သျှမ်းပြည်တောင်ပိုင်း ဟိုပုံးမြို့နယ် နမ့်ခုတ်ကျေးရွာအုပ်စုမှ အသက် ၁၂ နှစ်အရွယ် ကျောင်းသားတဦး အပါ အဝင် ဖမ်းဆီးခံရသူများအား ချွင်းချက်မရှိ အမြန်ဆုံး လွှတ်ပေးရန် အစိုးရအား သျှမ်းလူ့အခွင့်အရေးမဏ္ဍိုင်မှ တောင်းဆိုလိုက်သည်။

NCA လက်မှတ်ရေးထိုးထားသည့် သျှမ်းပြည်ပြန်လည်ထူထောင်ရေးကောင်စီ RCSS/SSA နှင့် ပတ်သက်ပြီး ၅ လ ကျော်ကြာဖမ်းဆီးခံထားရသည့် ရွာသားများအား တပ်မတော်မှ အမှု ၁၃ မှု ဖြင့် ဟိုပုံးတရားရုံးတွင် တရား စွဲဆိုထားရာ ထိုသူများထဲတွင် အသက် ၁၂ နှစ်အရွယ် ကျောင်းသား တဦးလည်းပါနေသည့်အတွက် ၄င်းတို့အားလုံးအား အမြန် ဆုံး လွှတ်ပေးရန် နို၀င်ဘာလ ၂၈ ရက်နေ့ရက်စွဲဖြင့် SHRF က ကြေငြာချက်ထုတ်ပြန်ကာတောင်းဆိုလိုက်ခြင်းဖြစ်သည်။

“ဂျူလိုင်လ ကတည်းက ဖမ်းထားတာ။ ရွာသား ၉ ယောက်က လယ်သမားတွေပါ။ အစိုးရ အာဏာပိုင် တွေဘက်ကနေ အဲလိုအချိန်ဆွဲပြီး စစ်ဆေးနေတာမသင့်တော်ပါဘူး။ အမြန်ဆုံးအမှုပြန်ရုပ်သိမ်းပေးစေချင် ပါတယ်။ ဖမ်းဆီးမှုထဲမှာပါတဲ့ အသက် ၁၂ နှစ်အရွယ်ခလေးလေးကိုလည်း ပြန်လွှတ်လိုက်ပြီဆိုပေမယ့် လည်းဘဲ ကျန်တဲ့သူတွေ ရုံးတက်အမှုစစ်ဆေးတိုင်း သူကပါလိုက်လိုက်တက်နေရတော့ သူ့ပညာရေး ကိုထိခိုက်စေမယ်။ သူ့တက်လမ်းကိုထိခိုက်စေမယ်” – ဟု သျှမ်းလူ့အခွင့်အရေးမဏ္ဍိုင်က ပြောခွင့်ရ စိုင်းဟော်ရှဲန်က ပြောသည်။

ဟိုပုံးမြို့နယ်မြောက်ဘက်တွင်လှုပ်ရှားနေသည့် ခမရ ၄၂၄၊ ခလရ ၂၂၅၊ ခလရ ၂၄၉ တို့သည့် အသက် ၁၂ နှစ်အရွယ် ကျောင်းသား တဦး အပါအဝင် လယ်သမား ၉ ဦးအား သျှမ်းပြည်ပြန်လည်ထူထောင်ရေး ကောင်စီ အား ဆက်သွယ်ထောက်ပ့ံသူများဟုဆိုကာ ဂျူလိုင်လ ဆန်းက ဖမ်းဆီးလိုက်သည်။

လက်ရှိတွင် ချုပ်နှောင်ခံနေရသူများမှာ အကြိမ်ပေါင်း ဒါဇင်ထက်မနည်း ရုံးထုတ်စစ်ဆေးခံနေကြရပြီး တရားလိုဖြစ်သောတပ်မတော်ဘက်မှ ရုံးတက်ပျက်ကွက်သဖြင့် အမှုမှာလည်းတရားစီရင်နိုင်ခြင်း မရှိသေး ကြောင်း၊ ဟိုပုံး အချုပ်ခန်းနှင့် နမ့်ခုတ်ကျေးရွာမှာ ဝေးကွာသဖြင့်မိသားစုဝင်များ အမှုလာရောက်ကြား နာဖို့ အခက်အခဲရှိကြောင်း အဖမ်းခံရသူ တဦး၏ မိသားစုဝင်တဦးဖြစ်သည့် စိုင်းခမ်းက ပြောသည်။

“အခုချိန်မှာတော့ တက်ကြွကူညီဆောင်ရွက်ပေးနေတာဆိုလို့ စဝ်မြဝတီဘဲရှိတယ်။ အဲတာကြောင့် အမှုလိုက် ပေးဖို့ ရှေ့နေမလုံလောက်ဘူး။ မိသားစုဝင်တွေလည်း ရွာကနေ တရားရုံး သွားလာရေးမှာမလွယ် ကူလှဘူး။သူတို့မှာအကူအညီတွေလိုအပ်နေပါတယ် ” – ဟု စိုင်းဟော်ရှဲန်ကပြောသည်။

ရွာသားများ ဖမ်းဆီးချုပ်နှောင်ခံရခြင်းနှင့် ရွာသားများအား တရားမျှတမှုမရှိသော တရားစွဲဆိုမှုများ အစိုးရ တပ်မတော်မှုပြုလုပ်နေခြင်း၊ ရွာသူရွာသားများအားအခက်အခဲကြုံတွေ့စေရ ခြင်းများအပေါ် သျှမ်းလူ့အခွင့် အရေးမဏ္ဍိုင်မှ အပြင်းအထန်ရှုပ်ချကြောင်းနှင့် ရွာသားများအား ချွင်းချက်မရှိ လွှတ်ပေးစေလိုကြောင်း သျှမ်းလူ့အခွင့်အရေးမဏ္ဍိုင်က ပြောဆိုလိုက်သည်။

“အခုချိန်မှာ NCA စာချုပ်ပါသဘောတူညီချက်ကိုအကောင်အထည်ဖော်နေတဲ့အချိန်မို့ အခုလို တရားမျှတမှု မရှိတဲ့လုပ်ရပ်တွေ လူ့အခွင့်အရေးချိုးဖောက်နေမှုတွေကို အစိုးရအာဏာပိုင် တွေဘက်ကဆက်လက်ကျူးလွန် နေရင် ငြိမ်းချမ်းရေးကိုအားမပေးရာကျသလို NCA လက်မှတ်မထိုးရသေးတဲ့ တိုင်းရင်းသားအဖွဲ့အစည်း တွေကိုလည်း NCA လက်မှတ်ရေးထိုးဖို့ မဝ့ံမရဲဖြစ်အောင်လုပ်ရာရောက်တယ် ”- ဟု စိုင်းဟော်ရှဲန်က ပြောသည်။

အဖမ်းခံရသည့်ဒေသခံ ၉ ဦး အား အစိုးရတပ်မတော်ကအမှု ၁၃ မှုဖြင့်တရားစွဲဆိုထားရာ လက်နက်မှု၊ ပို့ကုန်သွင်းကုန် ဥပဒေ ၊ ဆက်သွယ်ရေး ဥပဒေနှင့် စစ်ဆင်ရေးနယ်မြေအတွင်းဝင်ရောက်မှု ကာကွယ်ရေးဥပဒေတို့ ဖြင့်အရေးယူထားကြောင်း အမှုလိုက် ပေး သည့် ရှေ့နေ စဝ်မြဝတီ က သျှမ်းသံတော်ဆင့် အားပြောပြသည်။

သျှမ်းပြည်တပ်မတော် RCSS/SSA သည် အစိုးရ တပ်မတော် နှင့် တစ်နို်င်ငံလုံး ပစ်ခတ်တိုက်ခိုက်မှု ရပ်စဲရေးစာချုပ် လက်မှတ်ရေးထိုးထားသောကြောင့် နေပြည်တော်အစိုးရမှ ၂၀၁၅ အောက်တိုဘာ က မတရားအသင်းမှ စာရင်းပယ်ဖျက်ထားသည့် သျှမ်းတိုင်းရင်းသားလက်နက်ကိုင်တော်လှန်ရေးတပ် တခုဖြစ်ပါသည်။