သျှမ်းပြည်မြောက်ပိုင်းနမ့်ခမ်းမြို့တွင် ၁၀ ရက်အကြာ ဖမ်းဆီးခေါ်ဆောင်ထားခြင်းခံရသည့် ဒေသခံနန်းမိုဟွမ်အား အမြန်ဆုံးပြန်လွှတ်ပေးရန် နမ့်ခမ်းမြို့ ကျားဖြူပါတီ SNDP နှင့် လူထုညီညွတ်ရေးအသင်း UP တို့က စာရေးသားပေးပို့လိုက်သည်။

ဩဂုတ်လ ၂၅ ရက်နေ့က အဆိုပါ တောင်းဆိုစာရေးသားပေးပို့ခြင်းဖြစ်ပြီး – သားသမီး ၃ ဦး၏မိခင်နန်းမိုဟွမ်အား ကလေးများက နေ့စဉ်ငိုယိုကြတမ်းတနေကြောင်း၊ ၉ ရက်ကျော်ကြာပြီဖြစ်သဖြင့် ပြန်လွှတ်ပေးစေလိုကြောင်း – စာတွင်ပါရှိပါသည်။

ကျားဖြူပါတီဉက္ကဌ စိုင်းအိုက်ပေါင်းက – “တကယ်တော့ TNLA ရဲ့ဥပဒေနဲ့ညှိစွန်းတယ်ဆိုတဲ့စကားက မဟုတ်သေးဘူးလေ။ TNLA က အစိုးရမှမဟုတ်တာ။ နိုင်ငံတော်အေးချမ်းသာယာရေး ဖွံ့ဖြိုးတိုးတက်ရေးအတွက်လုပ်ဖို့က လူတိုင်းမှာတာဝန်ရှိတယ်။ နန်းမိုဟွမ်ကို သူတို့ ဖမ်းဆီး သွားတာဟာ နိုင်ငံရေးကိုထိခိုက်စေတယ်။ လူထုအေးချမ်းသာယာရေးကိုထိခိုက်တယ်။ ငြိမ်းချမ်းရေးကိုထိခိုက်တယ်။ ကလေး ၃ ယောက်ကို သက်ညှာသောအားဖြင့် သူတို့လေးတွေရဲ့မိခင်ကို ပြန်လွှတ်ပေးပါ လို့တောင်းဆိုချင်ပါတယ် ” – ဟု သျှမ်းသံတော်ဆင့်အားပြောသည်။

အလားတူ ဩဂုတ်လ ၂၇ ရက်ကနေ့တွင်လည်း နမ့်ခမ်းဒေသခံ အဖမ်းခံရသည့် ကိစ္စ ကူညီဆောင်ရွက်ပေးပါရန် ဟုဆိုကာ နိုင်ငံတော်သမ္မတ ဦးဝင်းမြင့်နှင့် နိုင်ငံတော်အတိုင်ပင်ခံပုဂ္ဂိုလ် ဒေါ်အောင်ဆန်းစုကြည်ထံလိပ်မူသည့်စာတစောင်ကိုပါ ကျားဖြူပါတီ SNDP မှ ပေးပို့ခဲ့သည်။

နမ့်ခမ်းမြို့ခံ နန်းမိုဟွမ်အား  ဩဂုတ်လ ၁၇ ရက်နေ့က ၎င်း၏ နေအိမ်အတွင်း လက်နက်ကိုင်လူတစုဝင်ရောက်ဖမ်းဆီးခေါ်ဆောင်သွားပြီးနောက်တရက်  TNLA တအာင်းတပ်ဖွဲ့ပြန်ကြားရေးဌာနမှ  တာ့အိုက်ကျော်က ဖမ်းဆီးမှုမှာ TNLA တအာင်းတပ်ဖွဲ့၏လက်ချက်ဖြစ်ကြောင်း ပြောဆိုဝန်ခံခဲ့သည်။ TNLA ၏ ဥပဒေကို မလိုက်နာသဖြင့် အပြစ်ပေးမည်ဟုပြောဆိုခဲ့သည်။ ယမန်နှစ် ၂၀၁၇ က ၎င်းနေအိမ်သို့ ဆက်ကြေး ၁၁ သိန်းကောက်ခံပြီးအထွက် အစိုးရတပ်မတော်မှ ခြုံခိုတိုက်ခိုက်မှုကြောင့် တအာင်းတပ်သား ၁ ဦးသေ ၁ ဦးအဖမ်းခံရသည့်ကိစ္စနှင့်သက်ဆိုင်ကြောင်း TNLA တပ်မှူးကြီး တားအိုက်မောင်းက ဩဂုတ်လ ၂၄ ရက်က ဆွေးနွေးရန်ရောက်ရှိလာသည့် သျှမ်းပြည်တိုးတက်ရေးပါတီ သျှမ်းပြည်တပ်မတော် SSPP ကိုယ်စားလှယ် အားပြောဆိုခဲ့ကြောင်းသိရသည်။