သျှမ်းပြည်တောင်ပိုင်း၊ ပင်းတယမြို့ မြို့မဈေးတွင် အုတ်တံတိုင်းပြိုကျသဖြင့် ဈေးသည်အမျိုးသမီးတစ်ဦး ထိခိုက် သေဆုံးပြီး၊ တစ်ဦးဒဏ်ရာရရှိခဲ့ကြောင်း သတင်းရရှိသည်။

ယ‌မန်နေ့ မေလ ၁၂ ရက် နံနက် ၇ နာရီ ဝန်းကျင်တွင် ပင်းတယမြို့မဈေးအနောက် မြောက်ဘက် လူနေအိမ် အုတ်တံတိုင်း ပြိုကျသဖြင့် ထိုအနီးတွင်  ဈေးရောင်းနေသည့် အသက် ၆၀ ဝန်းကျင် အမျိုးသမီးနှစ်ဦးပေါ်သို့ ပိမိခဲပြီး  တစ်ဉီးသေဆုံးကာ၊ တစ်ဦးဒဏ်ရာရရှိခဲ့ကြောင်း သတိရသည်။

“သူတို့က ဈေးမှာ ဟင်းသီးဟင်းရွက်တွေ ရောင်းနေကြတာ။  မိုးက ရက်ဆက်ရွာတော့ အဲအုတ်တံတိုင်းက ပြိုကျသွားတာ၊အုတ်တံတိုင်းက ၆ ပေကျော်တယ်။ ပိမိတာတော့ ‌အမျိုးသမီးနှစ်ယောက် ကိုပါ။ ဆေးရုံကိုပို့လိုက်တာ။ တစ်ယောက်က ဆေးရုံမှာဆုံးတယ်။ တစ်ယောက်က ဆေးရုံမှာ က်တက်နေရတုန်းပဲ။”ဟု ကိုယ်တိုင်မြင်တွေ့ခဲ့သည့် အမျိုးသားတစ်ဉီးက သျှမ်းသံတော်ဆင့်ကိုပြောသည်​။

အဆိုပါ သေဆုံးသည် ရေဖြူကျေးရွာအုပ်စု ၊ကျောက်တောကျေးရွာတွင်နေထိုင်သည့် အသက် ၆၀ဝန်းကျင် ဒေါ်မြင့်နိုင်ဖြစ်ပြီး၊ ဦးခေါင်း ဒဏ်ရာဖြင့်  ပင်းတယ ဆေးရုံတွင် သေဆုံးသွားခဲ့ကြောင်း ၎င်းအမျိုးသားက ဆက်ပြောသည်။

ထို့အပြင် ဒဏ်ရာရရှိသူသည် ပင်းတယမြို့ ပေါက်တောရပ်ကွက်တွင် နေထိုင်သည့် ဒေါ်ခင်ရီဖြစ်ပြီး၊ မေးစေ့နှင့် ပေါင်ပေါက်ပြဲ ဒဏ်ရာဖြင့် ဆေးကုသမှု ခံယူနေရကြောင်း သိရသည်။

ပင်းတယ အပါအဝင် သျှမ်းတောင်တွင် သုံးရက်ဆက်တိုက် မိုးရွာသွန်းမှုကြောင့် မြေသားများပြော့ကာ မြေပြိုမှုများ ရေကြီးရေလျှံမှုများ ဖြစ်ပွားခဲ့ကြောင်း ဒေသခံများက ပြောသည်။ 

“ဒီလို အုတ်တံတိုင်း ပိပြီး သေတယ်ဆိုတာ ဒါပထမဆုံးကြားဖူးတာပဲ၊ သူတို့လည်း ဝမ်းရေးအတွက် ဈေးရောင်းရင်း ဒီလိုဖြစ်တော့ စိတ်မကောင်းဘူး၊အရင်နှစ်တုန်းက ပင်းတယမှာ မြေပြိုပြီး လူသေခဲ့တော့ အခုနှစ်မိုးရာသီလည်း ကြောက်နေရတယ်၊ စိတ်ဖြောင့်ဖြောင့်လည်း မအိပ်ရဲဘူး။”ဟု ပင်းတယ ဒေသခံ အမျိုးသမီး တစ်ဉီးက သျှမ်းသံတော်ဆင့်ကိုပြောသည်။​

မိုးဦးရာသီ အစဖြစ်သောကြောင့် မြေသားပျော့သည့် နေရာများ ချောင်း၊ ကမ်းပါးဘေးနှင့် တောင်စောင်းများတွင် သွားလာမှုများ မလုပ်သင့်ကြောင်း အဆိုပါ အမျိုးသမီးက အကြံပြုပြောထားသည်။

မိုးရာသီအစပိုင်းဖြစ်သော်လည်း သျှမ်းတောင်တွင် ရက်ဆက် မိုးရွာသွန်းမှုကြောင့် ရေကြီးကာ ကောက်ပဲသီးနှံနှင့် စိုက်ခင်းများ ရေဝင်ကာ ပျက်စီးကုန်ကြောင်း သိရသည်။

ပြီးခဲ့သည့် ၂၀၂၅ခုနှစ် ဇူလိုင်လတွင်လည်း ပင်းတယမြို့နယ် ကုန်းစောင်းကျေးရွာနှင့် အုံအက်ကျေးရွာတွင် ညအချိန် တောင်ကျရေ ရုတ်တရက်ဝင်ရောက်ကာ  လူ(၈)ဦးသေဆုံး သွားပြီး စာသင်ကျောင်းများ နေအိမ်အဆောက်ဦးနှင့် လမ်းများ ထိခိုက်ပျက်စီးခဲ့သည်။