သျှမ်းပြည် တောင်ကြီးမြို့အတွင်းရှိ ရပ်ကွက်အချို့တွင် စစ်ကော်မရှင်တပ်အတွက် စစ်မှုထမ်းကြေး အပြင် “ စစ်အသုံးစရိတ်”ဟုဆိုကာ ဒေသခံများထံ ငွေကြေးများ ထပ်မံ ကောက်နေကြောင်း စုံစမ်းသိရသည်။
တောင်ကြီးမြို့ရှိ စိန်ပန်းရပ်ကွက်၊ ရွှေတောင်ရပ်ကွက်၊ ကျောင်းကြီးစုရပ်ကွက် နှင့် ဘုရားဖြူရပ်ကွက် အချို့တို့တွင် စစ်ကော်မရှင်တပ်က စစ်မှုထမ်းကြေးအပြင် စစ်အသုံးစရိတ် အမည်ဖြင့် ငွေကြေးများကောက်ခံနေကြောင်း ငး တောင်ကြီးမြို့ အသက် ၂၀အရွယ်ရှိလူငယ် တစ်ဦးက သျှမ်းသံတော်ဆင့်ကို ပြောသည်။
“သူတို့ကောက်တဲ့လဆို ၃ သောင်းပေးရတယ်။ ကျနော်တို့ဘက်ကိုတော့ လတိုင်း မကောက်ဘူး။ အိမ်တိုင်းလည်း မထည့်ဘူး။ မထည့်ရင် စစ်မှုထမ်း ကောက်တဲ့ အချိန် ကိုယ်ဖြစ်ကိုယ်ခံလို့ ပြောတယ်။ အိမ်ကအမေတော့ပေးနေရတာပဲ။”ဟု ၎င်းလူငယ်ကဆိုသည်။
အဆိုပါ စစ်အသုံးစရိတ်ကို ရပ်ကွက်အချို့တွင် ကောက်ခံမှုမရှိသေးကြောင်း စစ်မှုထမ်းကြေးအပြင် ခေါင်းစဉ်းအမျိုးမျိုးဖြင့် စစ်ကော်မရှင်တပ်က ငွေကောက်ခံနေကြောင်းကို တောင်ကြီးမြို့ရှိ ရပ်ကွက်အုပ်ချုပ်ရေးမှူးနီးစပ်သည့် အသက် ၄၀ကျော် အမျိုးသားတစ်ဦးက အတည်ပြုပြောဆိုသည်။
“စစ်မှုထမ်းကြေးက တမျိုး၊ ၊ဒီစစ်အသုံးစရိတ်က တမျိုးပေါ့။ ခေါင်းစဉ်အမျိုးမျိုးနဲ့ ပြောပြီး ကောက်တာ။ ၃ သောင်းကျပ် အနည်းဆုံး ကနေ ၂ သိန်းကျပ်ထိ ကောက်တယ်။ စစ်တပ်က ကိုယ်တိုင်ကောက်တာ။ မထည့်ရင်တော့ ရစ်ခံရတာပေါ့။စားစရာမရှိ ပေးစရာရှိဆိုတာ အဲ့တာပဲ လတိုင်းပေးရတာ။ တန်းတူ ကောက်တာမဟုတ်ဘူး။”ဟု ၎င်းအမျိုးသားကဆိုသည်။
အဆိုပါ စစ်မှုထမ်းကြေး နှင့် စစ်အသုံးစရိတ်များကြောင့် ဒေသခံများ ငွေကြေးအခက်အခဲများ ကြုံတွေ့နေရကြောင်း တောင်ကြီးမြို့ အသက် ၂၀ အရွယ်ရှိလူငယ်က ဆက်လက်ပြောသည်။
“အိမ်က အမေ ပေးနေရင်လည်း ငါတို့က အလုပ်လုပ်ပြီး ပြန်ရှာပေး နေရတာပဲ။ သုံးဖို့မကျန်လည်း ရှာရတာပဲ မတက်နိုင်ဘူး။ မထည့်ရင်လည်း စစ်မှုထမ်းခေါ်ခံရတာ ဖြစ်ဖြစ် ရပ်ကွက်အုပ်ချုပ်ရေးမှုတွေက လိုက်မညှိပေးဘူး ပြောလို့။”ဟု ၎င်းက ပြောသည်။
ပြီးခဲ့သည့် ၂၀၂၄ ခုနှစ် ဖေဖော်ဝါရီလတွင် စစ်ကော်မရှင်ဘက်မှ စစ်မှုထမ်းဥပဒေကို အတည်ပြု ထုတ်ပြန်ပြီးနောက် သျှမ်းပြည်အတွင်းရှိ လူငယ်များသည် နိုင်ငံရပ်ခြားသို့ ပြောင်းရွှေ့ အလုပ်လုပ်ကိုင်ခဲ့ကြပြီး မြန်မာတစ်နိုင်ငံလုံးတွင် စစ်မှုထမ်းကြေးများ၊ တိုင်းရင်းသား လက်နက်ကိုင် ထိန်းချုပ်နယ်မြေများတွင်လည်း ဆက်ကြေးများ လစဉ် ထည့်နေကြရသည်။
အလားတူ ပြီးခဲ့သည့် ဧပြီလတွင်လည်း တောင်ကြီးမြို့နယ် ကျောက်တလုံးမြို့နယ်ခွဲတွင် ၆ လတစ်ကြိမ် ခေါင်းစဉ်အမျိုးမျိုးဖြင့် ပအိုဝ်းပြည်သူ့စစ်တပ်ဖွဲ့(PNO)မှ ငွေများ ကောက်ခံခဲ့ ကြောင်းသိရသည်။
Leave a Comments