လာမည့် ဒီဇင်ဘာလတွင် တရုတ်နိုင်ငံ ယူနန်ပြည်နယ် ဆစ်ဆောင်ပန်းနား သျှမ်းကိုယ်ပိုင် အုပ်ချုပ်ခွင့်ရဒေသ ကျိုင်းဟုန်မြို့နယ်အတွင်းရှိ မဲခေါင်မြစ်ပေါ်က ဆည်ရေတခု ရေလျှော့လွတ်မည်ဟု တရုတ်နိုင်ငံ ဒေသအတွင်း ရေးထိန်းသိမ်းရေးဌာနက ထုတ်ပြန်ထားပါသည်။
ဒီဇင်ဘာ ၇ ရက်မှ ၂၀ ရက်နေ့အထိ ၁၃ ရက်ကြာ ရေလျှော့လွှတ်မည်ဖြစ်ကြောင်း၊ တစက္ကန့် လျှင် ရေစီးဆင်းမှု ၅၀၇ ရေကုဗမီတာ လျှော့လွတ်သွားမည်ဖြစ်ကြောင်းထုတ်ပြန်ထားသဖြင့် မြစ်ဝှမ်းတ လျှောက်နေ ဒေသခံများ ခရီးသွား ကုန်သည်များ အခက်တွေ့နိုင်သည်ဟု ဆွပ်လွေနေ စက်လှေသမား စိုင်းတစ်က ဤကဲ့သို့ပြောသည်။
“မနေ့က ထုတ်ပြန်တယ်လို့ ပြောတယ်။ လာမယ့်လထဲမှာ ရေတွေပိတ်ထားမယ်ကြားတယ်။ ဒီမြစ် ကြောင်းပေါ် သွားလာနေတဲ့ စက်လှေအကြီးစားတွေ၊ ရေပေါ်ရှပ်ပြေးယာဉ်တွေ၊ အခက်တွေ့နိုင်တယ်။ ကျောက်ဆောင်တွေ သောင်တွေ ပေါ်လာရင်သွားလာရေးက အရမ်းသတိထားရတယ်” – ဟု ဆိုသည်။
အဆိုပါဆည်မှ ရေထိန်းသိမ်းရေးအာဏာပိုင်က ပုံမှန်ရာသီတွင် တစက္ကန့်လျှင် ရေကုဗမီတာ ၈၀၀၀ မှ ၁၅၀၀ မိုးရာသီတွင် ၂၀၀၀ – ၂၂၀၀ အထိ ရေများလွှတ်ချသည်ဟု ထိုင်းနိုင်ငံ မန်နေဂျာအွန်လိုင်းက ရေးသားထားသည်။
ထိုင်းကူးသန်းရောင်းဝယ်ရေး အရာရှိတဦးကလည်း – “ တရုတ်အစိုးရ ကဆည်ပြန်ပြင်ဖို့ ရေတွေ ခဏ လျှော့ပိတ်မယ်ဆိုတော့ ဒီမြစ်ဝှမ်းနေ ၆ နိုင်ငံစလုံး ထိခိုက်တာဘဲ။ အဓိက ဒီနိုင်ငံတွေရဲ့ကူးသန်းရောင်း ဝယ်ရေးကိစ္စပေါ့” – ဟု ဆိုသည်။
တရုတ်နိုင်ငံ မှ မြစ်ဖျားခံလာသည့် မဲခေါင်မြစ်သည် တရုတ်နိုင်ငံ အနောက်တောင်ပိုင်း၊ သျှမ်းပြည်အရှေ့ပိုင်း (ပြည်ထောင်စုမြန်မာနိုင်ငံ) ၊ လာအိုနိုင်ငံ၊ ထိုင်းနိုင်ငံ၊ ကမ္ဘောဒီးယား နိုင်ငံ အား ဖြတ်ကျော်စီးဆင်းကာ ဗီယက်နမ်နိုင်ငံ ဟိုချီမင်းစီးတီးမြို့ အနီး တောင်တရုတ်ပင်လယ်အတွင်း စီးဝင်သည်။
