်အထည်မဖော်သေးတဲ့အပြင် ဒေသခံတွေလည်း နစ်နာကြေး အကုန်မရသေးဘူး။ ဒီအတွက်အစိုးရဘက်က ဘယ်လို ဆောင်ရွက်ပေးမလဲ – စသဖြင့် ဆွေးနွေးခဲ့ပါတယ်။ – ဟု စိုင်းအုန်းကျော်က ပြောသည်။

စိုင်းအုန်းကျော်၏ မေးမြန်းချက်အား ဆောက်လုပ်ရေး ဒုဝန်ကြီး ဦးကျော်လင်းက – လမ်းချဲ့ တံတားဆောက်ရာတွင် လယ်မြေသိမ်းခံရသည့် နစ်နာသူ တောင်သူလယ်သမားများအား လျော်ကြေးပေးပြီးပါက စီမံကိန်းစတင်မည်ဖြစ်ကြာင်း၊ စီမံကိန်းမှာ ၃ နှစ်ဖြစ်ကြောင်းပြန်လည်ဖြေကြားသည်ဟုသိရသည်။

လျော်ကြေးရသွားတဲ့လယ်သမား ၂၂၁ ယောက်ရှိပါတယ် ။ ၆၂ ဦး ကျန်ပါတယ်။၆၂ ဦး ကိုလျော်ကြေးပေးပြီးရင်တော့ ဆောက်လုပ်ရေးစီမံကိန်း စတင်ဆောင်ရွက်ပါမယ်။ နောင်ချိုမြို့ရှောင်လမ်းဟာ ၂၁ ကီလိုမီတာ သာရှည်ပါတယ်။ ပတ်ဝန်းကျင်ဆန်းစစ်မှု IEE တော့လုပ်ပြီးပါပြီ။ IEE ဆန်းစစ်မှုကိုဘဲယူပါမယ်။ – ဟု ပြောဆိုဖြေကြားကြောင်းသိရသည်။

မြန်မာပြည်အလယ်ပိုင်း မှ တရုတ်နိုင်ငံသို့ တိုက်ရိုက်ဆက်သွယ် သည့် မန္တလေး-လားရှိုး- မူစယ် ပြည်ထောင်စုလမ်းမ ကြီးသည် နောင်ချိုနှင့်ကျောက်မဲကြား ဂုတ်တွင်းတွင် အတက်အဆင်းကားကြီးများ ကြောင့် လမ်းပိတ်ကာခရီးသွားများနှောင့်နှေးကြန့်ကြာရကြောင်း ထို့အတွက် မြို့ရှောင်လမ်းတိုးချဲ့ခြင်းဖြစ်ကြောင်း သိရသည်။

ဂုတ်တွင်းရှောင်လမ်းဖောက်လုပ်ရန်အတွက် ကျောက်မဲမြို့နယ်ဒေသခံများ၏ လယ်ယာမြေ ၁၆၉ ဧက ၊ နောင်ချိုမြို့ခံများလယ်ယာမြေ ၃၂၉ ဧက၊ စုစုပေါင်း ၄၉၉ ဧက ကိုပါ အသုံးပြုခဲ့ရကြောင်း ထိုအနက် ၃၆ ဧကမှာ အစိုးရ၏လယ်ယာမြေပါ၀င်နေကြောင်း သိရသည်။