Wednesday, May 22, 2024

အမျိုးသားအဆင့် နိုင်ငံရေးဆွေးနွေးပွဲ သျှမ်းပြည်တောင်ပိုင်း လင်းခေးမြို့တွင်ကျင်းပရန် JICM အစည်းအဝေးတွင် RCSS သဘောတူ

Must read

RCSS ၏ အမျိုးသားအဆင့် နိုင်ငံရေးဆွေးနွေးပွဲကို သျှမ်းပြည်တောင်ပိုင်း လင်းခေးခရိုင် လင်းခေးမြို့တွင်ကျင်းပရန် နေပြည်တော်တွင် ကျင်းပသည့် JICM ၆ ကြိမ်မြောက်အစည်းအဝေးတွင် သဘောတူခဲ့ကြကြောင်းသိရသည်။

“ဘယ်နေ့လဲဆိုတာတော့အတိအကျမသိရသေးဘူး။ ၂၁ ရာစုပင်လုံ တတိယအကြိမ်ကိုတော့ ဖေဖော်ဝါရီလမှာ လုပ်မယ် လို့ကြားထားတယ်။ RCSS က NCA လက်မှတ်ရေးထိုးထားတဲ့အဖွဲ့ဖြစ်တဲ့အတွက်ကြောင့် သျှမ်းအမျိုး သားအဆင့် နိုင်ငံရေး ဆွေးနွေးပွဲကိုသီးသန့်လုပ်ဆောင်ပိုင်ခွင့်ရှိတယ်။ သူ့အနေနဲ့လုပ်ပိုင်ခွင့်ရှိသလို လုပ်မယ်ဆိုရင်လည်း မမှားဘူးပေါ့နော်။ အစိုးရကိုယ်တိုင်ကလည်းဘဲ တနိုင်ငံလုံးအပစ်အခတ်ရပ်စဲရေးပြောပြီးတော့မှ အဖွဲ့ပေါင်း ၂၁ ဖွဲ့မှာ ၈ ဖွဲ့နဲ့ဘဲ လက်မှတ် ထိုးထားတော့ တနိုင်ငံလုံးကိုကိုယ်စားပြုမလားပေါ့။”- ဟု CSSU အဖွဲ့ဝင် သျှမ်းတိုင်းရင်းသားများဒီမိုကရေစီအဖွဲ့ချုပ်က ပြောခွင့်ရစိုင်းလိတ်ကပြောပါသည်။

၆ ကြိမ်မြောက် တနိုင်ငံလုံးပစ်ခတ်တိုက်ခိုက်မှုရပ်စဲရေး NCA သဘောတူစာချုပ် အကောင်အထည်ဖော်မှုဆိုင်ရာ ညှိနှိုင်း ဆွေးနွေးရေး JICM အစည်းအဝေးကို နို၀င်ဘာလ ၂၇ ရက်နေ့က နေပြည်တော်တွင်ကျင်းပရာ NCA လက်မှတ်ရေးထိုး သည့် တိုင်းရင်းသား လက်နက်ကိုင်အဖွဲ့ ၈ ဖွဲ့မှ ခေါင်းဆောင်များ၊ JICM ကိုယ်စားလှယ်များနှင့် အစိုးရကိုယ်စားလှယ် ဘက်မှ ဒုတိယတပ်မတော်ကာကွယ်ရေးဦးစီးချုပ်ကာကွယ်ရေး ဦးစီးချုပ်(ကြည်း) ဒုတိယဗိုလ်ချုပ်မှူးကြီးစိုးဝင်း၊ နိုင်ငံတော်အတိုင်ပင်ခံရုံးဝန်ကြီးဌာန ပြည်ထောင်စုဝန်ကြီး ဦးကျော်တင့်ဆွေ၊ ပြည်ထောင်စုရှေ့နေချုပ် ဦးထွန်းထွန်းဦး၊ ငြိမ်းချမ်းရေးကော်မရှင် ဥက္ကဋ္ဌ ဒေါက်တာတင်မျိုးဝင်း၊ လွှတ်တော်ကိုယ်စားလှယ်များ၊ တပ်မတော် အရာရှိကြီးများ၊ ဒုတိယဝန်ကြီးများ နှင့် ဖိတ်ကြားထားသူများ တက်ရောက်ကြသည်။

အဆိုပါအစည်းအဝေးတွင် အချက် ရ ချက်ကို ဆွေးနွေးဆုံးဖြတ်နိုင်ခဲ့ရာ RCSS-SSA ၏ အမျိုးသား အဆင့် နိုင်ငံရေးဆွေးနွေးပွဲကို ဇန်နဝါရီလအတွင်း သျှမ်းပြည်တောင်ပိုင်း လင်းခေးမြို့တွင် ကျင်းပပြုလုပ်ရန်ဟူသည့် အချက်ပါရှိပါသည်။

“RCSS/SSA က သူ့မှာလုပ်ခွင့်ရှိလို့သူလုပ်သွားတဲ့အပေါ် ကျနော်တို့ကန့်ကွက်စရာမရှိပါဘူး။ ဒါပေမယ့် သူ့ရဲ့လုပ် ဆောင်မှုဟာ သျှမ်းအမျိုးသားအဆင့် ဆိုပေမယ့်လို့ သျှမ်းတမျိုးသားလုံးကို ကိုယ်စားပြုတယ်မပြုဘူး ဆိုတာ ကတော့ ဝိဝါဒကွဲစရာအများကြီးရှိပါတယ်။ ကန့်သတ်ချက်တွေ အများကြီးရှိဦးမှာပါ။ ” – ဟု SNLD ပြောခွင့်ရပုဂ္ဂိုလ်က ပြောပါသည်။

နိုင်ငံတော်အတိုင်ပင်ခံရုံး Myanmar State Counsellor Office ၏ ထုတ်ပြန်ချက် တွင် သျှမ်းအမျိုးသားအဆင့် နိုင်ငံရေး ဆွေးနွေးပွဲ ဆိုသည့် အသုံးအနှုန်း အသုံးမပြုဘဲ RCSS-SSA ၏ အမျိုးသား အဆင့်နိုင်ငံရေးဆွေးနွေးပွဲ ဟု သုံးနှုန်းထား သည့် အတွက် သျှမ်းတမျိုးသားလုံးအတွက် ကိုယ်စားမပြုမည်မပြု ကိုတော့ အတည်ပြုချက် မရသေးပေ။

သျှမ်းပြည်ညီညွတ်ရေးကော်မတီ CSSU မှ ကျင်းပသည့် အစည်းအဝေးများတွင် သျှမ်းအဖွဲ့အစည်းများ၊ သျှမ်း ခေါင်းဆောင်များ အများစုက သျှမ်းအမျိုးသားတို့၏ နိုင်ငံရေး ဂုဏ်သိက္ခာ နှင့်အညီ တောင်ကြီး သို့မဟုတ် ပြည်ထောင်စု သမိုင်းဝင် ပင်လုံမြို့တွင် ကျင်းပရန် ယမန်နှစ်နှောင်းပိုင်းမှစ၍ ပြင်ဆင်လာသော်လည်း အစိုးရ တပ်မတော်က ကျင်းပခွင့်မပြုသောကြောင့် လင်းခေးမြို့တွင်ကျင်းပရန် ဗိုလ်ချုပ်ကြီးယွက်စစ်ဦးဆောင်သည့် RCSS/SSA ၏ကိုယ်စားလှယ်အဖွဲ့က သဘောတူလိုက်သည်။

အဆိုပါ ဆုံးဖြတ်ချက်ပါ JICM အစည်းအဝေး၏ သဘောတူညီချက် ၇ ချက်မှာ – (၁) တစ်နိုင်ငံလုံးပစ်ခတ် တိုက် ခိုက် မှုရပ်စဲရေးသဘောတူစာချုပ် NCA အကောင်အထည်ဖော်မှု ပြန်လည်သုံးသပ်ခြင်း ဆိုင်ရာ အလုပ်အဖွဲ့၏ အစီရင်ခံစာကိုအတည်ပြုခြင်း၊(၂) RCSS-SSA ၏ အမျိုးသား အဆင့်နိုင်ငံရေးဆွေးနွေးပွဲကို ဇန်နဝါရီလအတွင်း သျှမ်းပြည်နယ် လင်းခေးမြို့တွင် ကျင်းပပြုလုပ်ရန်၊ (၃) ALP ၏ အမျိုးသားအဆင့်နိုင်ငံရေးပွဲ ကျင်းပခြင်းနှင့် စပ်လျဉ်း၍ ဆက်လက်ကြိုးပမ်းဆောင်ရွက်သွားရန်၊ (၄) ပြည်ထောင်စု သဘောတူစာချုပ် အကောင် အထည် ဖော်ခြင်း ဆိုင်ရာကိစ္စရပ်များကို တစ်နိုင်ငံလုံးပစ်ခတ်တိုက်ခိုက်မှု ရပ်စဲရေး သဘောတူစာချုပ် NCA အတိုင်း ဆက်လက်ဆောင်ရွက်သွားရန်၊ (၅) ပြည်ထောင်စု ငြိမ်းချမ်းရေးညီလာခံ-(၂၁)ရာစုပင်လုံ၊ တတိယ အစည်း အဝေးကို ၂၀၁၈ ခုနှစ်၊ ဇန်နဝါရီလ နောက်ဆုံးသီတင်းပတ်တွင် ကျင်းပရန်၊ (၆) ၇ ကြိမ်မြောက် JICM အစည်းအဝေးကို ၂၀၁၈ ခုနှစ် ဖေဖော်ဝါရီလ နောက်ဆုံးသီတင်းပတ်တွင် ကျင်းပရန်၊ (၇) ဆက်လက်ဆွေးနွေးရန် အချက်အချို့မှအပ နိုင်ငံရေးဆွေးနွေးမှုဆိုင်ရာမူဘောင်၊ လုပ်ငန်းလမ်းညွှန် ToR များနှင့် အမျိုးသားအဆင့် နိုင်ငံရေးဆွေးနွေးပွဲများ ကျင်းပခြင်း ဆိုင်ရာလုပ်ထုံလုပ်နည်း Standard Operating Procedure-SOP များကို အတည်ပြုခြင်း စသည့် ဆုံးဖြတ်ချက်များ ချမှတ်ခဲ့ကြောင်း နိုင်ငံတော်အတိုင်ပင်ခံရုံး Myanmar State Counsellor Office က ထုတ်ပြန်ပါသည်။

Leave a Comments

- Advertisement -spot_img

Latest article