သျှမ်းပြည်တောင်ပိုင်း၊တောင်ကြီးမြို့ ရွှေဘုန်းပွင့်သွားလမ်းတွင် အမျိုးသမီးတစ်ဦး ဓားပြတိုက်ခံရပြီး ပစ္စည်းများ လုယက်ခံရကြောင်း သတင်းရရှိသည်။

ပြီးခဲ့သည့် မေလ (၂) ရက် နေ့လည် ၁၁နာရီတွင် ရွှေဘုန်းပွင့်ဘုရား လမ်းအတက်တွင် နေ့လည်ခင်း အချိန်တွင် အမျိုးသားနှစ်ဦးမှ ဓာတ်ပုံလာရိုက်သည့် အမျိုးသမီးနှစ်ဦးထံသို့ ကပ်လာပြီး ဓားဖြင့်ထောက်ကာ ပါလာသည့် ပစ္စည်းများကို ပေးရန်ခြိမ်းခြောက် ကာလုယက်သွားခဲ့ကြောင်း သိရသည်။

“ဓာတ်ပုံရိုက်နေတုန်း အမျိုးသားနှစ်ဦးက လာပြီး ဓားနဲ့လာထောက်တယ်၊ ပါလာတဲ့ ပစ္စည်းအကုန်ပေး ပြောတယ် အသက်ပါမှာကြောက်လို့ လက်ကိုင်အိတ်ပေးလိုက်ရတယ် လက်ကိုင်အိတ်ထဲမှာ ပိုက်ဆံခြောက်သောင်းနဲ့ အလှကုန်ပစ္စည်းတွေ ပါသွားတယ်၊အရမ်းလည်း ကြောက်သွားတယ်။”ဟု ကိုယ်တိုင်ကြုံတွေ့ခဲ့သည့် အမျိုးသမီးတစ်ဦးက ပြောသည်။

ထိုသို့ ဓားပြတိုက်နေသော အမျိုးသားမှာ ၃၀ ဝန်းကျင်အမျိုးသားများ ဖြစ်ကြပြီး လူပြတ်သည့်နေရာသို့ ပစ်မှတ်ထားကာ တစ်ယောက်တည်း ဆိုင်ကယ်မောင်းနှင်သူများကို လုယက်ကြောင်း သိရသည်။

အလားတူ ပြီးခဲ့သည့် ၂၀၂၅ခုနှစ် ဒီဇင်ဘာလတွင်လည်း တောင်တက်သွားသည့် လူငယ်အုပ်စုသည် လူစုကွဲကာ လူစောင့်နေရာမှ ဓားထောက်ကာ ဓားပြတိုက်ခံရပြီး ဖုန်းပါသွားကြောင်း သိရသည်။

“ကျမ ဓားပြတိုက်တာ တခါကြုံဖူးတယ်။ အဲတုန်းက အုပ်စုလိုက်သွားတာတောင် ဓားပြတိုက်ခံရတာ အခုချိန် တစ်ယောက်တည်း သွားရင် အသက်ပါ ကျန်မှာမဟုတ်ဘူး၊ အရမ်းကြောက်ဖို့ကောင်းတယ်၊ နောက်ကနေ ဓားလာထောက်ပြီး ဆိုင်ကယ်တောင်းတာ ဆိုင်ကယ်က သူငယ်ချင်းနားမှာဆိုတော့ မပါသွားဘူး။ ဖုန်းပါသွားတယ်။”ဟု ကိုယ်တိုင်ကြုံတွေ့ခဲ့ရသည့် အမျိုးသမီးတစ်ဦးက ပြောသည်။

ထို့အပြင် မြို့ခံများသည် နေ့လည်နေ့ခင်း အချိန်တွင် ရွှေဘုန်းပွင့် ဘုရားနှင့် မြစိမ်းတောင် ဘုရားသို့ မသွားရဲတော့ကြောင်းနှင့် မဖြစ်မနေသွားရလျှင် လူအများနှင့် သွားသင့်ကြောင်း အဆိုပါ အမျိုးသမီးတစ်ဦးက အကြံပြုပြောထားသည်။

ယခုလက်ရှိတောင်ကြီးမြို့တွင် ခိုးဆိုးလုယက်မှုများ မကြာခဏ ဖြစ်ပေါ်နေသည့် အပြင် ပေါ်တာဆွဲ ဖမ်းဆီးမှုများပါ ကြုံနေရကြောင်းနှင့် အဆိုပါ ရွှေဘုန်းပွင့် သွားလမ်းတွင် တစ်လလျှင် တကြိမ် ဓားပြတိုက်ခံရမှုများ ကြုံနေကြောင်း သိရသည်။

ပြီးခဲ့သည့် ဖေဖော်ဝါရီလ နောက်ဆုံးပတ်တွင်လည်း တောင်ကြီးမြို့နယ် ရွှေဘုန်းပွင့် ဘုရားသွားလမ်းတွင် စစ်ကော်မရှင်တပ်သားများသည် လူပြတ်သည့်နေရာတွင် စောင့်ဆိုင်းပြီး အမျိုးသမီးအပါဝင် လူငယ် (၅)ဦးကို ဖမ်းဆီးသွားခဲ့ကြောင်း သိရသည်။