သျှမ်းပြည်တောင်ပိုင်း၊ ရွာငံမြို့နယ် ရွာငံ-အောင်ပန်း သွားလမ်း၌ စစ်ကော်မရှင်တပ်က ရှောင်တခင်ဝင်ရောက် စစ်ဆေးမှုများ ပြုလုပ်နေကြောင်း သတင်းရရှိသည်။

သင်္ကြန်ကာလအပြီး ဧပြီလ ၂၀ရက်မှ စပြီး စစ်ကော်မရှင်တပ်က အင်အားအလုံးရင်းဖြင့် ရွာငံ-အောင်ပန်း လမ်းမ၌ ရှောင်တခင် စစ်ဆေးမှုများ ပြုလုပ်ခဲ့ပြီး ခရီးသွားပြည်သူများ၏ ဖုန်း၊ ဆိုင်ကယ် နှင့် ကားများကို စစ်ဆေးခြင်းအပြင် မှတ်ပုံတင်များကို စစ်ဆေးမှုများ ပြုလုပ်နေကြောင်း သိရသည်။

“တစ်ခါတစ်ခါ လာရင် စစ်ကား ငါးစီးနဲ့လာတယ်၊ လမ်းရဲ့ တစ်နေရာစီမှာ ကားတစ်စီး စီရပ်နားပြီး စစ်တာ၊ ဖုန်းတွေ စစ်တယ် မှတ်ပုံတင်တွေစစ်တယ် ပါလာတဲ့ ပစ္စည်းတွေ စစ်တယ်၊ တစ်ခုခုသတင်းရလို့ များလားတော့ မသိဘူး၊ သူတို့က မသင်္ကာဖြစ်တဲ့ သူကိုဆို အရမ်းရစ်တယ် တော်တော်နဲ့ ပေးမသွားဘူး၊ စောင့်ခိုင်းပြီး စစ်တာ။”ဟု ခရီးသွား အမျိုးသားတစ်ဦးက ပြောသည်။

ထိုသို့ ရှောင်တခင် စစ်ဆေးမှုများပြုလုပ် နေသောကြောင့် ခရီးသွားလာသူ ပြည်သူများနှင့် တောင်ယာသွားသည့် ရွာငံဒေသခံများ လမ်းခရီးနှောင့်နှေးမှုများ ကြုံနေရကြောင်း အဆိုပါ ခရီးသွား အမျိုးသားက ပြောသည်။

ထို့အပြင် ရွာငံ-အောင်ပန်းလမ်းရှိ စစ်ကော်မရှင်တပ် ဂိတ်များတွင်လည်း ခရီးသွား ပြည်သူများကို စစ်ဆေးမှုများ တင်းကြပ်နေပြီး မှတ်ပုံတင် မလဲလှယ်ထားသူနှင့် ခရီးသွားများ၏ မှတ်ပုံတင်များကို ကြည့်၍ စစ်ဆေးကာ ငွေညစ်နေကြောင်း သိရသည်။

“မှတ်ပုံတင်က မလဲရသေးတော့ သူတို့က ငွေတောင်းတယ် ငါးထောင်ကျပ် တောင်းတယ်၊ တစ်ချို့ဆို မှတ်ပုံတင်ကြည့်ပြီး ယောကျာ်းလေးတွေဆို ဘယ်သွားလဲ ဘယ်လာလဲ နဲ့စစ်တာ ပြီးတော့ မှတ်ပုံတင်ကြည့်ပြီး သူတို့ဂိတ်တဲထဲကို ခေါ်သွားတာ၊ သူတို့ငွေညှစ်ပြီး စစ်ဆေးလို့ကြာပြီးမှ ခရီးပေးသွားတာ။”ဟု ကိုယ်တိုင်ကြုံတွေ့ရသူ ခရီးသွား အမျိုးသားတစ်ဦးက ပြောသည်။

နိုင်ငံရေး အခြေအနေ မတည်ငြိမ်မှုကြောင့် ခရီးသွားပြည်သူများ အနေဖြင့် မလိုအပ်ပဲ ခရီးသွားလာမှု မပြုလုပ်ကြရန်နှင့် ဒေသခံလမ်းခရီးအခြေနေများကို စုံစမ်းပြီး ခရီးသွားလျှင် ဖုန်းများကို သေချာ ရှင်းလင်းပြီးမှ သွားသင့်ကြောင်း ၎င်းအမျိုးသားက ဆက်ပြောသည်။

ဆက်လက်ပြီး ပြီးခဲ့သည့် မတ်လ ဒုတိယပတ်တွင် ရွာငံ-မန္တလေးသွားလမ်းမှ စစ်ကော်မရှင်ဂိတ်တွင်လည်း မှတ်ပုံတင်လဲလှယ်ထားခြင်းမရှိသည့် အသက်(၈၀)ကျော် အမျိုးသမီးတစ်ဦးကို ကားပေါ်မှ ဆွဲချကာ ငွေကျပ် ရှစ်သောင်း တိတိ တောင်းပြီး ပြန်လွှတ်လိုက်ကြောင်း ခရီးသည်များကို ပို့ဆောင်နေသည့် ရွာငံဒေသခံ အမျိုးသားထံမှ သိရသည်။