အရပ်ဝတ်အသွင်ပြောင်း စစ်အစိုးရ ဖွဲ့စည်းပေးထားသည့် အမျိုးသားစည်းလုံးညီညွတ်ရေးနှင့် ငြိမ်းချမ်းရေးဖော်ဆောင်မှု ဗဟိုကော်မတီက တိုင်းရင်းသားလက်နက်ကိုင်အဖွဲ့အစည်း (EAOs) အားလုံးကို လာမည့် ဇူလိုင် ၃၁ ရက် နောက်ဆုံးထား၍ ရက်ပေါင်း (၁၀၀) အတွင်း ငြိမ်းချမ်းရေး ဆွေးနွေးရန် ဖိတ်ခေါ်လိုက်သည်။

ဧပြီလ ၂၁ ရက်နေ့ ရက်စွဲဖြင့် ထုတ်ပြန်လာသော အဆိုပါထုတ်ပြန်ချက်တွင် EAO များကို အုပ်စုသုံးစုခွဲ၍ ဖိတ်ခေါ်ထားပြီး NCA လက်မှတ်ထိုးထားသည့်အဖွဲ့များ၊ NCA လက်မှတ်မထိုးရသေးသည့် အဖွဲ့များနှင့် အကြောင်းအမျိုးမျိုးကြောင့် NCA လမ်းကြောင်းမှ သွေဖယ်နေသည့် အဖွဲ့များအနေဖြင့် နိုင်ငံရေးအရ တွေ့ဆုံဆွေးနွေးမှုများ ပြန်လည်လုပ်ဆောင်ရန် တိုက်တွန်းထားသည်။

နိုင်ငံရေးပြဿနာကို နိုင်ငံရေးနည်းလမ်းဖြင့် ဖြေရှင်းရန် အထူးလိုအပ်သည်ဟု ယုံကြည်ကြောင်း အတုအယောင်ရွေးကောက်ပွဲမှတဆင့် သမ္မတရာထူး ရယူထားသည့် အာဏာသိမ်း စစ်ခေါင်းဆောင် မင်းအောင်လှိုင်က ပြောဆိုသော်လည်း တော်လှန်ရေးအင်အားစု (PDF) များနှင့် အမျိုးသားညီညွတ်ရေးအစိုးရ (NUG) ကို ငြိမ်းချမ်းရေး ဆွေးနွေးရန် ဖိတ်ခေါ်ထားခြင်း မရှိသည်ကို တွေ့ရသည်။

“အတုအယောင် ရွေးကောက်ပွဲ တစ်ရပ်ကနေ တက်လာတဲ့ အတုအယောင် သမ္မတက ဖိတ်ခေါ်တဲ့ ကမ်းလှမ်းချက်တွေက အတုအယောင် ဖိတ်ခေါ်ချက်၊ အတုအယောင် ငြိမ်းချမ်းရေးပဲ ဖြစ်မှာပါ” သျှမ်းတောင်အမျိုးသားများ ကာကွယ်ရေးတပ် (SSNLO/ SSNDF) ၏ နိုင်ငံရေးမှူး စိုင်းပန်ဖက သျှမ်းသံတော်ဆင့်ကို ပြောသည်။

ဆွေးနွေးပွဲများ ကျင်းပနိုင်ရေးအတွက် ဧပြီလ ၂၁ ရက်နေ့မှစ၍ ဇူလိုင်လ ၃၁ ရက်အထိ ရက်ပေါင်း (၁၀၀) အတွင်း အချိန်ကန့်သတ်ချက် ပေးထားပြီး အရပ်ဝတ်အသွင်ပြောင်း စစ်အစိုးရ၏ ငြိမ်းချမ်းရေးညှိနှိုင်းရေးကော်မတီ (NSPNC) နှင့် ဆက်သွယ် ဆောင်ရွက်ရန်လည်း အကြောင်းကြားထားသည်။

အတုအယောင် ရွေးကောက်ပွဲမှတစ်ဆင့် စစ်အစိုးရအပြောင်းအလဲ ဖြစ်ပေါ်ခဲ့သော်လည်း မြေပြင်တွင် ပြည်သူများမှာ နေ့စဉ် ဗုံးကြဲတိုက်ခိုက်ခံရမှုနှင့် ဒုက္ခဆင်းရဲများကို ရင်ဆိုင်နေရဆဲ ဖြစ်ကြောင်း၊ ထို့ကြောင့် အပြောင်းအလဲအပေါ် ယုံကြည်မှု ကင်းမဲ့နေကြောင်း မြန်မာနိုင်ငံ၏ ပထမဆုံး သမ္မတ စဝ်ရွှေသိုက်၏ သားလည်းဖြစ်သူ၊ မြန်မာ့ငြိမ်းချမ်းရေးဖြစ်စဉ်တွင် ထဲထဲဝင်ဝင် ပါဝင်ဦးဆောင်ခဲ့သည့် ဥရောပ-မြန်မာ (EBO) အမှုဆောင် ဒါရိုက်တာလည်းဖြစ်သူ စဝ်ဟန်ယောင်ဟွေက ပြောသည်။

“ကျနော်တစ်ယောက်တည်း အမြင်ကတော့ ဆွေးနွေးချင်တယ်၊ အဖြေရှာချင်တယ်ဆိုရင် ယုံကြည်မှု တည်ဆောက်ရမယ်။ အခုက ဘယ်သူမှ မယုံဘူး၊ ဘယ်လိုပြောပြော မယုံဘူး။ ဘာကြောင့်လဲဆိုရင် ဗုံးက ဆက်ကြဲနေသေးတယ်ဆိုတော့ ဘယ်သူက ငြိမ်းချမ်းရေး ဆွေးနွေးမယ်လို့ ယုံကြည်မလဲ” ဟု သျှမ်းသံတော်ဆင့်နှင့် သီးသန့်အင်တာဗျူးတွင် စဝ်ဟန်ယောင်ဟွေက ပြောဆိုထားသည်။

ထို့အပြင် အမျိုးသားကာကွယ်ရေးနှင့် လုံခြုံရေးကောင်စီ (ကာ/လုံ)အစည်းအဝေးကို ယမန်နေ့ (ဧပြီလ ၂၁ ရက်) တွင် နေပြည်တော်၌ ကျင်းပခဲ့ရာ အာဏာသိမ်းစစ်ခေါင်းဆောင် မင်းအောင်လှိုင်က တိုင်းပြည်တည်ငြိမ် အေးချမ်းရေးအတွက် PDF အဖွဲ့များအနေဖြင့် လက်နက်ကိုင်လမ်းစဉ်ကို စွန့်လွှတ်ကာ ငြိမ်းချမ်းရေးလမ်းကြောင်းပေါ်သို့ ပါဝင်လာရန် ပြောဆိုခဲ့သည်။

စစ်အာဏာသိမ်းခေါင်းဆောင် မင်းအောင်လှိုင်၏ မိန့်ခွန်းထဲတွင် PDF အဖွဲ့များသည် ၂၀၂၀ ပြည့်နှစ် ရွေးကောက်ပွဲ မဲမသမာမှုအပေါ် အခြေခံသည့် နိုင်ငံရေးသဘောထား ကွဲလွဲမှုများမှတစ်ဆင့် ပြည်တွင်း၊ ပြည်ပ သွေးထိုးလှုံ့ဆော်မှုများကြောင့် လက်နက်ကိုင်လမ်းစဉ်ကို မှားယွင်းစွာ ရွေးချယ်ခဲ့ကြခြင်း ဖြစ်ကြောင်း ဝေဖန်ပြောဆိုခဲ့သည်။

ထို့အပြင် ၂၀၂၄ ခုနှစ်နောက်ပိုင်းတွင် နိုင်ငံတော်နှင့် တပ်မတော်၏ သဘောထားအမှန်ကို နားလည်လာကာ ဥပဒေဘောင်အတွင်းသို့ ဝင်ရောက်လာသူ များပြားလာခြင်းသည် ကောင်းမွန်သည့် လက္ခဏာဖြစ်ကြောင်းလည်း စစ်ခေါင်းဆောင်က ပြောဆိုသည်။

ပြီးခဲ့သည့် ကာလများအတွင်း အချို့သော တိုင်းရင်းသားလက်နက်ကိုင်တပ်ဖွဲ့များနှင့် တွေ့ဆုံဆွေးနွေး၍ နှစ်ဖက်သဘောတူညီချက်များ ရရှိခဲ့ပြီးဖြစ်ကြောင်း၊ အဆိုပါ သဘောတူညီချက်များကို ပိုမိုခိုင်မာစေရန်အတွက် ပြည်ထောင်စုလွှတ်တော်တွင် ထည့်သွင်းဆွေးနွေး အတည်ပြုသွားမည်ဖြစ်ကြောင်း ဆိုသည်။

ထို့အပြင် NCA လက်မှတ် ရေးထိုးထားသည့် အဖွဲ့များနှင့်သာမက NCA လက်မှတ်မထိုးရသေးသည့် အဖွဲ့များနှင့်ပါ ဆွေးနွေးမှုများကို ဆက်လက် လုပ်ဆောင်သွားမည်ဖြစ်ပြီး အချို့အဖွဲ့များသည် ၎င်းတို့၏ ကိုယ်ကျိုးအတွက် လက်နက်ကိုင် ဆောင်ရွက်နေသည်ကို တွေ့ရှိရကြောင်း စစ်ခေါင်းဆောင် မင်းအောင်လှိုင်က စွပ်စွဲခဲ့သည်။