သျှမ်းပြည်မြောက်ပိုင်း ကျောက်မဲမြို့နယ် ကျေးလက်ရပ်ရွာအတွင်း စခန်းချသည့် အစိုးရတပ်က စောင့်ကြပ်ကာ ရွာ တွင်းသွားလာသည့် ဒေသခံများအား စစ်ဆေးမှုပြုနေသဖြင့် ဒေသခံများအတွက်လမ်းခရီးကြန့်ကြာသကဲ့သို့ ဗမာစကား မကျွမ်းကျင်သည့် ဒေသခံများအတွက် အခက်အခဲကြုံတွေ့နေရသည်ဟု သိရသည်။
ကျောက်မဲမြို့နယ် နောင်ပိန်ဟိုကစ်ရွာ အတွင်းစခန်းချလှုပ်ရှားနေသည့် နောင်ချို ခလရ ၁၁၄ နှင့် ၁၁၅ တပ်မှ စစ်အင်အား ၆၀ ခန့်သည် ရွာအတွင်း စောင့်ကာ ဖြတ်သန်းသွားလာသည့် ရွာလူထု ဆိုင်ကယ်များ လှည်းနှင့်ထော်လာဂျီများအား စစ်ဆေးမှုပြုခဲ့ကြောင့် လူထုလယ်ယာဆင်းရေးနှင့် ရောင်းဝယ်ရေးအတွက် အနှောင့်အယှက်ဖြစ်ရကြောင်း ဒေသခံရွာသားများကပြောဆိုသည်။
နောင်ပိန်ရွာသား စိုင်းစိုင်းက – “ ဒီတပ်တွေ ဒီရွာမှာ ၂ နေရာစခန်းလာချတယ်။ ကြာတော့ကြာပြီ။ သွားလိုက်လာလိုက် ဘဲသူတို့။ ပန်တင်ရွာဘုန်ကြီးကျောင်းနဲ့ ရွှေဘုံသာ ဘုန်းကြီးကျောင်းမှာစခန်းချတယ်။ ရွာပြင်မှာလည်း ရှိတယ် ပတ်ပတ်လည်။ ပြီးခဲ့တဲ့ ရ ရက်နေ့က တောထဲမှာ မူးယစ်ဆေးဖမ်းမိတယ်ကြားတယ်။ အခုလည်း ရွာသားတွေဆီမှာတွေ့လိုတွေ့ညားလား စုံစမ်းချင်တာ လား အဲလိုသဘောမျိုး။ ရွာသားတွေကို အလုပ်အကိုင်နှောင့်နှေးကြန့်ကြာအောင် သက်သက်နှောင့်ယှက်တာ။ ဗမာစကားကောင်းကောင်းမသိတဲ့ရွာသားတွေဆိုရင်အော်ဟစ်ကြိမ်းမောင်းခံရတယ် ” – ဟု သျှမ်းသံတော်ဆင့်အားပြောသည်။
သြဂုတ်လ ၁၈ ရက်နေ့ကတည်းက အဆိုပါစစ်သားများ ရွာအတွင်းစောင့်ကြပ်စစ်ဆေးမှုပြုနေခြင်းဖြစ်ပြီး ယနေ့တိုင် ၄ ရက်မြောက်ပြီဖြစ်သော်လည်း ရပ်ရွာအုပ်ချုပ်ရေးမှူး ၊ နိုင်ငံရေးပါတီ၊ မည်သည့်လက်နက်ကိုင်တပ်ဖွဲ့မှ ၀င်ရောက် တောင်းပန်ပြောဆိုပေးခြင်းမရှိကြောင်း စိုင်းစိုင်းကပြောသည်။
“ရွာသားတွေဆီကတော့ ဘာမှမရပါဘူး။ ဒါပေမယ့် ရွာသားတွေရဲ့ လွယ်အိတ်တွေ ပလိုင်းတွေကိုပါမွှေနှောက်၊ ဆိုင်ကယ် တူးပေါက်တွေဘာတွေဖွင့်ကြည့်၊ ကားစီးရင်လည်း ကားရပ်ပြီး ကားပေါ်ကဆင်းပေးရ။ ဆိုတော့ သွားလာရေးအနှောင့် အယှက်ဖြစ်ရတာပေါ့ ”- ဟုလည်း အဆိုပါရွာသို့ရောက်ရှိသူ သီပေါမြို့ခံ နန်းနု ကလည်းပြောသည်။
ထို့ကြောင့် ရွာသားများသွားလာရေး လယ်ယာလုပ်ငန်းကောင်းမွန်စွာလုပ်ကိုင်နိုင်ရေးအတွက် ထိုသို့သော စောင့်ကြပ်စစ်ဆေးမှုမျိုး ရပ်တန့်ပေးရန်နှင့် နောက်နောင်ထပ်မရှိစေရန် သက်ဆိုင်ရာအဖွဲ့အစည်းများ ၊ ပြည်သူ့ကိုယ်စားလှယ်များမှ ၀င်ရောက် ဆွေးနွေးပြောကြားပေးစေလိုကြောင်းလည်း နောင်ပင်ရွာသားများကပြောသည်။
နောင်ပိန်ဟိုကစ်ရွာသည် ကျောက်မဲမြို့တောင်ဘက်၊ ကျောက်မဲနှင့်နောင်ချိုကြားတွင်တည်ရှိပါသည်။ အဆိုပါဒေသတွင် အစိုးရတပ်အပြင် သျှမ်းတပ်ဖွဲ့ ၂ ဖွဲ့လှုပ်ရှားပါသည်။
