သျှမ်းပြည် အရှေ့ပိုင်း မိုင်းတုံမြို့တွင် စစ်ကောင်စီတပ်မှ စစ်မှုထမ်းအမှတ်စဉ် (၁၅)အတွက် စာရင်းကောက်ခံနေပြီး စစ်မှုထမ်းစာရင်းပါသူများ ထွက်ပြေးလျှင် အရေးယူခံရမည်ဟု စစ်ကောင်စီအဖွဲ့ဝင်များက ပြောဆိုကြောင်း စုံစမ်းသိရှိရသည်။

ယမန်နေ့ (ဇွန်လ ၁၆ ရက်)တွင် မိုင်းတုံမြို့၊ မြို့မရပ်ကွက်တွင် စစ်မှုထမ်းရန်အတွက် အစည်းအဝေးခေါ်ယူကာ ဝန်ထမ်းများ၊ ကျောင်းတက်နေသူများနှင့် မသန်စွမ်းသူများ ကင်းလွတ်ခွင့်ရပြီး ကျန်သည့် အသက်(၁၈)နှစ်မှ (၃၅)နှစ်အထိ အမျိုးသားများကို စစ်ကောင်စီတပ်မှခေါ်သည့် မည်သည့်အချိန်မဆို စစ်မှုထမ်းရမည်ဖြစ်ပြီး ထွက်ပြေးလျှင် အရေးယူမည်ဟု စစ်ကောင်စီအဖွဲ့ဝင်များက ပြောဆိုကြောင်း ဒေသခံများက ပြောသည်။

“မနေ့က ရဲ၊ စစ်သား၊ ထွေအုပ်နဲ့ အုပ်ချုပ်ရေးမှူးတွေက မြို့မရပ်ကွက်မှာ စစ်မှုထမ်းဖို့ အစည်းအဝေးလုပ်တယ်။ ကင်းလွတ်ခွင့်မရတဲ့သူက ၁၂၄ ယောက်ရှိတယ်။ အဲဒီလူတွေက စစ်ကောင်စီက လူခေါ်ရင် အလှည့်ကျ သွားရမယ်ပြောတယ်၊ မဲလည်း မနှိုက်တော့ဘူးတဲ့။ ထွက်ပြေးရင်တော့ အရေးယူမယ်ပြောတယ်” ဟု မိုင်းတုံမြို့မှ သတင်းရင်းမြစ်တစ်ဦးက သျှမ်းသံတော်ဆင့်ကို ပြောသည်။

အဆိုပါ စစ်မှုထမ်းစာရင်းထဲတွင် ပါသည့် အမျိုးသားများသည် မိမိအလှည့်ကျ၍ မသွားလိုသည့်အခါ ရပ်ကွက်အုပ်ချုပ်ရေးမှူးနှင့် ညှိနှိုင်းမည်ဆိုလျှင် ကျပ်သိန်း(၁၀၀)မှ (၂၀၀) ကြား ပေးရမည်ကို စိုးရိမ်သောကြောင့် အခြေခံ လူတန်းစားများအနေဖြင့် မတတ်နိုင်ကြောင်း ဒေသခံတစ်ဦးက ပြောသည်။

“စာရင်းထဲမှာ ပါတဲ့သူက မသွားချင်ဘူးဆိုရင် အုပ်ချုပ်ရေးမှူးနဲ့ ညှိပြီး သိန်း ၁၀၀ ကနေ ၂၀၀ ကြားပေးရင် မသွားရလောက်ဘူး၊ အခုက ဘယ်ပြေးရမှန်းမသိ။ အဲ့ပမာဏက အခြေခံလူတန်းစား လက်လုပ်လက်စားအတွက် မတတ်နိုင်၊ မြို့ထဲမှာလည်း အိမ်ထဲက အိမ်ပြင် မထွက်ရဲကြဘူး။ ရှောင်နေရင်လည်း ဘက်ဘက်ပြေးရမှန်း မသိဘူး” ဟု အဆိုပါ ဒေသခံတစ်ဦးက ပြောသည်။

ထို့အပြင် မိုင်းတုံမြို့၌ စစ်မှုထမ်းလာကောက်သည့်အခါ တစ်လနှင့်တစ်လ ငွေပေးရသည်မှာ မတူညီဘဲ စစ်မှုထမ်းလစဉ်ကြေးများကို ပုံမှန်ပေးနေရပြီး စစ်မှုထမ်းစာရင်းမပါလျှင် ငွေကျပ်(၁၅၀၀၀)၊ စစ်မှုထမ်းစာရင်း ပါလျှင် ကျပ် (၃၅၀၀၀) စသည်ဖြင့် လစဉ်နှင့်အမျှ မတူညီဘဲ ပေးဆောင်နေရသည်ဟု ၎င်းက ဆက်ပြောသည်။

ပြီးခဲ့သည့် မေလ (၁၃)ရက်နေ့တွင်လည်း မိုင်းတုံမြို့ မြို့မရပ်ကွက်တွင် ဧည့်စာရင်းလာစစ်သည့် စစ်ကောင်စီလက်အောက်ခံ ရဲနှင့်စစ်သားများက လူနှစ်ဦးကို ဖမ်းဆီးသွားခဲ့ပြီး နားကောင်းမှုးကျေးရွာတွင်လည်း (၆)ဦး ဖမ်းဆီးခံရကာ စုစုပေါင်း (၈)ဦး ဖမ်းဆီးခံခဲ့ရကြောင်း ဒေသခံများထံမှ သိရသည်။