သျှမ်းပြည်နယ်တောင်ပိုင်း မိုင်းပွန်မြို့ရှိ မိုင်းပွန်ဟော်နန်းကို အထင်ကရ ဆရာတော်ကြီးများဦးဆောင် ကာ ပြန်လည်ပြုပြင်မည်ဟုဆိုသော်လည်း ဘတ်ဂျတ်မလုံလောက်သေးသဖြင့် ပြန်လည်ပြုပြင် နိုင်ခြင်းမရှိ သေးကြောင်း သိရသည်။
” ဒီဟော်နန်းကိုပြင်ဖို့ ဆရာတော်ဘုရားကြီးတွေတော့ မကြာခဏလာကြည့်ပါတယ် ။ ဒါပေမယ့် ခုထိ အလှူငွေကောက်ခံထားတာ မလုံလောက်သေးဘူး။ ဒါကြောင့် ခုထိလည်း မပြင်နိုင်သေးပါဘူး” ဟု မိုင်းပွန်မြို့ သျှမ်းလူငယ် စိုင်းဝင်းထွေးက ပြောသည်။
သက်တမ်းနှစ်ပေါင်း ၁၃၀ ကျော်ရှိ မိုင်းပွန်ဟော်နန်းကြီးအား ပြန်လည်ပြုပြင်တည်ဆောက်ရေး အတွက် တောင်တန်းသာသနာပြုဆရာတော် အရှင်သုခမိန္ဒ ခေါ် စဝ်ဆုခမ်းနှင့် အောက်စ်ဖို့ ဗုဒ္ဓဝိဟာရ ဆရာတော် ဒေါက်တာ ခမ်းမိုင်ဓမ္မသာမိ တို့မှအလှူငွေ မ တည်ကာ ထပ်လောင်းအလှူငွေများခံယူမှုဖြင့် ပြန်လည်ပြုပြင်ရန် ပြင်ဆင်နေခြင်း ဖြစ်သည်။
“ယခင်က မိုင်းပွန်ဟော်နန်းမှာ ပေ ၂၈၀ ပတ်လည် ကျယ်ဝန်းပေမယ့် အခုတော့ ဟော်နန်းစိုက်တဲ့မြေ အကျယ် ဘဲကျန်တော့တယ်”- ဟု မိုင်းပွန်တော်ဝင်မျိုးနွယ် စဝ်သောင်းတင်ကပြောသည်။
မိုင်းပွန်ဟော်နန်းအား ပြန်လည်ပြုပြင်ပြီး ပြတိုက် အဖြစ်ထားရှိမည်ဟုလည်းဆိုသည်။ မိုင်းပွန်စော်ဘွားကြီးစဝ်စံထွန်းနှင့် မဟာဒေဝီ စဝ်နန်း ခင်သောင်းတို့တွင် သားသမီး ၆ ဦးရှိရာ စဝ်နန်းဆုနန္ဒာ၊ စဝ်ဆေဟုမ်၊ စဝ်ကိုင်ဖှ၊ စဝ်အုန်းညွန့်၊ စဝ်နန်းမြင့်ကြည်၊ စဝ်သောင်းတင် တို့ဖြစ်ပါသည်။
ထိုအနက်လက်ရှိတွင် ၃ ဦးသာကျန်နေကြောင်း စဝ်ဆေဟုမ်မှာ သြစတေးလျနိုင်ငံတွင် နေထိုင်ပြီး၊ စဝ်ကိုင်ဖှမှာ ရန်ကုန်မြို့တွင်နေထိုင်ကြောင်း ၊ စဝ်သောင်းတင်မှာ မိုင်းပွန်တွင်နေထိုင်လျက်ရှိကြောင်းသိရပါသည်။
အဆိုပါ မိုင်းပွန်ဟော်နန်းကြီး၏အရှင်သခင် စော်ဘွားကြီး စဝ်စံထွန်းသည် မြန်မာနိုင်ငံလွတ်လပ်ရေး ကြိုးပမ်းစဉ် ဂဠုန်ဦးစော နှင့် အပေါင်းအပါတို့ လက်ချက်ဖြင့် ဗိုလ်ချုပ်အောင်ဆန်းနှင့်အတူ ရန်ကုန်မြို့ အတွင်းဝန်များရုံးတွင် ပစ်ခတ်ခံရသည်။ ဗိုလ်ချုပ်အောင်ဆန်းနှင့် အာဇာနည် ရ ဦးတို့ နေရာတွင် ပွဲချင်းပြီးသေဆုံးကြသော်လည်း မိုင်းပွန်စော်ဘွားကြီး မှာ ရန်ကုန်ဆေးရုံကြီးသို့ တရက်ကြာဆေးကုသမှုခံယူပြီးမှ နတ်ရွာစံ တော်မူသည်။
Leave a Comments