ထိုင်း-မြန်မာနယ်စပ်၊ ချင်းရိုင်ပြည်နယ် မယ်ဖားလုံခရိုင်အတွင် ထိုင်းလုံခြုံရေးတပ်ဖွဲ့မှ စိတ်ကြွရူးသွပ်ဆေးပြား (ယာဘ) ၂ သန်းကျော် သယ်ဆောင်လာသူ ၁၅ ဦးအား ပစ်ခတ်ဖမ်းဆီးပြီး မှောင်ခိုသမား ၂ ဦး သေဆုံးကြောင်း Chiang Mai News တွင်ဖော်ပြသည်။

ယမန်နေ့ (ဧပြီလ ၂၉ ရက်) နံနက်အစောပိုင်း ၅ နာရီခွဲခန့်တွင် ဖာမိူင်း (Pha Muang) စစ်ဆင်ရေးတပ်ဖွဲ့ဝင်များသည် ပန်မဟန်ကျေးရွာ (Pang Mahan) အနီး တောတွင်း၌ ကင်းလှည့်နေစဉ် ကျောပိုးအိတ်များ လွယ်ဆောင်လာသည့် မသင်္ကာဖွယ် လူ ၁၀ ဦးကျော်ကို တွေ့ရှိခဲ့သည်။

အာဏာပိုင်များက စစ်ဆေးရန် ကြိုးပမ်းစဉ် အဆိုပါအဖွဲ့က စတင်ပစ်ခတ်ခဲ့သဖြင့် ၅ မိနစ်ခန့်ကြာ အပြန်အလှန်ပစ်ခတ်မှုများ ဖြစ်ပွားခဲ့သည်။

ပစ်ခတ်မှုများအပြီး နယ်မြေရှင်းလင်းရေးလုပ်ဆောင်ရာတွင် အခင်းဖြစ်ပွားရာနေရာ၌ သေဆုံးနေသည့် သံသယရှိသူ အမျိုးသား ၂ ဦး၏ ရုပ်အလောင်းနှင့်အတူ စိတ်ကြွဆေးပြား ၂,၄၀၀,၀၀၀ ခန့် ထည့်ထားသည့် ကျောပိုးအိတ် ၁၂ အိတ်ကို ရှာဖွေတွေ့ရှိခဲ့သည်။

ဖာမိူင်းစစ်ဆင်ရေးအဖွဲ့မှူး ဗိုလ်ချုပ် ဆသစ် (Sathit Wainon) က ယခုဖြစ်စဉ်ကြောင့် မြောက်ပိုင်းနယ်စပ်တစ်လျှောက် မူးယစ်ဆေးဝါး မှောင်ခိုကူးသန်းမှုများကို ပိုမိုတင်းကျပ်စွာ စောင့်ကြည့်ရန်နှင့် မူးယစ်ကွန်ရက်များကို အမြစ်ပြတ်ခြေမှုန်းရန် တပ်ဖွဲ့ဝင်အားလုံးကို အမိန့်ထုတ်ပြန်ထားသည်။

လက်ရှိတွင် သိမ်းဆည်းရမိသည့် မူးယစ်ဆေးဝါးများကို သက်သေအဖြစ် သိမ်းဆည်းထားပြီး ပါဝင်ပတ်သက်သူများကို ဆက်လက်ခြေရာခံလျက်ရှိကြောင်း သိရသည်။

အလားတူ တစ်ရက်တည်းတွင် ထိုင်း-လာအိုနယ်စပ်၊ နောင်ခိုင်ပြည်နယ်အတွင်း၌ အိမ်နီးချင်းနိုင်ငံမှ မှောင်ခိုသွင်းလာသည့် ကာလတန်ဖိုး ဘတ် သန်း ၁၀၀ နီးပါးရှိ အိုက်စ် (Crystal Meth) ၂၄၈ ကီလိုဂရမ်ကို ထိုင်းရဲတပ်ဖွဲ့က ကြားဖြတ်ဖမ်းဆီးနိုင်ခဲ့ကြောင်း Khaosod သတင်းတွင် ဖော်ပြသည်။

မူးယစ်ဆေးများကို ဒူးရင်းသီးနှင့် လက်ဖက်ခြောက်ပုံများ ရိုက်နှိပ်ထားသည့် ထုပ်ပိုးမှုများဖြင့် ဖုံးကွယ်ထားပြီး ထိုင်းနိုင်ငံအတွင်းပိုင်းရှိ ခရီးသွားလုပ်ငန်း ထွန်းကားရာဒေသများသို့ ဖြန့်ဖြူးရန် စီစဉ်ထားခြင်းဖြစ်ကြောင်း ပြည်နယ်ရဲတပ်ဖွဲ့က ဆိုသည်။

မူးယစ်ဆေးဝါးများသည် ထိုင်းနိုင်ငံအတွင်းသို့ လာအိုဘက်မှ ဝင်ရောက်လာသော်လည်း မူလရင်းမြစ်သည် ရွှေတြိဂံဒေသနှင့် အထူးသဖြင့် မြန်မာနိုင်ငံဘက်ခြမ်းမှ ဖြစ်နိုင်ချေရှိကြောင်းသိရသည်။

ကိုးကား – Chiang Mai News / Khaosod English