သျှမ်းပြည်တောင်ပိုင်း ကျေးသီးမြို့နယ် မိုင်းနန်းအုပ်စု၏ အုပ်စုအဝင် မိုင်းနန်း(ရွာမ)၏ ဆိုင်းဘုတ်အား “မိုင်းနန်း” ဟူသည့် မြန်မာစာထပ်မံဖြည့်ဆီးကာ နတ်တော်လဆန်း ၁ ရက် ၂၁၁၂ သျှမ်းနှစ်ကူးနေ့တွင် ပြန်တင်လိုက်ပြီဖြစ်ကြောင်းသိရသည်။

အဆိုပါဆိုင်းဘုတ်အား ကျေးသီးမြို့နယ် ကျားခေါင်းပါတီ လွှတ်တော်အမတ်များက ကမကထပြုကာ ဒေသတွင်းလူထု ၊ သံဃာတော်များနှင့်စုပေါင်းပြီး နှစ်သစ်ကူးနေ့ဖြစ်သည့် နို၀င်ဘာလ ၁၉ ရက်နေ့တွင်ပြန်လည်တင်ခဲ့ကြခြင်းဖြစ်ကြောင်း ပြည်နယ်လွှတ်တော်အမတ် စိုင်းစံမိန်းက သျှမ်းသံတော်ဆင့်အားပြောသည်။

“ဆိုင်းဘုတ်ကို သျှမ်းစာနဲ့ မြန်မာစာ ရေးသားပြီးပြန်တင်လိုက်တယ်။ ဆိုင်းဘုတ်အသစ်ကို ကျနော်တို့ကျားခေါင်းပါတီအမတ် ၃ ယောက် ကျနော်စိုင်းစံမိန်းရယ်၊ စဝ်ခမ်းပိုင်ဖ ရယ်၊ ဆရာစိုင်းအောင်ကျော်ရယ် စုပေါင်းပြီးလုပ်ပေးလိုက်ပါတယ်။ ပြန်တင်ဖို့အတွက်လည်း ကျနော် ကျေးသီးမြို့နယ်ထွေအုပ်နဲ့သွားတိုင်ပင်ပြီးတော့ လုပ်တာပါ။ တရားဝင်စာတင်ရတာတွေဘာတွေမလုပ်ခဲ့ပေမယ့် ဒီဆိုင်းဘုတ်ထောင်ရေးနဲ့ပတ်သက်ပြီးတော့ ဥပဒေလည်းသီးခြားမရှိသေးတော့ တကယ်တော့ဒါဟာ ဒီလောက်အထိ မဖြစ်သင့်တဲ့ကိစ္စ လို့မြင်ပါတယ်”- ဟု ဆိုပါသည်။

အဆိုပါ ဆိုင်းဘုတ်အား မြန်မာစာမပါဟုဆိုကာ ရလခတိုင်း တိုင်းမှူး ဗိုလ်ချုပ်သန်းလှိုင်က နိုဝင်ဘာလ ၁၀ ရက်နေ့က ဖြုတ်ချရန် ညွှန်ကြားခဲ့သည်။

မိုင်းနန်းအုပ်စုသည် ကျေးသီးမြို့အရှေ့တောင်ဘက် တွင်တည်ရှိပါသည်။ မိုင်းနောင်မြို့နယ်ခွဲအတွင်းပါရှိပြီး မိုင်းနန်းအုပ်စုဝင်ကျေးရွာ ၁၄ ရွာရှိပါသည်။