သျှမ်းပြည် မြောက်ပိုင်း သီပေါ-လားရှိုး ဆက်သွယ်ထားသည့် သီပေါတံတားကို စစ်ကော်မရှင်တပ်က ၈ လနီးပါး ပိတ်ထားဆဲဖြစ်သဖြင့် ဒေသခံများ၏ သွားလာရေးနှင့် အရေးပေါ်လူနာများ ပို့ဆောင်ရေးတို့တွင် အခက်အခဲများ ကြုံတွေ့နေရကြောင်း စုံစမ်းသိရသည်။

သီပေါမြို့နှင့် လားရှိုးမြို့ကို ဆက်သွယ်ထားသည့် သီပေါတံတားကို စစ်ကော်မရှင်တပ်နှင့် ကိုကန့်တပ်ဖွဲ့ MNDAA တို့  ပြီးခဲ့သည့် ၂၀၂၅ ခုနှစ် နိုဝင်ဘာလ ၁၄ ရက်စပြီး ရက်အကန့်အသတ်မရှိ အပြန်အလှန် ပိတ်ထားခဲ့သည်။ 

လက်ရှိ အချိန်ထိစစ်ကော်မရှင်က သီပေါတံတားကို ဆက်လက်ပိတ်ထားပြီး မော်တော်ယာဉ်များ ဖြတ်သန်းခွင့်မပြုသေးကြောင်း သီပေါမြို့ဒေသခံ အမျိုးသားတစ်ဦးက သျှမ်းသံတော်ဆင့်ကို ပြောသည်။

“သီပေါတံတားက ပိတ်ထားတုန်းပါ။ ကားကတော့ သွားလာလို့မရဘူး။ လူတွေတော့ အရင်လို လမ်းလျှောက်သွားနေကြရတယ်။ လူနာပို့ရင်တော့ လမ်းလျှောက်ဖြတ်ရတုန်းပဲ။ စက်လှေနဲ့လည်း  ကူးတာတော့ရှိတယ်။”ဟု သီပေါမြို့ဒေသခံအမျိုးသားတစ်ဦးက ပြောသည်။

ထိုသီပေါတံတားပိတ်ထားခြင်းကြောင့် ဖောင်ဆိပ်မှ တဆင့် သွားလာနေသူများလည်းရှိကြောင်း၊ လူတစ်ဦလျှင် ကျပ်ငွေ ၁ သောင်း ဆိုင်ကယ်တစ်စီးလျှင် ကျပ်ငွေ ၂သောင်းအထက် ပေးရကြောင်း ၎င်းကဆိုသည်။

အဆိုပါ သီပေါတံတားကို အမြန်ဆုံးပြန်လည်ဖွင့်ပေးရန် ခရီးသွားပြည်သူများ၊ကားသမားများ နှင့် ဒေသခံများက မျှော်လင့်နေကြကြောင်းကို သီပေါမြို့ ဒေသခံအမျိုးသားတစ်ဦးက ဆက်ပြောသည်။ 

“အခုက ပိတ်ထားတာ ၈ လနီးပါးရှိနေပြီ။ ပြန်တော့ ဖွင့်စေချင်တာပေါ့။ တံတားတွေဖွင့်လာရင် အလုပ်လုပ်လို့လည်းအဆင်ပြေမယ်။ အားလုံးကလည်း ဖွင့်ဖို့ပဲ မျှော်လင့်နေကြတာ။အခုလို ပိတ်ထားတော့ ပြည်သူတွေက ဘာမှပြောလို့မရဘူး။ အခုတံတားမှာတော့ စစ်ကောင်စီပဲရှိတာ။” ဟု ၎င်းက ဆက်ပြောသည်။

စစ်ကော်မရှင်တပ် နှင့်  MNDAA တို့သည် သီပေါတံတားကို အပြန်အလှန် ပိတ်ဆို့ထားခဲ့ရာ ပြီးခဲ့သည့် ၂၀၂၆ ခုနှစ်ဇန်နဝါရီလ ၂ ရက်တွင် MNDAA ဘက်က ဂိတ်နေရာမှ ဆုတ်ခွာပေးခဲ့သော်လည်း စစ်ကော်မရှင်တပ်ဘက်က ဆက်လက်ပိတ်ထားဆဲဖြစ်သည်။

ဒေသခံများကမူ သွားလာရေး၊ ကုန်စည်စီးဆင်းရေးနှင့် အရေးပေါ်လူနာပို့ဆောင်ရေးတို့  ပုံမှန်ပြန်လည်လည်ပတ်နိုင်ရန်သီပေါတံတားကို အမြန်ဆုံး ပြန်လည်ဖွင့်လှစ်ပေးစေလိုကြောင်း ဒေသခံများက တောင်းဆိုထားသည်။

စစ်ကော်မရှင်တပ်က သီပေါမြို့ကို TNLA တပ်ဖွဲ့ထံမှ ပြန်လည်တိုက်ခိုက် သိမ်းပိုက်ခဲ့ပြီးနောက် ပြည်ထောင်စုလမ်းမကြီးပေါ်ရှိ သီပေါ – လားရှိုးလမ်းပိုင်း နှင့် လားရှိုး-မိုင်းရယ် လမ်းပိုင်းများမှ MNDAA တပ်ဆုတ်ခွာရန် ၂၀၂၅ခုနစ် နိုဝင်ဘာလ၁၁ ရက်တွင် လားရှိုးမြို့၌ တွေ့ဆုံစဉ် တောင်းဆိုခဲ့သည်။

သို့သော် ဆွေးနွေးမှု အဆင်မပြေဘဲ နှစ်ဘက် စစ်ရေးတင်းမာကာ အပြန်အလှန် လမ်းပိတ်ထားခဲ့ခြင်း ဖြစ်သည်။