ထိုင်းနိုင်ငံ ချင်းမိုင်မြို့တွင် ထိုင်းနိုင်ငံသားများကို အလုပ်အကိုင်အတုများဖြင့် လှည့်ဖြားကာ ဖမ်းဆီးချုပ်နှောင်ပြီး အွန်လိုင်းငွေလိမ်မှုမှ ရရှိသောငွေများကို ငွေကြေးခဝါချခိုင်းနေသည့် တရုတ်ဂိုဏ်းခေါင်းဆောင်နှင့် အဖွဲ့ဝင်များကို ထိုင်းရဲတပ်ဖွဲ့က စီးနင်းဖမ်းဆီးလိုက်ကြောင်း Chiang Mai News တွင်ဖော်ပြသည်။

ယနေ့ (ဧပြီလ ၂၉ ရက်) တွင် အမှတ်် (၅) ခရိုင် ရဲတပ်ဖွဲ့မှူး ရဲချုပ် ကရစ်သဖွန် (Krittapon Yisakorn) နှင့် အခြားအဆင့်မြင့်အရာရှိများ၊ သတင်းအချက်အလက်နည်းပညာ ရာဇဝတ်မှုနှိမ်နင်းရေးအဖွဲ့ဝင်များ ဦးဆောင်ကာ အွန်လိုင်းငွေလိမ်လုပ်ငန်းများကို ဦးဆောင်နေသည့်် တရုတ်ဂိုဏ်းခေါင်းဆောင်တစ်ဦးအား ဖမ်းဆီးရမိမှုနှင့် ပတ်သက်ပြီး သတင်းစာရှင်းလင်းပွဲပြုလုပ်ခဲ့သည်။

ယခုဖမ်းဆီးရမိသည့် ဂိုဏ်းသည် အိမ်အကူအလုပ် သို့မဟုတ် အွန်လိုင်းထီလုပ်ငန်းများဖြင့် Facebook မှတစ်ဆင့် စည်းရုံးပြီးနောက် သားကောင်ဖြစ်သူများကို ဟိုတယ်နှင့် အိမ်ငှားများတွင် ပိတ်လှောင်ထားကာ ၎င်းတို့၏ ကိုယ်ပိုင်ဘဏ်အကောင့်များမှတစ်ဆင့် ငွေလွှဲခိုင်းခြင်း၊ မျက်နှာစကင်ဖတ်ခိုင်းခြင်းတို့ကို အတင်းအဓမ္မ ပြုလုပ်ခိုင်းခဲ့ခြင်း ဖြစ်သည်။

ထိုကဲ့သို့ လူကိုဖမ်းဆီးချုပ်နှောင်ပြီး ဘဏ္ဍာရေးရာဇဝတ်မှု ကျူးလွန်ခိုင်းသည့် နည်းလမ်းမှာ ချင်းမိုင်ဒေသတွင် ပထမဆုံးအကြိမ် တွေ့ရှိရခြင်း ဖြစ်သည်။

အဆိုပါဂိုဏ်းသည် လိမ်လည်ရရှိသော ငွေများကို ခြေရာဖျောက်ရန်အတွက် တန်ဖိုးကြီး iPhone 17 Pro Max ဖုန်းများနှင့် ရွှေတုံးများကို ဝယ်ယူလေ့ရှိပြီး ၎င်းပစ္စည်းများကို လက်လီဆိုင်များသို့ ပြန်လည်ရောင်းချကာ ငွေသားအဖြစ် ပြောင်းလဲခဲ့ကြသည်။

ရဲတပ်ဖွဲ့၏ စီးနင်းမှုအတွင်း တရုတ်အမျိုးသားနှစ်ဦးနှင့် ၎င်းတို့အား ကူညီပေးခဲ့သည့် ထိုင်းအမျိုးသမီးတစ်ဦးကို ဖမ်းဆီးရမိခဲ့ပြီး iPhone အလုံး ၂၀ ထပ်မံဝယ်ယူမည့် အထောက်အထားများကိုလည်း တွေ့ရှိခဲ့သည်။

ထို့အပြင် တရားမဝင်ငွေများ လက်ခံရန် အသုံးပြုခဲ့သည့် ထိုင်းနိုင်ငံသားများ၏ မှတ်ပုံတင်ဓာတ်ပုံများ (အဆိုပါပိုင်ရှင်များမှာ ထိုင်းရဲတပ်ဖွဲ့၏ အွန်လိုင်းစနစ် (TPO) တွင် သံသယရှိသူများအဖြစ် စာရင်းသွင်းခံထားရသူများ ဖြစ်သည်) ကိုလည်း သက်သေအဖြစ် သိမ်းဆည်းရမိခဲ့သည်။

လက်ရှိတွင် ပစ်မှတ်ထားခံခဲ့ရသည့် နစ်နာသူ အနည်းဆုံး ၃ ဦး ပေါ်ထွက်လာပြီး ၎င်းတို့အားလုံးမှာ ခြိမ်းခြောက်ခံရ၍ ငွေလွှဲပေးခဲ့ရခြင်း ဖြစ်ကြောင်းသိရသည်။

ရဲချုပ် ကရစ်သဖွန်က မိမိ၏ ကိုယ်ပိုင်ဘဏ်အကောင့် သို့မဟုတ် Banking App များကို အသုံးပြုခိုင်းသည့် မသင်္ကာဖွယ် အလုပ်ခေါ်စာများကို မယုံကြည်ကြရန်နှင့် အဆိုပါကွန်ရက်တွင် ပါဝင်ပတ်သက်နေသူအားလုံးကို ဆက်လက်ဖော်ထုတ်သွားမည်ဖြစ်ကြောင်း သတိပေးပြောကြားခဲ့သည်။

ကိုးကား – Chiang Mai News