သျှမ်းပြည်မြောက်ပိုင်း သီပေါမြို့နယ်အတွင်း အစိုးရတပ်မတော် ခလရ ၁၄၇ လှုပ်ရှားစစ်ကြောင်း သည်နယ်မြေစိုးမိုးရေး၊ ရှင်းလင်းရေး လုပ်ရာမှ သျှမ်းပြည်တပ်မတော် SSPP/SSA နှင့် ယနေ့တိုက်ပွဲ ဖြစ်ပွားသည်။

တိုက်ပွဲ ဖြစ်ပွားသည့်နေရာသည် သီပေါမြို့ အရှေ့တောင်ဘက် မိုင် ၄၀ ကျော်အကွာ ဝမ့်မော့ကျေးရွာ အုပ်စု ပါကန်း နမ့်တိုက်ဖိုင်း ကျေးရွာ ဘက်တွင် လှုပ်ရှားစဉ် သျှမ်းပြည်တပ်မတော် SSPP/SSA တပ်ရင်းအမှတ် ၈၅၅ နှင့် နိုဝင်ဘာ ၂၉ ရက် နံနက် ၈ နာရီခွဲ အချိန်ခန့်တွင် တိုက်ပွဲ ဖြစ်ပွားခြင်း ဖြစ်သည်။

“ဒီစစ်ကြောင်းက မနေ့က ဘဲ ဝင်လာတယ်။ သဲတင်တဲ့ကားကြီးနဲ့ ညတွင်းချင်း ရောက်လာတယ်။ SSA တပ်ကတော့ ဒီဘက်မှာ အမြဲနေတယ်။ ဝင်လာတော့ ဖြစ်ပြီပေါ့။ ” – ဒေသ အတွင်းနေ ရပ်မိရပ်ဖ တဦးက ပြောသည်။

နောင်ကော်လုံ – ပန်နျု- တဆင့် စိန်ကျော့ ပန်ကန်းသို့ ရောက်ရှိလာကြောင်း၊ ပန်ကန်းကျေးရွာသား အချို့အား ချောဆွဲကာ နမ့်လင်း(ပလောင်)ရွာတွင် ညအိပ်ကြောင်း၊ ယနေ့ နံနက် ခြေလျင်ဖြင့် SSPP/SSA တပ်ရှိရာ ကောင်းမိုက်ဟုန်းသို့ ရောက်ရှိလာကာ SSPP/SSA အားတိုက်ခိုက်ခြင်းဖြစ် ကြောင်း ဒေသခံများပြောပြချက်အရသိရသည်။

“တိုက်ပွဲက အခု ငြိမ်နေတယ်။ နာရီဝက် ကျော်ကျော်လောက်ဖြစ်တယ်။ ကောင်းမိုက်ဟုန်းမှာ ရှိတဲ့ ကျနော်တို့တပ်ကို လာတိုက်ပြီး ပြန်ဆုတ်သွားပြီ” – ဟု SSPP/SSA ပြောခွင့်ရ စိုင်းဘုန်းဟန်က ပြောသည်။

သီပေါမြို့နယ် နောင်ကော်လုံ အခြေစိုက် ခြေလျင်တပ်ရင်အမှတ် (ခလရ) ၁၄၇ အင်အား ၇၀ ခန့်က ဝမ့်မော့၊ ပါကန်းဘက် ဝင်ရောက် လှုပ်ရှားရာမှ တိုက်ပွဲ ဖြစ်ပွားခြင်းဖြစ်သည်ဟုဆိုသည်။

သီပေါမြို့ တပ်အသိုင်းအဝိုင်းက – “တာဝန်အရ နယ်မြေ ရှင်းလင်းဖို့ ဖြစ်တယ်။ သွားရင်တိုက်ပွဲ ဖြစ်မယ် ဆိုတာ ကျနော်တို့သိတယ်။ ဒါပေမယ့် ကျနော်တို့လဲ အထက်အမိန့်အရ သွားရတာဖြစ်တယ်။ ဝမ့်ဟိုင်း က လဲ သူတို့နေရာ သူတို့မနေဘူးလေ” – ဟု သျှမ်းသံတော်ဆင့်သို့ပြောသည်။

သျှမ်းပြည်တိုးတက်ရေးပါတီ သျှမ်းပြည်တပ်မတော် SSPP/SSA သည် ပြည်နယ်အဆင့် ပြည်ထောင်စု အဆင့် အစိုးရ နှင့် ငြိမ်းချမ်းရေး တည်ဆောက်ထားသော်လည်း NCA လမ်းကြောင်း လက်မခံသည့် ဝ တပ်ဖွဲ့ခေါင်းဆောင်သည့် FPNCC မြောက်ပိုင်းမဟာမိတ်အဖွဲ့ ၇ ဖွဲ့ရှိ စစ်ရေးမဟာမိတ် အဖွဲ့တွင် ပါဝင်သည်။