သျှမ်း-ကယား နယ်စပ် မိုးဗြဲမြို့ အနောက်ဘက်ခြမ်းကို စစ်တပ်မှ စစ်ကြောင်းထိုးနေပြီး၊ စစ်ရှောင်များတည်ရှိသည့် နေရာများကို ဉီးတည်ကာ လေကြောင် ဗုံးကြဲတိုက်ခိုက်ခဲ့ကြောင်း သတင်းရရှိသည်။

ပြီးခဲ့သည့် ဇွန်လ ဒုတိတယပတ်မှစပြီး မိုးဗြဲမြို့ အနောက်ဘက်ခြမ်းကို စစ်ကော်မရှင်တပ်က အင်အားအလုံးရင်းဖြင့် စစ်ကြောင်းထိုးခဲ့ပြီ တော်လှန်ရေးအင်အားစုတပ်ဖွဲ့ များနှင့် ထိတွေ့တိုက်ပွဲများ စတင် ဖြစ်ပွားခဲ့သည်။

ထို့အပြင် စစ်ကော်မရှင်တပ်က မိုးဗြဲမြို့အနောက်ဘက်ခြမ်းရှိ ကောင်ဝှက်ကျေးရွာအနီးရှိ စစ်ရှောင်များ တည်ရှိသည့်နေရာကို ဉီးတည်ကာ ယနေ့ (ဇွန် ၁၈) ရက် မနက် ၁နာရီဝန်းကျင် လေကြောင်းဖြင့် ဗုံးကြဲတိုက်ခိုက်မှုများ လုပ်ဆောင်ခဲ့ကြောင်း သိရသည်။

“ ညရောက်ရင် လေယာဉ်နဲ့ ဗုံးတွေကြဲတယ်။ လေယာဉ်သံကြားရင် ဗုံးခိုကျင်ထဲပြေးဆင်ရတာ အမောပဲ။ မနက် ၁နာရီ ဗုံးကြဲတော့ တော်သေးတယ် လူတော့မထိဘူး။ ညဆိုအိပ်မပျော်ဘူး။ ကြောက်နေရတယ်” ဟု စစ်ရှောင်အမျိုးသားတစ်ဉီးက သျှမ်းသံတော်ဆင့်ကိုပြောသည်။

လက်ရှိ အခြေအနေသည့် စစ်ရေးတင်းမာနေသည့်အတွက် သွားလာမှု သတိရှိနေရကြောင်း၊ စစ်ကော်မရှင်၏ စစ်ကြောင်းများလည်း ထပ်မံဖြည့်တင်းနေသည့်အတွက် တိုက်ပွဲပြင်းထန်လာမည်နှင့် လေကြောင်းဗုံးကြဲမှု ဆက်တိုက်ဖြစ်လာမည်ကိုလည်း စိုးရိမ်နေရသည်ဟု ၎င်းကဆိုသည်။

ထို့အပြင် သျှမ်း-ကယားနယ်စပ် ဖြစ်သည့် ပင်လောင်းမြို့နယ် ဆောင်းပြောင်း၊ နန်းနမ့်ဘက်တွင်လည်း စစ်ကော်မရှင်တပ်က အင်အား (၂၀၀)နီးပါး ဖြည့်တင်းထားပြီး စစ်ဆေးမှုများ တင်းကြပ်နေကြောင်း သိရသည်။

“ပင်လောင်းကနေ ကရင်နီနယ်စပ်ဘက် သွားမဲ့သူဆို ပိုစစ်တယ်၊ လမ်းမှာက ဂိတ်ဆယ်ခုလောက်ရှိတယ်၊ ဆိုင်ကယ်နဲ့သွားရင် တူးဘောက်တွေစစ်တယ်၊ မှတ်ပုံတင်စစ်တယ်၊ သူတို့မကြည်ရင် ရစ်တယ်၊ ပိုက်ဆံတောင်းတယ်။အဲဘက်သွားရင် ဘုရားတနေရတယ်။”ဟု ပင်လောင်းဒေသခံ အမျိုးသမီးတစ်ဦးက ပြောသည်။

ပြီးခဲ့သည့် ဇွန်လ (၁၅)ရက်တွင်လည်း စစ်ကော်မရှင်တပ်က နန်းမယ်ခုံမြို့နယ်အတွင်း ဒရုန်းဖြင့် ဗုံးကြဲတိုက်ခိုက်ခြင်းကြောင်း ဒေသခံ (၂)ဦး ထိခိုက်ဒဏ်ရာ ရရှိခဲ့ကြောင်း သိရသည်။

ယခုလက်ရှိ မိုးဗြဲမြို့ နှင့် ဖယ်ခုံမြို့နယ်တွင် စစ်ကော်မရှင်တပ်က အင်အားအလုံးရင်းဖြင့် စစ်ကြောင်းထိုးမှုများ ပြုလုပ်နေပြီး မကြာခဏ ထိတွေ့တိုက်ပွဲဖြစ်ပွားနေကြောင်း သိရသည်