သျှမ်းပြည်တောင်ပိုင်းလင်းခေးမြို့တွင် သျှမ်းအမျိုးသားအဆင့် နိုင်ငံရေးဆွေးနွေးပွဲကျင်းပရန် နေပြည်တော် JICM အစည်းအဝေးတွင် RCSS/SSA သဘောတူဆုံးဖြတ်လိုက်ပြီးနောက် နေရာထိုင်ခင်းအတွက် တာဝန်သိ ဒေသခံများ က စိုးရိမ်နေကြသည်။
အဆိုပါအစည်းအဝေးကျင်းပမည့်ရက် အတိအကျမသိရသေးသော်လည်း အစည်းအဝေးကျင်းပဖြစ်ပါက လူဦးရေ ငါးရာထက် မနည်းရှိမည်ဖြစ်ကြောင်း သျှမ်းနိုင်ငံရေးပါတီခေါင်းဆောင်များကပြောဆိုပါသည်။
“လင်းခေးမြို့မှာ တည်းခိုခန်းက ၃ ခုဘဲရှိပါတယ်။ ဟော်တယ်မရှိဘူး။ ကျနော်တို့ကြားရတဲ့လူအရည်အတွက်နဲ့တော့ မရနိုင်ဘူး။ ခေါင်းဆောင်ပိုင်းကို တည်းခိုခန်းမှာထားပြီး ကျန်တာကိုတော့ ဘုန်းကြီးကျောင်းဘဲထင်တယ်။ ဒါပေမယ့် ကျနော်တို့လည်းအခု သတင်းဘဲကြား ထားတယ်။ တရားဝင်ပြောဆိုလာတာမရှိသေးတော့ ဘာပြင်ဆင်မှု မှ မစရသေးဘူး” – ဟု လင်းခေးမြို့ ကျားခေါင်းပါတီလွှတ်တော် ကိုယ်စားလှယ် စိုင်းအောင်မျိုးကျော်ကပြောသည်။
လင်းခေးမြို့တွင် ပြည်သူ့စစ်တပ်ဖွဲ့တို့ပိုင်သော SSS တည်းခိုခန်း ၊ စျေးတန်းရပ်ကွက်တွင် ၀င်းသီရိတည်းခိုခန်းနှင့် လင်းတည်းခိုခန်း ၃ ခုသာရှိပြီး တခုလျင် ဧည့်သည် ၃၀ ၀န်းကျင်ခန့်သာ လက်ခံနိုင်ကြောင်း၊ မြို့ကြီးပြကြီးကဲ့သို့ ဟော်တယ်ကြီးများမရှိကြောင်း လင်းခေးမြို့ခံ ပါ့နန်းကပြောသည်။
“ ဒီမှာတကယ်လုပ်ဖြစ်မယ်ဆိုရင် ဒီမှာက မြို့သေးဘဲဆိုတော့ မြို့ကြီးနဲ့တော့ ဘယ်တူမလဲနော်။ မြို့ကြီးလောက်တော့ ဘယ် အဆင်ပြေလွယ်ကူပါ့မလဲနော်။ ဒါပေမယ့် ကျနော်တို့ကမြို့ခံဖြစ်တဲ့အညီ နွေးထွေးစွာကြိုဆိုတယ်။ လုပ်ဖြစ်မယ်ဆိုရင် အစည်းအဝေးကတော့ နွယ်ဝတီခန်းမ မှာလူ ၄၀၀- ၅၀၀ လောက်အထိ ၀င်နိုင်တယ် ။ တည်းဖို့က ခန်းမ နဲ့နီးတဲ့ ဘုန်းကြီးကျောင်းဆိုရင် ကျောင်းတောရှိမယ်၊ ကျောင်းဟိုနားရှိမယ် ၊ နောက် ကျောင်းဝါဆို ရှိမယ်။ ကမ္မဌာန်းကျောင်းက တရားကျင့်တဲ့ယောဂီတွေရှိနေတုန်းမို့ အဲဒီမှာတော့နားလို့မရနိုင်သေးဘူး။ စားရေးသောက်ရေးကတော့ ကျနော်တို့လင်းခေးလူထု ချက်တဲ့ဟင်းကို ခံတွင်းတွေ့မယ်ဆိုရင်တော့ အခက်အခဲမရှိပါဘူး။ ရေဆိုရင်လည်း တိန်းချောင်းရေရှိပါတယ်။ နောက်ပြီးသွားရေးလာရေးလည်း လွယ်ကူပါတယ်။ တောင်ကြီး – လင်းခေး ကားနဲ့ဆိုရင် နေ့ချင်းပြန်ရနေပါပြီ ” – ဟု ကျေးရွာဥက္ကဌလည်းဖြစ်သည့် ဦးစိုင်းမိန်း ကပြောသည်။
သျှမ်းပြည်တောင်ပိုင်း ခရိုင် ၃ ခုအနက် တခုဖြစ်သော လင်းခေးခရိုင် လင်းခေးမြို့သည် တောင်ကြီးမြို့၏ အရှေ့ တောင်ဘက် မိုင်ပေါင်း ၁၇၀ ခန့်အကွာတွင်ရှိပါသည်။ ၂၀၀၄ ခုနှစ်က ခရိုင်အဆင့် တိုးမြင့်ဌာနပေါင်းစုံရုံးများ စိုက်ထူဖွင့်လှစ်ထားပါသည်။ ပင်လယ်ရေမျက်နှာပြင် အမြင့်ပေ ၉၇၇ တွင်တည်ရှိကာ ရာသီဥတုမှာ ပူပြင်းခြောက် သွေ့သည်ဟုဆိုသော်လည်း ဆောင်းရာသီတွင်မူ အခြားမြို့များကဲ့သို့ ချမ်းအေးသာယာသည်။
လက်ရှိတွင် ခရိုင်မှူးမှာ ဟိုပန်မှပြောင်းရွှေ့လာသည့် ဦးစန်းဌေးဖြစ်ကြောင်း၊ ဒေသတွင်းလူထုအတွက်ဖွံ့ဖြိုးတိုးတက် ရေး လုပ်ငန်းတွင် အားကြိုးမာန်တက်ဆောင်ရွက်သူတဦးဖြစ်ကြောင်းလည်း လင်းခေးမြို့ခံများကပြောဆိုနေကြသည်။
ဆက်စပ်သတင်းဖတ်ရှုရန် – http://burmese.panglong.org/?p=14427
