ိသျှမ်းပြည် မိုင်းတုံမြို့နယ်တွင် စစ်မှုထမ်းစာရင်းပါသည့် နေအိမ်များကို စစ်ကောင်စီလက်အောက်ခံ တာဝန်ရှိသူများက ညအချိန် ရှောင်တခင် ဧည့်စာရင်း ဝင်ရောက်စစ်ဆေးနေကြောင်း သတင်းရရှိသည်။

ပြီးခဲ့သည့် မေလ ၁၃ ရက်မှစ၍ မိုင်းတုံမြို့တွင် ညအချိန်၌ စစ်ကောင်စီလက်အောက်ခံ ဌာနဆိုင်ရာ ပူးပေါင်းအဖွဲ့မှ တာဝန်ရှိသူများက ပြည်သူ့စစ်မှုထမ်းစာရင်းတွင် အမည်ပါဝင်ထားသော နေအိမ်များကို အဓိကထား၍ ရှောင်တခင် ဧည့်စာရင်း ဝင်ရောက်စစ်ဆေးနေကြောင်း‌ မိုင်းတုံမြို့ ဒေသခံ အမျိုးသားတစ်ဦးက သျှမ်းသံတော်ဆင့်ကို ပြောသည်။

“စစ်ကောင်စီ ခန့်ထားတဲ့ မြို့စောင့်အဖွဲ့ဝင်တွေ အခုတလော အရမ်းအာဏာပြချင်နေကြတာ။ သူတို့ အဓိက ဝင်စစ်တဲ့ အိမ်တွေက စစ်မှုထမ်းစာရင်းမှာ နာမည်ပါထားပြီးသား အိမ်တွေ၊ အမျိုးမျိုး ပေးထားတဲ့လူတွေ စစ်မှုမထမ်းရဖို့ အသနားခံထားတဲ့ လူတွေရဲ့ အိမ်တွေပေါ့”ဟု မိုင်းတုံမြို့ ဒေသခံ အမျိုးသားတစ်ဦးက ပြောသည်။

ထိုကဲ့သို့ ညအချိန်မတော် ဧည့်စာရင်းဝင်ရောက် စစ်ဆေးမှုများ ပြုလုပ်နေခြင်းသည် ပြည်သူများ အတွက် စိုးရိမ်မှုများ ဖြစ်စေကြောင်း ဒေသခံများက ပြောသည်။

နိုင်ငံသားတိုင်း စစ်မှုမထမ်း မနေရ ပြည်သူ့စစ်မှုထမ်းဥပဒေအား ၂ဝ၂၄ ခုနှစ်၊ ဖေဖော်ဝါရီလ ၁ဝ ရက်နေ့တွင် စစ်ကောင်စီမှ ပြန်လည်အသက်သွင်း ပြဋ္ဌာန်းခဲ့ပြီးနောက် တပ်သားသစ်စုဆောင်းမှုကို တိုင်းနှင့် ပြည်နယ်အသီးသီးတွင် မတ်လလယ်မှ စတင်စုဆောင်းခဲ့သည်။

စစ်မှုထမ်းဥပဒေကို အသက်သွင်းလိုက်ပြီးနောက် မြန်မာနိုင်ငံအတွင်းရှိ လူငယ်များသည် တော်လှန်ရေးတပ်ဖွဲ့များသို့ ဝင်ရောက်မှုများ ရှိနေသလို ပြည်ပနိုင်ငံများသို့လည်း နည်းလမ်းပေါင်းစုံဖြင့် ထွက်ပြေးတိမ်းရှောင်မှုများလည်း ရှိနေသည်။