သျှမ်းပြည်အရှေ့ပိုင်း မိုင်းတုံမြို့တွင် မိုးရွာသွန်းမှုကြောင့် မိုင်းတုံမြို့မ ဈေးအတွင်းရေလွှမ်းရာ ဒေသခံများ ဈေးသည်များ အခက်တွေ့နေရကြောင်းသိရသည်။
ဩဂုတ်လ ၂၉ ရက် ညက ညလုံးပေါက်မိုးရွာသွန်းမှုကြောင့် ဩဂုတ်လ ၃၀ ရက် ယနေ့မနက်ပိုင်း မိုင်းတုံမြို့မဈေးအတွင်း ရေများပြည့်လျှံနေခြင်းဖြစ်ကြောင်း မွန်းလွဲပိုင်းအထိ ရေများမကျသေးကြောင်း မိုင်းတုံဒေသခံ စိုင်းဆိုင်ကပြောသည်။
ကျနော်တို့ရဲ့ဈေးက ခွက်လိုမျိုးပုံဖြစ်နေတော့ မိုးအရမ်းရွာရင်ရေပြည့်မယ်။ နောက်ပြီး ရေပြန်ထွက်ဖို့မြောင်းမရှိတော့ ရေပေါ်ဈေးဖြစ်နေတယ်။ – ဟု သျှမ်းသံတော်ဆင့်အားပြောသည်။
မိုးသည်းထန်ပါက ဈေးအတွင်းသာမက ရပ်ရွာအတွင်း လမ်းဘေးဝဲယာ တို့တွင်လည်းရေပြည့်လျှံကြောင်း ၊ အမှိုက်သရိုက်များပိတ်ဆို့သဖြင့် ရေမစီးနိုင်ခြင်းဖြစ်ရကြောင်း ဒေသခံများကပြောဆိုသည်။
ဈေးသည်တဦးကလည်း – ဒီနေ့ ဈေးမရောင်းနိုင်တော့ဘူး။ ပစ္စည်းချဖို့နေရာမရှိတော့ဘူး ။ ဈေးလာသုံးတဲ့လူလည်းမရှိဘူး။ စည်ပင်၊ ဈေးကောက် ကတော့ နေ့တိုင်းပိုက်ဆံလာကောက်တယ်။ ဘာကြောင့် မြောင်းတွေမဖောက်ပေးလဲမသိဘူး။ ဈေးထဲက မြေပြင်မညီလည်း မြေမဖို့ပေးဘူး။ အံ့ဩတယ်- ဟု ပြောသည်။
မိုင်းတုံမြို့အားဖြတ်သန်းစီးဆင်းသည့်နမ့်တုံချောင်းလည်း ချောင်းရေလျှံကာ ရပ်ရွာအတွင်းရေစီးဝင်ကြောင်း၊ မိုင်းတုံမြို့ကမ္မဌာန်းကျောင်းလည်း ရေများဝင်ရောက်လွှမ်းနေကြောင်း စိုင်းဆိုင်က ပြောသည်။
သံလွင်အရှေ့ခြမ်း ရှိ မိုင်းတုံမြို့သည် ထိုင်းနယ်စပ်နှင့် နီးစပ်သဖြင့် ၂ နိုင်ငံနယ်စပ်ရှိ ဒေသခံများကုန်ကူးသန်းသွင်းထုတ်ရာတွင်ဖြတ်သန်းရသောမြို့ဖြစ်သည်။ သံလွင်မြစ်နှင့်လည်း နီးစပ်ပြီး အထက်မိုင်းတုံ (တာ့ဆန်း)ရေကာတာတည်ဆောက်မည့်နေရာနှင့်လည်း မိုင် ၃၀ ခန့်သာ ဝေးပါသည်။
